కేరళలో అమానవీయ ఘటన జరిగింది. మూగజీవి అనే కాస్తైనా కనికరం లేకుండా.. తన పెంపుడు శునకంపై కర్కశంగా ప్రవర్తించాడో వ్యక్తి. కుక్క మెడకు తాడు కట్టి తన కారుతో రోడ్డుపై ఈడ్చుకెళ్లాడు. అటుగా వెళ్తున్న మరో వ్యక్తి ఈ దృశ్యాన్ని తన చరవాణిలో బంధించగా.. ఇప్పుడీ వీడియో సోషల్ మీడియాలో వైరల్ అవుతోంది.
ఏం జరిగిందంటే.?
ఎర్నాకుళం జిల్లా పారావుర్కు చెందిన యూసుఫ్.. తన పెంపుడు శునకాన్ని తాడుతో కారుకు కట్టి విచక్షణా రహితంగా రోడ్డుపై ఈడ్చుకెళ్లాడు. ఈ దృశ్యాన్ని అటుగా బైక్పై వెళ్తున్న ఓ వ్యక్తి వీడియో తీసి.. పోలీసులకు సమాచారమిచ్చాడు. అనంతరం యూసుఫ్ను అరెస్ట్ చేశారు పోలీసులు. గాయపడిన శునకాన్ని స్థానిక పశు వైద్యశాలకు తీసుకెళ్లి చికిత్స చేయించారు.
నిందితుడిపై కేసు
శునకంపై క్రూరంగా ప్రవర్తించిన యూసుఫ్ కారును స్వాధీనం చేసుకోవడం సహా.. అతడి డ్రైవింగ్ లైసెన్స్ను రద్దు చేశారు. అంతేకాకుండా.. ఐపీసీ సెక్షన్స్ 428(జంతువధ), 429(జంతు క్రూరత్వ నిషేధం); యానిమల్ యాక్ట్ సెక్షన్ 11(1) కింద కేసు నమోదు చేశారు పోలీసులు.
ఇదీ చదవండి: పేద విద్యార్థులకు వరంలా మారిన 'బోల్కీశాల'
