పాకిస్థాన్కు కీలక రహస్యాలు చేరవేస్తున్న డీఆర్డీఓ శాస్త్రవేత్తను మహారాష్ట్ర ఉగ్రవాద నిరోధక బృందం (ఏటీఎస్) అరెస్ట్ చేసింది. పాకిస్థాన్కు చెందిన ఇంటెలిజెన్స్ ఏజెన్సీ వర్గాలతో నిందితుడు కాంటాక్ట్లో ఉన్నాడని గుర్తించినట్లు ఏటీఎస్ తెలిపింది. వాట్సాప్ మెసేజ్లు, వాయిస్ కాల్స్, వీడియో కాల్స్ ద్వారా అతడు వారితో సంప్రదింపులు జరుపుతున్నాడని వెల్లడించింది. నిందితుడు హనీట్రాప్లో పడ్డట్లు ఏటీఎస్ తెలిపింది. గత ఆరు నెలలుగా ఓ మహిళతో అతడు సన్నిహితంగా ఉంటున్నట్లు గుర్తించింది.
నిందితుడిని ప్రదీప్ కురుల్కర్గా గుర్తించారు అధికారులు. పుణెలోని డీఆర్డీఓ విభాగంలో నిందితుడు పనిచేస్తున్నాడని ఏటీఎస్ అధికారులు వెల్లడించారు. బాధ్యాతాయుతమైన పదవిలో ఉండి తన హోదాను దుర్వినియోగం చేశాడని అధికారులు పేర్కొన్నారు. ప్రభుత్వానికి చెందిన రహస్యాల విషయంలో అతడు రాజీ పడ్డాడని తెలిపారు. ఈ రహస్య సమాచారం.. ప్రత్యర్థి దేశానికి చిక్కితే భారత భద్రతకు ముప్పు వాటిల్లుతుందని వెల్లడించారు. నిందితుడు మరో ఆరు నెలల్లో రిటైర్ కానున్నట్లు సమాచారం. ఈలోగా ప్రత్యర్థి దేశం వలలో చిక్కుకోవడం గమనార్హం.
"నిందితుడు సీనియర్ హోదాలో ఉన్నాడు. దేశంలోని అత్యంత ఉన్నతమైన రక్షణ రంగ పరిశోధనలో పనిచేస్తున్నాడు. అతడు తన హోదాను దుర్వినియోగం చేశాడు. తనకు తెలిసిన రహస్యాలు ప్రత్యర్థి దేశాలకు చిక్కితే ప్రమాదం అని తెలిసినా.. ఈ పని చేశాడు. పాకిస్థాన్ ఇంటెలిజెన్స్ ఆపరేటివ్ (పీఐఓ) ఏజెంట్తో అతడు కాంటాక్ట్లో ఉన్నాడు. వాట్సాప్, వీడియో కాల్స్ ద్వారా సంభాషించాడు. కీలకమైన సమాచారాన్ని ఆ ఏజెంట్తో పంచుకున్నాడు. ఇది హనీట్రాప్ కేసు."
-ఏటీఎస్ అధికారులు
దీనిపై ముంబయి, కాలాచౌకీకి చెందిన ఏటీఎస్ విభాగం కేసు నమోదు చేసిందని అధికారులు వివరించారు. 1923 అధికారిక రహస్యాల చట్టంలోని వివిధ సెక్షన్ల ప్రకారం కేసు నమోదు చేశామని తెలిపారు. దర్యాప్తు కొనసాగుతోందని చెప్పారు.
ఇటీవల బిహార్లో ఇదే తరహా హనీట్రాప్ ఘటన వెలుగుచూసింది. ముజఫర్పుర్ జిల్లా కాట్రా రిజిస్ట్రార్ కార్యాలయంలో క్లర్క్గా పనిచేస్తున్న రవి చౌరాసియా అనే వ్యక్తి దేశానికి సంబంధించిన రహస్య పత్రాలను పాకిస్థాన్కు చెందిన గూఢాచారి సంస్థ ఐఎస్ఐకు లీక్ చేశాడనే ఆరోపణలతో పోలీసులు అతడిని అరెస్టు చేశారు. జాతీయ భద్రతా సంస్థ ఆదేశాల మేరకు క్లర్క్ను అరెస్టు చేసినట్లు ముజఫర్పుర్ సీనియర్ ఎస్పీ జయంత్ కాంత్ తెలిపారు. నిందితుడు.. ముంగర్ జిల్లాకు చెందిన వ్యక్తి అని ఆయన తెలిపారు. పాకిస్థాన్కు చెందిన ఐఎస్ఐ గూఢాచారి సంస్థకు పనిచేసే ఓ మహిళా ఏజెంట్.. నిందితుడిని ఫేస్బుక్ ద్వారా పరిచయం చేసుకుంది. అంతకుముందు నిందితుడు చెన్నై ఆవడీలోని రక్షణ మంత్రిత్వ శాఖలో క్లర్క్గా పనిచేసేవాడు. అక్కడి నుంచి కూడా రహస్య సమాచారాన్ని గూఢాచారులకు పంపేవాడని తేలింది. ఈ వార్త పూర్తి వివరాల కోసం లింక్పై క్లిక్ చేయండి.
