భారత్, జపాన్ 4వ దఫా సంయుక్త నౌకాదళ విన్యాసాలు 'జిమెక్స్-20' శనివారం నుంచి ప్రారంభమయ్యాయి. భారత్ నేవీ, జపాన్ సముద్ర స్వీయ రక్షణ దళం (జేఎంఎస్డీఎఫ్) కలిసి ఉత్తర అరేబియా సముద్రంలో నిర్వహిస్తోన్న ఈ డ్రిల్స్ మూడు రోజుల పాటు కొనసాగనున్నాయి.
సముద్ర భద్రతా సహకారానికి సంబంధించి 2012 నుంచి జిమెక్స్ విన్యాసాలు చేస్తున్నాయి రెండు దేశాలు. 2018 అక్టోబర్లో విశాఖపట్నంలో చివరి సారిగా భారత్, జపాన్ డ్రిల్స్ నిర్వహించాయి.
ద్వైపాక్షిక ప్రయోజనాలు..
కొన్నేళ్ల నుంచి భారత్, జపాన్ నౌకాదళాల మధ్య సహకారం పెరుగుతూ వస్తోంది. జిమెక్స్-20 లో భాగంగా అధునాతన స్థాయి కార్యకలాపాలు, విన్యాసాలు నిర్వహించనున్నారు. అంతర్జాతీయ నిబంధనలకు అనుగుణంగా సురక్షితమైన, స్వేచ్ఛా, సమగ్ర ప్రయోజనాలే లక్ష్యంగా కలిసి పనిచేసే దిశగా ఈ కార్యక్రమాన్ని ఏర్పాటు చేశారు.
కరోనా నేపథ్యంలో..
సముద్ర ఆపరేషన్లలో పరస్పర సహకారం, సమాచార మార్పిడికి జిమెక్స్-20 వేదిక కానుంది. బహుళ పాక్షిక వ్యూహాలు, ఆయుధాల వినియోగం, హెలికాప్టర్ ఆపరేషన్లు జరగనున్నాయి. ఇరుదేశాలు అభివృద్ధి చేసిన ఉపరితల, జలాంతర్గాములు, వాయు నిరోధక సాంకేతికతలను ప్రదర్శించనున్నారు. కరోనా నిబంధనలను పాటిస్తూ 'నాన్ కాంటాక్ట్ సీ ఓన్లీ ఫార్మాట్'లో విన్యాసాలను నిర్వహించటం కొసమెరుపు.
ఇదీ చూడండి: రెండు రోజులపాటు భారత్- ఆస్ట్రేలియా నౌకాదళ విన్యాసాలు
