కశ్మీర్లోని రాజౌరీ జిల్లాకు చెందిన భద్రతా దళాల సంయుక్త బృందం.. ముగ్గురు లష్కరే తోయిబా ఉగ్రవాదులను అరెస్ట్ చేసింది. డ్రోన్ల ద్వారా పాక్ నుంచి తరలిస్తున్న ఆయుధాలను తీసుకుంటుండగా ముష్కరులు పట్టుబడ్డారు. నిందితుల నుంచి రెండు ఏకే-56 రైఫిల్స్, 2 పిస్టల్స్, 4 గ్రెనేడ్లు, మందుగుండు సామగ్రి సహా.. లక్ష రూపాయల నగదును స్వాధీనం చేసుకున్నారు అధికారులు. కశ్మీర్లో శాంతికి భంగం కలిగించేందుకుగానూ.. పొరుగు దేశం డ్రోన్ల సాయంతో ఇలా దేశంలో ఆయుధాలను వదులుతోందని అధికారులు పేర్కొన్నారు.
ఈ ఆపరేషన్లో పట్టుబడ్డ ముగ్గురిలో ఓ ఉగ్రవాదిది షోపియాన్. ఇతడు 2020 జూన్ 4న ఉగ్రవాద ముఠాతో చేతులు కలిపాడు. మిగతా ఇద్దరిదీ పుల్వామా అని గుర్తించారు.
ఇది మూడోసారి..
సెప్టెంబర్ 11 నుంచి రాజౌరీ, పుంఛ్ ప్రాంతాల్లో పాక్ కుట్రలపై మూడు సార్లు పైచేయి సాధించామని ఇన్స్పెక్టర్ జనరల్ ఆఫ్ పోలీస్(ఐజీ) ముకేశ్ సింగ్ తెలిపారు.
అంతకుముందు బాలాకోట్ సెక్టార్లో భారీ ఆయుధాలతో పాటు మందుగుండు సామగ్రిని స్వాధీనం చేసుకున్నారు. ఈ ఘటన జరిగిన మూడు రోజుల తర్వాత.. రాజౌరీలో రూ.11 కోట్లు విలువగల 11కిలోల హెరాయిన్ను పట్టుకున్నారు.
ఇదీ చదవండి: షోపియాన్ ఎన్కౌంటర్ కేసులో కీలక మలుపు
