భాజపా జాతీయ ప్రధాన కార్యదర్శి, రాష్ట్ర బాధ్యుడు భూపేంద్ర యాదవ్ జాబితాను విడుదల చేశారు. పార్టీకి కంచుకోటగా ఉన్న పట్నా సాహిబ్ నుంచి ఈసారి కేంద్రమంత్రి రవిశంకర్ ప్రసాద్ పోటీ చేస్తున్నట్లు తెలిపారు. ప్రస్తుతం ఆ స్థానం నుంచి శతృఘ్నసిన్హా ప్రాతినిధ్యం వహిస్తున్నారు. ఈ సారి సిన్హా కాంగ్రెస్లో చేరి ఆ పార్టీ తరపున పోటీ చేయనున్నట్లు సమాచారం. ఈ కారణంతోనే ఆ స్థానంలో రవిశంకర్ ప్రసాద్ బరిలో ఉన్నట్లు తెలుస్తోంది.
"ప్రధానమంత్రి నరేంద్ర మోదీ నేతృత్వంలో దేశంలో మంచి ప్రభుత్వాన్ని ఏర్పాటు చేయాలని మనకు దిశానిర్దేశం చేశారు. భాజపా, జేడీయూ, ఎల్జేపీల కూటమి అభ్యర్థుల జాబితా అగ్ర నాయకత్వం సూచనలతో పూర్తి చేశాం. పట్నా సాహిబ్ నుంచి ప్రస్తుత కేంద్ర మంత్రి రవిశంకర్ ప్రసాద్ పోటీ చేస్తున్నారు. లోక్జనశక్తి పార్టీ పోటీలో ఉండే ఖగాడియాలో అభ్యర్థిని రెండు రోజుల్లో ప్రకటిస్తాం. బిహార్లోని మూడు పార్టీలతో ఏర్పాటైన కూటమి 40 స్థానాల్లో పోటీ చేయాలని ఎన్డీఏ సంకల్పించింది." - భూపేందర్ యాదవ్, భాజపా జాతీయ ప్రధాన కార్యదర్శి.
కేంద్రమంత్రి గిరిరాజ్ సింగ్ ప్రస్తుత స్థానం నవాడా సీటును ఎల్జేపీకి కేటాయించింది ఎన్డీఏ. దాంతో బెగూసరాయ్‌ నుంచి సింగ్ పోటీ చేస్తున్నారు. కేంద్ర మంత్రులు రాధామోహన్ సింగ్, ఆర్కే సింగ్, అశ్విని కుమార్ చౌబే, రామ్ క్రిపాల్ యాదవ్ వారి వారి ప్రస్తుత స్థానాలు మొతిహరి, అర, బక్సర్, పాటలిపుత్రాల్లోనే మరో మారు తమ అదృష్టాన్ని పరీక్షించుకోనున్నారు.
లోక్ జనశక్తి పార్టీ రాష్ట్ర అధ్యక్షుడు పశుపతి కుమార్ పరస్ అతని అన్న రామ్ విలాస్ పాశ్వాన్ స్థానం హజిపుర్ నుంచి పోటీ చేస్తున్నారు. కేంద్ర మంత్రి రామ్ విలాస్కు రాజ్యసభ టికెట్ దక్కే అవకాశం ఉంది.
