మధ్యప్రదేశ్ ఇందోర్ వేదికగా.. ఆన్లైన్ మోసాలకు పాల్పడుతున్న ఇద్దరు కేటుగాళ్లను అరెస్ట్ చేశారు హైదరాబాద్ సైబర్ క్రైమ్ పోలీసులు. నిందితుల్లో ఒకరిని రవి కిశోరియాగా గుర్తించారు. నిందితులు ఇద్దరిని హైదరాబాద్కు తరలిస్తున్నారు.
ఇదీ జరిగింది..
ఇందోర్లో శానిటైజేషన్ ఆర్గనైజేషన్ నడుపుతున్నాడు రవి కిశోరియా. తన స్నేహితుడితో కలిసి ఫేస్బుక్ ద్వారా ఆన్లైన్ మోసాలకు పాల్పడుతున్నాడు. ఇందులో భాగంగా హైదరాబాద్కు చెందిన ఓ మహిళను ఆన్లైన్ ట్రేడింగ్ పేరుతో బురిడీ కొట్టించారు. వారి మాయమాటలు నమ్మిన మహిళ.. రూ.5 లక్షలు పెట్టుబడి పెట్టింది.
కొద్ది రోజుల్లోనే ఇందోర్ నుంచి హైదరాబాద్ మహిళకు ఓ యువతి ఫోన్ చేసింది. మీకు రూ.81 లక్షల బహుమతి వచ్చిందని తెలిపింది. ఈ స్కీంలో మరింత పెట్టుబడి పెడితే ఎక్కువ మొత్తంలో సంపాదించుకోవచ్చని నమ్మించింది.
"ఆన్లైన్ కేటుగాళ్ల మాటలు నమ్మి మొత్తం రూ.1.20 కోట్లు వారి ఖాతాల్లో జమ చేశాను. డబ్బులు పెట్టాక.. వారికి ఫోన్ చేస్తే సమాధానం లేదు"
- బాధిత మహిళ
తాను ఫోన్చేస్తే సమాధానం లేకపోయేసరికి మోసపోయానని గ్రహించి.. హైదరాబాద్ సైబర్ క్రైమ్ పోలీసులకు ఫిర్యాదు చేసింది మహిళ. కేసు నమోదు చేసుకొని దర్యాప్తు చేపట్టారు పోలీసులు. ఇందోర్ వేదికగా ఈ మోసం జరిగిందని గుర్తించి.. అక్కడికి వెళ్లారు. రెండు రోజుల పాటు అక్కడే ఉండి ఇద్దరని అరెస్ట్ చేశారు.
ఇదీ చూడండి: కొట్టేసిన కార్డులతో రూ.2 కోట్ల ఆన్లైన్ షాపింగ్!
