భారతీయ కిసాన్ యూనియన్ ప్రతినిధి రాకేశ్ టికాయిత్ కీలక వ్యాఖ్యలు చేశారు. రైతు ఉద్యమం విస్తరణలో భాగంగా కర్ణాటక, మహారాష్ట్ర రాష్ట్ర రైతుల మద్దతు కూడగడతానని ప్రకటించారు. ఇందుకోసం ఈనెల 20న ఆ రాష్ట్రాల్లో పర్యటిస్తానని వెల్లడించారు. ప్రస్తుతం పంజాబ్, హరియాణా, గుజరాత్, రాజస్థాన్ రైతులు నిరసనలో పాల్గొంటున్నారని పేర్కొన్నారు. హరియాణాలోని హిసార్లో పర్యటిస్తున్న సందర్భంగా.. టికాయిత్ శుక్రవారం ఈ వ్యాఖ్యలు చేశారు.
"గత 70 ఏళ్లుగా రైతులు వ్యవసాయంలో నష్టపోతూనే ఉన్నారు. ఇప్పుడు ఓ పంటను త్యాగం చేయాలి. అందుకు వారు సిద్ధంగా ఉన్నారు. పంటకోతకు కూలీలను నియమించుకుంటారే కానీ ఉద్యమం నుంచి నిష్క్రమించరు."
-రాకేశ్ టికాయిత్, బీకేయూ నేత
ఆ ఎన్నికలతో సంబంధం లేదు..
బంగాల్ ఎన్నికల గురించి తమకు ఎలాంటి ఆలోచన లేదని టికాయిత్ స్పష్టం చేశారు. ఖాప్స్ సంఘంతో కేంద్ర మంత్రి అమిత్ షా భేటీపై విమర్శలు చేశారు. ఆ వర్గానికి చెందిన ఎందరో రైతులు తమ ఉద్యమంలో పాల్గొంటున్నారని అన్నారు. హరియాణాలోని స్థానిక ఎన్నికలపై స్పందిస్తూ ఎలక్షన్లు క్రమబద్ధంగా జరగాలని పేర్కొన్నారు. నాయకులను ఎన్నుకోవడం ప్రజల ఇష్టం అని అన్నారు.
ఇదీ చదవండి : 'వ్యవసాయమూ చేస్తాం.. ఆందోళనలూ కొనసాగిస్తాం'
