Rohit Sharma on Virat Kohli: టీమ్ఇండియా పరిమిత ఓవర్ల కెప్టెన్గా జట్టును విరాట్ కోహ్లీ ముందుండి నడిపించాడని అన్నాడు ప్రస్తుత వైట్బాల్ సారథి రోహిత్ శర్మ. కోహ్లీ నేతృత్వంలో ఆడిన ప్రతిక్షణాన్ని ఆస్వాదించినట్లు చెప్పాడు.
"ఐదేళ్లు జట్టుకు విరాట్ నాయకత్వం వహించాడు. బరిలో దిగిన ప్రతిసారీ ముందుండి నడిపించాడు. ప్రతి గేమ్ను గెలవాలనే పట్టుదల, స్ఫూర్తిని అందరిలో నింపేవాడు. అతడి సారథ్యంలో ఆడిన ప్రతిక్షణాన్ని ఆస్వాదించాను. ఇకపైనా ఆస్వాదిస్తాను."
-రోహిత్ శర్మ, టీమ్ఇండియా కెప్టెన్
టీ20 ప్రపంచకప్ ముగింపుతో టీ20 కెప్టెన్గా కోహ్లీ తప్పుకున్న తర్వాత ఆ బాధ్యతలను రోహిత్ అందుకున్నాడు. ఇటీవలే వన్డే సారథిగానూ రోహిత్నే ఎంపిక చేసింది బీసీసీఐ.
2013 నుంచి టీమ్ఇండియా ఒక్క ఐసీసీ ట్రోఫీ కూడా గెలవలేకపోవడంపై రోహిత్ స్పందించాడు. "తుది ఫలితాన్ని గురించి ఆలోచించడానికి ముందు చాలా విషయాలను సరైన పద్ధతిలో చేయాలి. 2013లో చివరి సారి ఐసీసీ ట్రోఫీ (ఛాంపియన్స్ ట్రోఫీ) సాధించాం. అప్పటి నుంచి మేము చేసిన తప్పు కూడా ఏమీ లేదు. బాగా ఆడినా.. ఫలితం దక్కలేదు." అని రోహిత్ చెప్పాడు.
ఇదీ చూడండి: కెప్టెన్సీ బాధ్యతలు చేపట్టాక తొలిసారిగా మాట్లాడిన రోహిత్
