కామన్వెల్త్​లో భారత్​ జోరు.. పసిడి పట్టేసిన జెరెమీ, అచింత.. ఫైనల్లోకి శ్రీహరి

Common Wealth Games 2022: కామన్వెల్త్‌ క్రీడల వెయిట్‌లిఫ్టింగ్‌లో భారత జోరు కొనసాగుతోంది. తాజాగా వెయిట్‌లిఫ్టింగ్‌లో భారత్‌ ఖాతాలో మరో స్వర్ణం చేరింది. పురుషుల 73 కేజీల ఫైనల్లో అచింత షూలి పసిడి సాధించాడు. ఆదివారం అర్ధరాత్రి దాటిన తర్వాత ముగిసిన ఈ పోటీలో ఆరంభం నుంచి స్థిరంగా బరువులు ఎత్తిన 20 ఏళ్ల ఈ బెంగాల్‌ లిఫ్టర్‌ ప్రత్యర్థుల నుంచి పోటీ ఎదురైనా వారిని వెనక్కి నెట్టి పతకాన్ని సొంతం చేసుకున్నాడు. స్నాచ్‌ తొలి ప్రయత్నంలోనే 137 కేజీల బరువు లిఫ్ట్‌ చేసిన అచింత.. ఆ తర్వాత రెండో ప్రయత్నంలో 140 కేజీలు.. మూడో ప్రయత్నంలో 143 ఎత్తి గేమ్స్‌ రికార్డును సృష్టిస్తూ అగ్రస్థానంలో నిలిచాడు.

అచింత

పసిడి పట్టేసిన 19 ఏళ్ల యువ జవాన్​.. అంతకుముందు ఆదివారం 19 ఏళ్ల కుర్రాడు జెరెమీ లాల్రినుంగా దేశానికి రెండో పసిడి అందించగా.. బింద్యారాణి రజతం సొంతం చేసుకుంది. ఆదివారం పురుషుల 67 కేజీల విభాగంలో జెరెమీ పూర్తి ఆధిపత్యం చలాయించి ఛాంపియన్‌గా నిలిచాడు. మొత్తం 300 కేజీల బరువెత్తి సరికొత్త కామన్వెల్త్‌ క్రీడల రికార్డునూ సృష్టించాడు. స్నాచ్‌లో 140 కేజీలెత్తి ఆ విభాగంలోనూ కామన్వెల్త్‌ రికార్డు నెలకొల్పిన అతను.. క్లీన్‌ అండ్‌ జర్క్‌లో ఉత్తమంగా 160 కేజీల ప్రదర్శన చేశాడు. పతక అంచనాలతో బరిలో దిగిన ఈ ఐజ్వాల్‌ కుర్రాడు స్నాచ్‌లో తొలి ప్రయత్నంలోనే 136 కేజీలెత్తి అగ్రస్థానంలోకి దూసుకెళ్లాడు. రెండో ప్రయత్నంలో విజయవంతంగా 140 కేజీలెత్తాడు.

మూడో ప్రయత్నంలో (143 కేజీలు) విఫలమైనా.. అప్పటికే అతను తన సమీప ప్రత్యర్థి కంటే 10 కిలోల ఆధిక్యంలో నిలిచాడు. ఇక క్లీన్‌ అండ్‌ జర్క్‌లో మొదట 154 కిలోలెత్తిన అతను వెంటనే తొడ, పిక్క కండరాల నొప్పితో బాధపడ్డాడు. ఇబ్బంది పడుతూనే రెండో ప్రయత్నంలో 160 కేజీల ప్రదర్శనతో స్వర్ణం ఖాయం చేశాడు. చివరి ప్రయత్నంలో (165 కేజీలు) మోచేతి గాయంతో విఫలమయ్యాడు. వైపావా నెవో (293 కేజీలు, సమోవా), జోసెఫ్‌ (290 కేజీలు, నైజీరియా) వరుసగా రజత, కాంస్య పతకాలు దక్కించుకున్నారు.

జెరెమీ

రజతం అందించిన బింద్యారాణి.. శనివారం అర్ధరాత్రి దాటిన తర్వాత జరిగిన మహిళల 55 కిలోల విభాగం పోటీలో బింద్యారాణి దేవి కేవలం ఒక్క కిలో తేడాతో రెండో స్థానానికి పరిమితమైంది. 202 కేజీల ప్రదర్శనతో వెండి పతకం కైవసం చేసుకుంది. కామన్వెల్త్‌ క్రీడల రికార్డుతో అదిజాత్‌ అదెనిక్‌ (203 కేజీలు, నైజీరియా) స్వర్ణం, స్థానిక క్రీడాకారిణి ఫ్రేయర్‌ మోరో (198 కేజీలు) కాంస్యం గెలిచారు. స్నాచ్‌లో మూడో ప్రయత్నంలో (తొలి రెండు ప్రయత్నాల్లో వరుసగా 81, 84) 86 కేజీల బరువెత్తి తన వ్యక్తిగత ఉత్తమ ప్రదర్శన నమోదు చేసిన బింద్యారాణి ఆ విభాగం ముగిసే సరికి మూడో స్థానంలో నిలిచింది. క్లీన్‌ అండ్‌ జర్క్‌లో తొలి ప్రయత్నంలో 110 కేజీలెత్తిన ఆమె.. రెండో ప్రయత్నం (114)లో విఫలమైంది.

తిరిగి బలంగా పుంజుకున్న ఆమె మూడో ప్రయత్నంలో 116 కేజీలెత్తి ఆ విభాగంలో కామన్వెల్త్‌ క్రీడల రికార్డు సృష్టించి రెండో స్థానంలో నిలిచింది. మరోవైపు మహిళల 59 కేజీల విభాగంలో హజరిక 183 కేజీల ప్రదర్శనతో ఏడో స్థానంలో నిలిచింది. స్నాచ్‌లో తొలి ప్రయత్నంలో 81 కేజీలు ఎత్తిన ఆమె.. తర్వాతి రెండు సార్లు (84, 86 కేజీలు) విఫలమైంది. క్లీన్‌ అండ్‌ జర్క్‌లో కేవలం రెండో ప్రయత్నం (102 కేజీలు)లో మాత్రమే ఆమె సఫలమైంది. ఇప్పటికే వెయిట్‌లిఫ్టింగ్‌లో మీరాబాయి చాను స్వర్ణం, సంకేత్‌ రజతం, గురురాజ కాంస్యం నెగ్గిన సంగతి తెలిసిందే.

అమ్మయిలు అదరహో..
ఓపెనర్‌ స్మృతి మంధాన (63 నాటౌట్‌; 42 బంతుల్లో 8×4, 3×6) చెలరేగడంతో కామన్వెల్త్‌ క్రీడల మహిళల క్రికెట్లో భారత జట్టు తొలి విజయం సాధించింది. తొలి మ్యాచ్‌లో ఆస్ట్రేలియా చేతిలో ఓడిన హర్మన్‌ప్రీత్‌ సేన.. రెండో పోరులో చిరకాల ప్రత్యర్థి పాకిస్థాన్‌ను 8 వికెట్ల తేడాతో చిత్తు చేసింది. దాదాపు నాలుగేళ్ల తర్వాత టీ20ల్లో పాక్‌తో తలపడిన భారత్‌.. దాయాదిపై వరుసగా అయిదో విజయంతో అదరగొట్టింది. ఉదయం ఆటకు వర్షం అంతరాయం కలిగించడంతో ఇన్నింగ్స్‌ను 18 ఓవర్లకు కుదించారు.

