బంగాల్ శాసనసభ ఎన్నికల్లో భాజపాకు 99 కన్నా ఎక్కువ స్థానాలు రావడం గగనమని జోస్యం చెప్పారు ప్రముఖ రాజకీయ వ్యూహకర్త ప్రశాంత్ కిశోర్. 294 నియోజకవర్గాలున్న బంగాల్లో 200కుపైగా స్థానాలు గెలుచుకుని ప్రభుత్వం ఏర్పాటు చేస్తామని కేంద్ర హోంమంత్రి అమిత్ షా ధీమా వ్యక్తంచేసిన నేపథ్యంలో ఈమేరకు ట్వీట్ చేశారు.
"అనుకూల మీడియాలో ఎంతలా ప్రచారం చేసుకున్నా... వాస్తవంలో భాజపా రెండంకెలు దాటేందుకు చాలా కష్టపడాల్సి ఉంటుంది. ఈ ట్వీట్ సేవ్ చేసి పెట్టుకోండి. నేను చెప్పినదానికన్నా భాజపా మెరుగైన పనితీరు కనబరిస్తే... నేను ట్విట్టర్ నుంచి తప్పుకుంటా," అని ట్వీట్ చేశారు ప్రశాంత్.
ప్రస్తుతం బంగాల్లో తృణమూల్ కాంగ్రెస్కు రాజకీయ సలహాదారుగా పనిచేస్తున్నారు ప్రశాంత్.
'భాజపాదే అధికారం..'
ప్రశాంత్ కిషోర్ వ్యాఖ్యలపై భాజపా జాతీయ ప్రధాన కార్యదర్శి కైలాశ్ విజయ్వర్గీయ విరుచుకుపడ్డారు. బంగాల్లో భాజపా ప్రభుత్వం ఏర్పాటు చేసిన అనంతరం.. దేశం ప్రశాంత్ కిశోర్ వంటి ఎన్నికల వ్యూహకర్తను కోల్పోతుందని వ్యంగ్యాస్త్రాలు సంధించారు.
"బంగాల్లో భాజపా సునామీ కొనసాగుతోంది. మేము ప్రభుత్వం ఏర్పాటు చేసిన అనంతరం, ఓ రాజకీయ వ్యూహకర్తను దేశం కోల్పోతుంది."
-- విజయ్వర్గీయ, భాజపా జాతీయ ప్రధాన కార్యదర్శి.
2021 మే నెలలో బంగాల్లో అసెంబ్లీ ఎన్నికలు జరగనున్నాయి. ఈ తరుణంలో అధికారాన్ని నిలబెట్టుకోవాలని టీఎంసీ, ఎలాగైనా బంగాల్ను దక్కించుకోవాలని భాజపా తీవ్ర స్థాయిలో శ్రమిస్తున్నాయి. ఈ తరుణంలోనే ఇరు పార్టీల మధ్య మాటల యుద్ధం ఇప్పటికే తారస్థాయికి చేరింది.
ఇవీ చూడండి:-
