woman to pay alimony to husband: వైవాహిక జీవితానికి స్వస్తి పలుకుతూ భార్యాభర్తలు వీడిపోయిన సందర్భంలో భార్యకు భరణం ఇవ్వటం చాలా ఏళ్ల నుంచి వస్తున్న పద్ధతి. అయితే, వీడాకులు తీసుకునే భార్య.. భర్తకు భరణం ఇవ్వాలని బొంబాయి హైకోర్టు ఔరంగాబాద్ బెంచ్ స్పష్టం చేసింది. మహారాష్ట్రలోని నాందేడ్ సివిల్ కోర్టు ఇచ్చిన తీర్పును సమర్థించింది. సివిల్ కోర్టు తీర్పును సవాల్ చేస్తూ వేసిన పిటిషన్ను కొట్టివేసింది.
ఇదీ కేసు: 1992లో ఓ జంటకు వివాహం జరిగింది. కుటుంబ కలహాలతో భర్త నుంచి విడాకులు ఇప్పించాలని 2015లో భార్య.. నాందేడ్ సివిల్ కోర్టును ఆశ్రయించింది. విచారణ చేపట్టిన కోర్టు వారికి అదే ఏడాది విడాకులు మంజూరు చేసింది. ఈ క్రమంలోనే హిందూ వివాహ చట్టం 1955లోని సెక్షన్ 24, 25 ప్రకారం భార్య నుంచి శాశ్వత భరణం, జీవనాధార ఖర్చులు ఇప్పించాలని కోరుతూ ఆమె భర్త పిటిషన్ వేశారు. తనకు జీవనాధారం ఏమీ లేదని, భార్య ప్రభుత్వ ఉద్యోగం చేస్తూ మంచి వేతనం తీసుకుంటున్నట్లు పిటిషన్లో పేర్కొన్నారు. ఈ రోజు ఆమె ఆ స్థానంలో ఉండేందుకు తాను ఎంతో కష్టపడ్డానని తెలిపారు. భర్త పిటిషన్ను విచారణకు స్వీకరించిన నాందేడ్ సివిల్ కోర్టు.. భరణం ఇవ్వాలని భార్యను ఆదేశించింది.
నాందేడ్ సివిల్ కోర్టు తీర్పును సవాల్ చేస్తూ ఔరంగాబాద్ హైకోర్టును ఆశ్రయించింది భార్య. విడాకులు మంజూరయ్యాక వారి బంధం ముగిసిపోయిందని.. ఎలాంటి భరణం, ఖర్చులు ఇవ్వాల్సిన అవసరం లేదని పిటిషనర్ తరఫు న్యాయవాది కోర్టుకు తెలిపారు. అయితే, హిందూ వివాహ చట్టంలోని సెక్షన్ 25 ప్రకారం ఎప్పుడైనా భరణం కోరుతూ పిటిషన్ వేయవచ్చన్నారు భర్త తరఫు న్యాయవాది రాజేశ్ మెవారా. ఇరు పక్షాల వాదనలు విన్న కోర్టు.. భర్తకు భార్య భరణం ఇవ్వాలని తీర్పు వెల్లడించింది.
సివిల్ కోర్టులో వాదనలు, సమర్పించిన డాక్యుమెంట్లు, గతంలో సుప్రీం కోర్టు ఇచ్చిన తీర్పును పరిశీలించిన హైకోర్టు.. సివిల్ కోర్టు ఇచ్చిన తీర్పును సమర్థించింది. భర్తకు భరణం ఇవ్వాల్సిందేనని స్పష్టం చేసింది.
ఇదీ చూడండి: కేంద్రం కీలక నిర్ణయం.. ఆ రాష్ట్రాల్లో కేంద్ర బలగాల పరిధి కుదింపు
