దేశంలో ఇంధన ధరలపై కీలక వ్యాఖ్యలు చేశారు పెట్రోలియంశాఖ మంత్రి హర్దీప్ సింగ్ పూరీ. పెట్రోల్ ధరల వ్యవహారాన్ని కేంద్రం అత్యంత సున్నితమైనదిగా పరిగణిస్తున్నట్టు తెలిపారు. రానున్న నెలల్లో దేశ ప్రజలకు కొంత ఉపశమనం లభించే అవకాశమున్నట్టు వెల్లడించారు.
"అంతర్జాతీయంగా చమురు ధరలు నెమ్మదిగా దిగొస్తున్నాయి. స్థిరంగా ఉంటున్నాయి. ఈ నేపథ్యంలో రానున్న నెలల్లో దేశ ప్రజలకు కొంత ఉపశమనం లభించే అవకాశముంది. ఈ విషయంలో కేంద్రం చాలా సున్నితంగా వ్యవహరిస్తోంది."
-హర్దీప్ సింగ్ పూరీ, పెట్రోలియంశాఖ మంత్రి
పెట్రోల్ ధరలకు రెక్కలొచ్చాయంటూ విపక్షాలు ప్రభుత్వంపై మండిపడ్డాయి. ఈ నేపథ్యంలో ప్రభుత్వాన్ని సమర్థించారు పూరీ. లీటర్ పెట్రోల్పై ప్రభుత్వం రూ. 32 ఎక్సైజ్ సుంకాన్ని విధిస్తుందని.. ఆ డబ్బును వివిధ సంక్షేమ పథకాల కోసం వినియోగిస్తుందని వెల్లడించారు.
2010 ఏప్రిల్లో నాటి ప్రభుత్వం విధించిన ఎక్సైజ్ సుంకాలే ఇప్పుడు కూడా అమల్లో ఉన్నట్టు స్పష్టం చేశారు పూరీ.
"ఉదాహరణకు.. అంతర్జాతీయంగా చమురు ధర లీటర్కు 19డాలర్లు 60 సెంట్లుగా ఉన్నప్పుడు.. కేంద్ర ప్రభుత్వం రూ. 32 ఎక్స్జ్ సుంకాన్ని విధించింది. ఇప్పుడు అది లీటర్కు 75 డాలర్లుగా ఉన్నా.. అదే సుంకాన్ని విధిస్తోంది" అని పూరీ తెలిపారు.
ఇదీ చూడండి:- Petrol Price today: స్వల్పంగా తగ్గిన పెట్రోల్, డీజిల్ ధరలు
