దేశవ్యాప్తంగా టీకా పంపిణీ ప్రక్రియ శరవేగంగా సాగుతోంది. దేశంలో టీకా పంపిణీ 70 కోట్ల మార్కును అందుకున్నట్టు కేంద్ర ఆరోగ్యశాఖ ప్రకటించింది. మంగళవారం సాయంత్రం 7 గంటల వరకు 67లక్షల టీకాలు పంపిణీ చేసినట్టు వెల్లడించింది. దీంతో మొత్తం టీకాల సంఖ్య 70,63,55,796కి చేరినట్టు స్పష్టం చేసింది.
రోజుకు కోటి టీకాలు అందించాలనే లక్ష్యంతో ముందుకు సాగుతోంది భారత్. ఈ క్రమంలో 11రోజుల వ్యవధిలో ఇప్పటికే మూడుసార్లు ఆ ఘనతు సాధించింది.
కేరళలో 25వేల కేసులు
కేరళలో కరోనా కేసులు తగ్గుముఖం పట్టాయి. గత ఐదు రోజులుగా 30వేలలోపే నమోదవుతున్నయి. మంగళవారం కొత్తగా 25,772 కేసులు, 189 మరణాలు నమోదయ్యాయి. పాజిటివిటీ రేటు 15.87 శాతంగా నమోదైంది. 27,320 మంది వైరస్ నుంచి కోలుకున్నారు. ప్రస్తుతం రాష్ట్రవ్యాప్తంగా 2,37,045 యాక్టివ్ కేసులు ఉన్నాయి.
రాత్రి కర్ఫ్యూ ఎత్తివేత..
కేరళలో కరోనా కేసులు తగ్గుముఖం పడుతున్న క్రమంలో రాత్రి కర్ఫ్యూను ఉపసంహరించుకోవాలని నిర్ణయించింది ప్రభుత్వం. ఆదివారాల్లో లాక్డౌన్ సైతం ఉపసహరించుకుంటున్నట్లు సీఎం పినరయి విజయన్ తెలిపారు. కొవిషీల్డ్ రెండో డోసుపై హైకోర్టు ఆదేశాలను పాటిస్తామన్నారు. అలాగే.. ఉన్నత విద్యాసంస్థలను అక్టోబర్ 4 నుంచి తెరుస్తున్నట్లు కొవిడ్పై సమీక్షా సమావేశం అనంతరం ప్రకటించారు సీఎం. సాంకేతిక, పాలీ టెక్నిక్, మెడికల్, డిగ్రీ, పీజీ కోర్టుల్లోని చివరి సంవత్సరం క్లాసులు ప్రారంభమవుతాయన్నారు. క్లాసులకు హాజరుకావాలనుకుంటున్న విద్యార్థులు ఉపాధ్యాయులు కనీసం ఒక్కడోసైనా టీకా తీసుకోవాలని సచించారు.
ఇతర రాష్ట్రాల్లో కొవిడ్ కేసుల వివరాలు..
- మహారాష్ట్రలో మంగళవారం కొత్తగా 3,898 కరోనా కేసులు నమోదయ్యాయి. 86 మంది వైరస్కు బలయ్యారు. 3.581 మంది వైరస్ నుంచి కోలుకుని ఇళ్లకు వెళ్లారు. సోమవారంతో పోలిస్తే కొత్త కేసులు, మరణాలు స్వల్పంగా పెరిగాయి.
- తమిళనాడులో మంగళవారం కొత్తగా 1,544 మందికి వైరస్ సోకింది. 19 మంది ప్రాణాలు కోల్పోయారు. కొత్త కేసుల్లో నాలుగు జిల్లాలు కోయంబత్తూర్, చెన్నై, చెంగల్పట్టు, ఈరోడ్లలోనే అధికంగా ఉన్నాయి. సెప్టెంబర్ 12 నుంచి రాష్ట్రవ్యాప్తంగా మెగా వ్యాక్సినేషన్ క్యాంపులు నిర్వహించాలని నిర్ణయించింది రాష్ట్ర ప్రభుత్వం.
- దిల్లీలో ఈనెలలో తొలి కొవిడ్ మరణం నమోదైంది. కొత్తగా 50 మందికి వైరస్ సోకింది. పాజిటివిటీ రేటు 0.07గా ఉంది. 30 మంది వైరస్ నుంచి కోలుకున్నారు.
- కర్ణాటకలో 851 మందికి కొత్తగా వైరస్ సోకింది. 15 మంది బలయ్యారు. 790 మంది కోలుకున్నారు.
