హెచ్ఐవీతో మృతి చెందిన ఓ చిన్నారికి అంత్యక్రియలు చేయడానికి ఎవరూ ముందుకు రాకపోవడాన్ని చూసిన ఆ వ్యక్తి కఠిన నిర్ణయం తీసుకున్నారు. తన ఉద్యోగాన్ని వదులుకొని హెచ్ఐవీ బాధితుల కోసం ప్రత్యేక గ్రామాన్నే నెలకొల్పారు. పట్టువదలని విక్రమార్కుడిలా వారికి కావలసిన వనరులను సమకూర్చారు.
మహారాష్ట్రలోని లాతుర్ జిల్లాకు చెందిన రవి బాపట్ల అనే వ్యక్తి గత కొన్నేళ్లుగా తన జీవితాన్ని హెచ్ఐవీ రోగులకు అంకితం చేశారు. 2007లో హెచ్ఐవీ బాధితుల కోసం 'హ్యాపీ ఇండియన్ విలేజ్'ను రవి నెలకొల్పారు. ఎయిడ్స్ కారణంగా తల్లిదండ్రులను కోల్పోయిన ఎందరో అనాధ పిల్లలు, హెచ్ఐవీ బాధితులు ఈ సేవాలయంలో ఆశ్రయం పొందుతున్నారు. వారికి సమయానికి మందులు అందించి వారి బాగోగులు చూసుకుంటున్నారు రవి.
మన్మతప్ప ముక్తా అనే వ్యక్తి ఈ సేవాలయానికి 60 ఎకరాల భూమిని విరాళంగా ఇచ్చారు. వెంటనే సేవాలయం నెలకొల్పడానికి దరఖాస్తు చేసుకున్నాను. అప్పుడు ఆ గ్రామస్థుల నుంచి వ్యతిరేకత వచ్చింది. అయినా వారిని ఎదిరించి పనులు ప్రారంభించాను. క్రమంగా గ్రామస్థుల్లో మార్పు వచ్చి పనిలో భాగమయ్యారు. ఆ తర్వాత ఈ సేవాలయం గురించి తెలిసి హెచ్ఐవీ సోకిన పిల్లలు ఇక్కడకు రావడం ప్రారంభించారు. ప్రస్తుతం ఇందులో 85 మంది బాధితులు ఉన్నారు.
-- రవి బాపట్ల, హ్యాపీ ఇండియన్ విలేజ్ వ్యవస్థాపకులు
అంతేకాకుండా ఉన్నత చదువులు చదివేలా పిల్లలను రవి బాపట్ల ప్రోత్సహిస్తున్నారు. దాంతో పాటు 18 సంవత్సరాలు దాటిన వారికి మరో ఎయిడ్స్రోగితో వివాహాలు కూడా జరిపించి కొత్త జీవితాన్ని అందిస్తున్నారు. ప్రస్తుతం ఈ సేవాలయంలో 85 మంది హెచ్ఐవీ బాధితులు ఆశ్రయం పొందుతున్నారు.
మా అమ్మ కడుపులో ఉండగానే నాకు హెచ్ఐవీ సోకింది. నేను మూడో తరగతి చదువుతున్నప్పుడు మా తల్లిదండ్రులు ఎయిడ్స్తో చనిపోయారు. ఐదో తరగతి చదువుతున్నప్పుడు మా బాబాయి నన్ను ఈ సేవాలయంలో చేర్పించారు. ఇంటర్ వరకు చదువుకున్నాను. 2014లో మరో ఎయిడ్స్రోగితో నా వివాహం జరిగింది. ప్రస్తుతం మా ఇద్దరు పిల్లలకు హెచ్ఐవీ లేదు. దాదాపు 12 సంవత్సరాలుగా మా వివాహ జీవితం ఆనందంగా కొనసాగుతోంది.
-- రాణి, హెచ్ఐవీ బాధితురాలు
ఇవీ చదవండి:
