సాగు చట్టాలను కేంద్ర ప్రభుత్వం రద్దు చేయకపోతే దిల్లీ సరిహద్దుల్లో నిరసన తెలిపిన రైతులు.. పార్లమెంట్ను చుట్టుముడతారని రైతుసంఘం నాయకుడు రాకేశ్ టికాయిత్ హెచ్చరించారు. 'దిల్లీ మార్చ్'కు ఏ క్షణంలోనైనా పిలుపు రావచ్చని తెలిపారు. ఇందుకు రైతు సోదరులు సిద్ధంగా ఉండాలని కోరారు. రాజస్థాన్ సీకర్లో నిర్వహించిన కిసాన్ మహాపంచాయత్ కార్యక్రమంలో పాల్గొన్న ఆయన.. ఈ వ్యాఖ్యలు చేశారు.
"రైతు సోదరులారా..! ఈ సారి పార్లమెంట్ ఘెరావ్కు సిద్ధంగా ఉండండి. తరువాత దిల్లీలో మార్చ్ను నిర్వహిస్తాం. ఈ సారి నాలుగు లక్షల ట్రాక్టర్లతో కాకుండా.. నలభై లక్షల ట్రాక్టర్లతో సత్తా చూపాలి. నిరసనల్లో భాగంగా ఇండియా గేట్ దగ్గర ఉండే పార్కులను దున్ని.. పంటలు పండించాలి. త్వరలో పార్లమెంట్ ఘెరావ్కు సంబంధించిన తేదీని రైతు సంఘం నాయకులు నిర్ణయిస్తారు."
-రాకేశ్ టికాయిత్, రైతు సంఘం నేత
గణతంత్ర దినోత్సవం నాడు తలపెట్టిన ట్రాక్టర్ పరేడ్లో హింసకు కుట్ర జరిగిందని ఆరోపించారు టికాయిత్. దేశంలోని రైతులు త్రివర్ణ పతాకాన్ని ప్రేమిస్తారు, కానీ నాయకులను కాదు అని అన్నారు. సాగు చట్టాలను రద్దు చేయకుండా.. మద్దతు ధరను అమలు చేయకపోతే రైతులు పెద్ద కంపెనీల గోడౌన్లను కూల్చివేస్తారని హెచ్చరించారు.
