INDw vs AUSw : మహిళల టీ20 వరల్డ్ కప్ సెమీఫైనల్లో గురువారం ఆస్ట్రేలియాతో జరిగిన మ్యాచ్లో 5 పరుగుల తేడాతో టీమ్ఇండియా ఓటమిపాలైంది. ఆఖరు వరకు పోరాడినా.. ఫలితం దక్కలేదు. మ్యాచ్ మనదే అనుకున్న సమయంలో.. అనూహ్య పరిణామాలతో తొలి సారి ప్రపంచ కప్ ముద్దాడలనుకున్న కోరిక నెరవేరకుండానే భారత్ టోర్నీ నుంచి బయటకు వచ్చింది. అయితే ఈ అపజయానికి ప్రధాన కారణం కెప్టెన్ హర్మత్ ప్రీత్ కౌర్ రనౌట్.. హర్మన్ ఇంకా కొద్ది సేపు క్రీజులో ఉంటే టీమ్ఇండియా గెలుపు ఖాయం అయ్యేది.
మలుపు తిప్పిన రనౌట్..
వరుస ఫోర్లతో హర్మన్ ప్రీత్ కౌర్(52) ఆసీస్ బౌలర్లపై ఒత్తిడి పెంచింది. ఇది ఇలాగే కొనసాగితే విజయం టీమ్ఇండియాదే అనుకున్నారంతా. కానీ, అనూహ్యంగా హర్మన్ భారీ షాట్ ఆడబోయింది. దీంతో బంతిని ఫీల్డర్ గార్డనర్ బౌండరీ లైన్ వద్ద ఆపింది. ఈ క్రమంలో మొదటి పరుగు పూర్తి చేసుకుని.. రెండో పరుగు కోసం ప్రయత్నిస్తున్న హర్మన్.. క్రీజులోకి వెళ్లేసరికే కీపర్ హిలీ స్టంపౌట్ చేసింది. అయితే, హర్మన్ క్రీజులో బ్యాట్ పెట్టలేదు. దీంతో ధర్డ్ అంపైర్ రనౌట్ ఇచ్చాడు. ఇక అక్కడి నుంచి మ్యాచ్ మలుపు తిరిగింది. ఆ తర్వాత వచ్చిన రిచా ఘోష్(14) కూడా వెంటనే ఔట్ అయింది. అనంతరం వచ్చిన దీప్తి శర్మ(20*) ఫర్వాలేదనిపించినా.. మిగతా వాళ్లంతా అంతగా రాణించలేకపోయారు. ఇక, ఆస్ట్రేలియా జట్టు ఫీల్డింగ్ను కట్టుదిట్టంగా చేసింది. మ్యాచ్ చివర్లో టీమ్ఇండియా ప్లేయర్లు ఎంత ట్రై చేసినా బౌండరీలు వెళ్లనీయలేదు ఆసీస్ ఫీల్డర్లు. పెర్రీ, గార్డనర్ లాంటి ప్లేయర్లు అద్భుతంగా ఫీల్డింగ్ చేసి భారత్ పరుగుల చేయకుండా కట్టిడి చేశారు.
'ఇంత కన్నా దురదృష్టం లేదు'
"నేను, జెమీమా రోడ్రిగ్స్ ముమెంటాన్ని తిరిగి పొందడానికి బ్యాటింగ్ చేశాం. కానీ, ఆ తర్వాత మ్యాచ్ కోల్పోయాం. ఈ రోజు ఇలా జరుగుతుందని మేము ఊహించలేదు. నేను అలా రనౌట్ అవ్వడం కన్నా.. దురదృష్టం మరొకటి లేదు. చివరి బంతి వరకు పోరాడాలనుకున్నాం. కానీ ఫలితం మాకు అనుకూలంగా రాలేదు. కానీ, ఈ టోర్నమెంట్లో మేము చేసిన ప్రదర్శన నాకు సంతోషాన్ని కలిగించింది. ఓపెనర్లు వికెట్ కోల్పోయినా.. మాకు మంచి బ్యాటింగ్ లైనప్ ఉంది. ఇక, ఈరోజు అద్భుత ప్రదర్శన చేసిన జెమీమాకు మనం క్రెడిట్ ఇవ్వాలి. మేము అనుకున్న ముమెంటాన్ని ఆమె మాకు ఇచ్చింది. అలాంటి ప్రదర్శన చూడటం చాలా ఆనందంగా ఉంది. అయితే మేము మా శక్తి మేరకు ఆడకపోయినా.. సెమీస్ వరకు చేరుకున్నాం. ఈ మ్యాచ్లో సులభమైన క్యాచ్లను విడిచిపెట్టాము. కానీ, మీరు గెలవాలనుకున్నప్పుడు అలాంటి క్యాచ్లు మిస్ చేయకూడదు. మేము ఈ తప్పులను నుంచి గుణపాఠాలను నేర్చుకుంటాం. మళ్లీ ఆ తప్పులు పునరావృతం చేయకుండా ఉంటాం" అని హర్మన్ ప్రీత్ కౌర్ మ్యాచ్ అనంతరం చెప్పుకొచ్చింది.
టాస్ గెలిచి బ్యాటింగ్ ఎంచుకున్న ఆస్ట్రేలియా.. నిర్ణీత 20 ఓవర్లలో 4 వికెట్ల నష్టానికి 172 పరుగులు చేసింది. బెత్ మూనీ (54), లానింగ్(49*) రాణించారు. హీలీ(25), గార్డనర్(31) ఫర్వాలేదనిపించారు. టీమ్ఇండియా బౌలర్లు శిఖా పాండే(2) వికెట్లు తీయగా.. దీప్తి శర్మ, రాధా యాదవ్ చెరో వికెట్ పడగొట్టారు. అనంతరం బ్యాటింగ్కు దిగిన భారత్.. 20 ఓవర్లలో 8 వికెట్ల నష్టానికి 167 పరుగులు చేయగలిగింది. కెప్టెన్ హర్మన్ప్రీత్ సింగ్(52) హాఫ్ సెంచరీతో అద్భుత ప్రదర్శన చేసింది. జెమీమా రోడ్రిగ్స్(43) రాణించింది.
