ఐపీఎల్లో సీజన్ 16లో భాగంగా చెన్నై సూపర్ కింగ్స్ 10వ సారి ఐపీఎల్ ఫైనల్లోకి అడుగుపెట్టింది. 2021 సీజన్లో ఛాంపియన్‌గా నిలిచిన ఈ జట్టు.. మే 28న జరగనున్న ఫైనల్స్లో ఆడనుంది. మే 23న చెన్నైలోని చెపాక్ స్టేడియంలో జరిగిన క్వాలిఫయర్ 1 మ్యాచ్లో.. గుజరాత్ టైటాన్స్పై అనూహ్యంగా గెలిచింది. 20 ఓవర్లలో ఏడు వికెట్ల నష్టానికి 172 పరుగులు చేయగా.. గుజరాత్ టైటాన్స్ 157 పరుగులకే ఆలౌట్ అయింది. దీంతో 15 పరుగుల తేడాతో చెన్నై టీమ్ గెలుపును ముద్దాడింది. అయితే ఈ మ్యాచ్లో జరిగిన ఓ ఘటన వల్ల ఇప్పుడు ధోనీ బ్యాన్ అయ్యే ప్రమాదం ఉందట. ఇంతకీ ఏం జరిగిందంటే..
ఇన్నింగ్స్ చివరి దశలో మతీశా పతిరాణాను బౌలింగ్ వేయడానికి అంపైర్లు అంగీకరించలేదు. బౌలింగ్ చేయడానికి బంతిని అందుకున్న ఈ శ్రీలంక బౌలర్ను ఆన్ ఫీల్డ్ అంపైర్లు క్రిస్ గఫానీ, అనిల్ చౌదరి మూకుమ్మడిగా ఆపారు. అతడు తొమ్మిది నిమిషాల పాటు గ్రౌండ్లో లేడు. విశ్రాంతి తీసుకుని.. బౌలింగ్ చేసేందుకు రావడమే దీనికి కారణమైంది. అందుకు ఆగ్రహించిన ధోనీ ఈ విషయంపై అంపైర్లతో వాగ్వాదానికి దిగాడు. దాదుపు ఐదు నిమిషాల పాటు అంపైర్లతో ధోనీ చర్చలు జరిగాయి.
అయితే కావాలనే.. ధోనీ ఇలా అంపైర్ల విలువైన సమయాన్ని వృథా చేశాడని ఆరోపణలు వస్తున్నాయి. ఈ విషయంపై ఐపీఎల్ గవర్నింగ్ కౌన్సిల్ సైతం ఆరా తీస్తోందని సమాచారం. అయితే ఒకవేళ ధోనీ నిజంగా ఈ తప్పు చేసినట్టుగా తేలితే అతనిపై చర్యలు తీసుకునే అవకాశాలు ఎక్కువగా ఉన్నాయన్న అభిప్రాయాలు సైతం వ్యక్తమవుతున్నాయి. దీంతో ఐపీఎల్ కోడ్ ఆఫ్ కండక్ట్ ప్రకారం.. ధోనీపై ఓ మ్యాచ్ నిషేధం విధించే ఛాన్స్ ఉందని టాక్. అయితే ఆ మ్యాచ్ ఆ మ్యాచ్ ఫైనల్ కానుంది.
అయితే బౌలర్ మాత్రం విశ్రాంతి తీసుకుని వచ్చినట్టుగా సమాచారం. ఐపీఎల్ నియమావళిలోని 14.2.3 నిబంధన ప్రకారం.. ఓ ప్లేయర్ మ్యాచ్ జరిగే సమయంలో ఎనిమిది నిమిషాలకు పైగా గ్రౌండ్లో లేకపోతే అతనిపై చర్యలు తీసుకునే అవకాశం అంపైర్లకు ఉంది. అంత సేపు.. అతడు మ్యాచ్లో అందుబాటులో లేకుంటే..తను ఇక మ్యాచ్లో బౌలింగ్, బ్యాటింగ్ చేసేందుకు వీలుండదు. ఇదే విషయాన్ని అంపైర్లు వివరించినట్టుగా తెలుస్తోంది. అందుకనే మతీశాను.. అంపైర్లు బౌలింగ్ను అంగీకరించలేదు. దీంతో ధోనీ వచ్చి మాట్లాడాల్సి వచ్చింది.
ఇక ఇదే విషయంపై కామెంటర్స్ సునీల్ గవాస్కర్, సైమన్ డౌల్ ప్రస్తావించారు. అంపైర్లతో ఐదు నిమిషాలపాటు వాదనలకు దిగడం ఏ మాత్రం మంచిది కాదంటూ అభిప్రాయపడ్డారు. సరైన సమయంలో మతీశా ప్లేసులో మరో బౌలర్ను బౌలింగ్ చేయనివ్వకుండా ధోనీ అడ్డుకున్నట్టయిందని పేర్కొన్నారు. దీనికోసం తగిన మూల్యాన్ని చెల్లించే ప్రమాదాలు ఉన్నాయని చెప్పారు.
