రాజస్థాన్ కాంగ్రెస్లో మళ్లీ అసమ్మతి స్వరం వినిపిస్తోందనే వార్తలు ఊపందుకున్నాయి. జితిన్ ప్రసాద కాంగ్రెస్నుంచి భాజపాలో చేరిన వెంటనే సచిన్ పైలట్ పార్టీ మారతారనే ఊహాగానాలు వినిపిస్తున్నాయి. అయితే.. ఈ వార్తలను ఇప్పటికే కొట్టిపారేశారు సచిన్ పైలట్. ఈ క్రమంలో అధిష్టానానికి కీలక సూచనలు చేశారు ఆయన వర్గీయులు. పంజాబ్ కాంగ్రెస్లో నెలకొన్న సంక్షోభాన్ని పరిష్కరించినట్టు గానే రాజస్థాన్లో సచిన్ పైలట్, అశోక్ గహ్లోత్ మధ్య ఉన్న విభేదాలను అధిష్టానం పరిష్కరించాలని కోరారు.
సచిన్ పైలట్ కాంగ్రెస్తోనే ఉంటారని, అధిష్టానం అప్పగించిన అన్ని పనులను పూర్తి చేస్తారని తెలిపారు ఆయన మద్దతుదారులు. సచిన్ తరుచుగా పార్టీ హైకమాండ్తో టచ్లో ఉంటున్నారని, ఆయన డిమాండ్లు తర్వలోనే పరిష్కారమవుతాయనే నమ్మకం ఉన్నట్లు స్పష్టం చేశారు.
సచిన్ పైలట్కు పలువురు నాయకులు బహిరంగంగానే మద్దతు ఇస్తున్నారు. దౌసా జిల్లా భండానాలో తన తండ్రి రాజేశ్‌ పైలట్ వర్ధంతి కార్యక్రమానికి హాజరైన పలువురు నేతలు సచిన్ పైలట్కు అండగా ఉంటున్నట్టు చెప్పారు. దీంతో మళ్లీ రాజస్థాన్ కాంగ్రెస్లో అసమ్మతి చెలరేగినట్టు చాలా మంది భావిస్తున్నారు.
పైలట్ వర్గం లేవనెత్తిన సమస్యలను పరిశీలించడానికి పార్టీ ప్రధాన కార్యదర్శి అజయ్ మాకెన్ ఆధ్వర్యంలో ముగ్గురు సభ్యుల కమిటీని ఏర్పాటు చేశారు.
ఇదీ చదవండి: Sachin Pilot: రాజస్థాన్ కాంగ్రెస్లో మళ్లీ అసమ్మతి!
