రాబోయే పార్లమెంటు వర్షకాల సమావేశాలకు కొత్తమంత్రులు సిద్ధంగా ఉండాలని ప్రధానమంత్రి నరేంద్ర మోదీ పిలుపునిచ్చారు. వారి వారి మంత్రిత్వశాఖలపై పట్టు సాధించి.. ప్రతిపక్ష పార్టీలు అడిగే ప్రశ్నలకు ధీటుగా జవాబు ఇవ్వాలని కోరారు. ఇందుకుగాను తగిన కృషి చేయాలన్నారు.
పార్లమెంట్లో అనుసరించాల్సిన విధివిధానాలపై కేంద్ర మంత్రి మండలి సమావేశంలో చర్చించారు. జూలై 19 నుంచి ప్రారంభం కానున్న పార్లమెంట్ సమావేశాలు ఆగస్టు 13 వరకు జరగనున్నాయి. ఈ వర్షకాల సమావేశాల్లో కేంద్రం మొత్తంగా 17 కొత్త బిల్లులను పార్లమెంట్లో ప్రవేశపెట్టనుంది. మరో ఆరు బిల్లులు ఉభయ సభలు, పార్లమెంటరీ ప్యానెళ్ల ముందు వివిధ దశలలో పెండింగ్‌లో ఉన్నాయి.
ముప్పేట దాడికి కాంగ్రెస్...
రాబోయే పార్లమెంటు సమావేశాల్లో మోదీ సర్కారుపై ప్రశ్నలతో ముప్పేట దాడికి దిగేందుకు కాంగ్రెస్ సిద్ధమైంది. ముఖ్యంగా కరోనా కట్టడి చేయడంలో ప్రభుత్వం వైఫల్యాలు, చైనాతో సరిహద్దు వివాదం, అన్నదాతల ఆందోళనలు, రఫేల్ ఒప్పందం, పెరిగిన ఇంధన ధరలను అస్త్రాలుగా చేసుకుని ఉభయ సభల్లో ప్రశ్నల వర్షం కురిపించనుంది. లోక్సభలో అధీర్ రంజన్ చౌధరీ, రాజ్యసభలో మల్లికార్జున ఖర్గేలు ఈ బాధ్యతలను తీసుకోనున్నారు.
సోనియా గాంధీ అధ్యక్షతన ఉభయ సభల్లో అనుసరించాల్సిన వ్యూహాలపై కాంగ్రెస్ పార్లమెంటరీ స్ట్రాటజీ గ్రూప్ సమావేశమై.. చర్చించింది. దీనికి మాజీ ప్రధాని మన్మోహన్ సింగ్, కాంగ్రెస్నేత రాహుల్గాంధీ హాజరయ్యారు. దీనిలో ప్రధానంగా పెరిపోతున్న నిరుద్యోగం, ధరలతో పాటు ఆర్థిక వ్యవస్థ స్థితిగతులపై అధికార పార్టీని నిలదీయాలని నాయకులు నిర్ణయించారు.
ఇదీ చూడండి: వాటిపై చర్చకు రాహుల్ పట్టు- నో చెప్పిన ఛైర్మన్!
