నిర్భయ అత్యాచారం, హత్య కేసులో ఊహించని మలుపు తిరిగింది. ఈ నెల 20న నలుగురు దోషులకు ఉరి అమలు నేపథ్యంలో.. శిక్ష తప్పించుకోవడానికి కుట్రలు పన్నుతున్నారు. తాజాగా ముగ్గురు దోషులు అంతర్జాతీయ న్యాయస్థానాన్ని ఆశ్రయించారు.
దిల్లీ కోర్టు తమకు విధించిన మరణ శిక్షపై స్టే విధించాలని.. ఐసీజేను కోరారు ముగ్గురు దోషులు అక్షయ్ కుమార్, వినయ్, పవన్ గుప్తా.
నిర్భయ కేసులో నలుగురు దోషులకు ఇప్పటికే న్యాయపరమైన అవకాశాలన్నీ ముగిశాయి. క్యురేటివ్, క్షమాభిక్ష పిటిషన్లను పునరుద్ధరించాలని కోరిన ముకేశ్ పిటిషన్నూ సుప్రీం కోర్టు ఇవాళ కొట్టివేసింది. ఈ నిర్ణయంతో వారికి శిక్ష తప్పించుకునే మార్గాలన్నీ మూసుకుపోయాయి. నలుగురూ ఒకేసారి ఉరికంబం ఎక్కనున్నారు.
3 సార్లు వాయిదా..
నిర్భయ దోషులకు ఉరి శిక్ష మూడు సార్లు వాయిదా పడింది. మార్చి 20న ఉదయం 5.30 గంటలకు దోషులను ఉరి తీయాలని దిల్లీ కోర్టు ఇటీవల డెత్ వారెంట్ జారీ చేసింది. ఈ నేపథ్యంలో తీహార్ జైలులో ఏర్పాట్లు ముమ్మరంగా సాగుతున్నాయి.