టాస్‌ గెలిచి తొలుత బ్యాటింగ్‌ చేసిన పాక్‌ 18 ఓవర్లలో 99 పరుగులకే కుప్పకూలింది. రేణుక సింగ్‌ (1/20), మేఘన సింగ్‌ (1/21), స్నేహ్‌ రాణా (2/15), రాధా యాదవ్‌ (2/18), షెఫాలీ వర్మ (1/8) క్రమం తప్పకుండా వికెట్లు పడగొట్టి పాక్‌ను కట్టడి చేశారు. మునీబా అలీ (32; 30 బంతుల్లో 3×4, 1×6) మాత్రమే చెప్పుకోదగ్గ స్కోరు సాధించింది. స్నేహ్‌ ఒకే ఓవర్లో బిస్మా (17), మునీబాలను ఔట్‌ చేయడంతో పాక్‌ కోలుకోలేకపోయింది. అనంతరం స్మృతి చెలరేగడంతో లక్ష్యానిన్ని భారత్‌ 11.4 ఓవర్లలో 2 వికెట్లు మాత్రమే కోల్పోయి ఛేదించింది. రెండో ఓవర్‌ తొలి బంతిని సిక్సర్‌గా మలిచిన స్మృతి అక్కడ్నుంచి వెనుదిరిగి చూడలేదు. మరో ఓపెనర్‌ షెఫాలీ వర్మ (16; 9 బంతుల్లో 2×4, 1×6)తో కలిసి స్మృతి తొలి వికెట్‌కు 61 పరుగులు జోడించింది. షెఫాలీ ఔటైనా స్మృతి జోరు తగ్గలేదు. తెలుగమ్మాయి సబ్బినేని మేఘన (14; 16 బంతుల్లో 2×4)తో కలిసి రెండో వికెట్‌కు 33 పరుగులు జతచేసిన స్మృతి.. ఫాతిమా సనా బౌలింగ్‌లో బౌండరీతో జట్టుకు విజయాన్ని అందించింది.

.

సెమీస్​లోకి బ్యాడ్మింటన్ జట్టు..
బ్యాడ్మింటన్‌లో భారత మిక్స్‌డ్‌ జట్టు దూసుకెళ్తోంది. మన బృందం పెద్దగా కష్టపడకుండానే సెమీస్‌ చేరింది. క్వార్టర్స్‌లో భారత్‌ 3-0తో దక్షిణాఫ్రికాను చిత్తు చేసింది. మిక్స్‌డ్‌ డబుల్స్‌లో అశ్విని పొన్నప్ప-సుమీత్‌రెడ్డి 2-0తో జెరార్డ్‌-జోర్డాన్‌పై గెలవగా, పురుషుల సింగిల్స్‌లో అంతే తేడాతో లక్ష్యసేన్‌ నెగ్గాడు. ఆపై మహిళల సింగిల్స్‌లో ఆకర్షి కశ్యప్‌ 2-0తో స్కోల్జ్‌పై గెలిచి భారత్‌కు విజయాన్ని అందించింది.

.

క్వార్టర్‌ఫైనల్లో బాక్సర్​ నిఖత్‌..
భారత స్టార్‌ బాక్సర్‌ నిఖత్‌ జరీన్‌ కామన్వెల్త్‌ క్రీడల్లో శుభారంభం చేసింది. మహిళల 50 కేజీల విభాగం ప్రిక్వార్టర్స్‌లో నిఖత్‌.. హెలెనా ఇస్మాయిల్‌ (మొజాంబిక్‌)ను నాకౌట్‌ చేసింది. బౌట్‌ ఆసాంతం దూకుడుగా ఆడిన నిఖత్‌.. ప్రత్యర్థిపై పంచ్‌లతో విరుచుకుపడింది. నిఖత్‌ కుడి, ఎడమ హుక్స్‌తో ఉక్కిరిబిక్కిరి అయిన హెలెన్‌.. ఆట కొనసాగించలేకపోయింది. దీంతో బౌట్‌ ముగియడానికి మరో 48 సెకన్లు ఉండగానే పోటీని ఆపేసిన రిఫరీ నిఖత్‌ను విజేతగా ప్రకటించాడు. క్వార్టర్స్‌లో టోరీ గార్టన్‌ (న్యూజిలాండ్‌)తో నిఖత్‌ పోటీపడుతుంది. ఈ మ్యాచ్‌లో గెలిస్తే ఈ తెలంగాణ అమ్మాయి పతకం ఖాయం చేసుకుంటుంది. పురుషుల విభాగంలో శివ థాపా (63.5 కేజీలు) ఇంటిముఖం పట్టాడు. అతడు 1-4తో రీస్‌ లించ్‌ (స్కాట్లాండ్‌) చేతిలో ఓడాడు.

నిఖత్​ జరీన్​

ఫైనల్లోకి స్విమ్మర్​ శ్రీహరి..
పురుషుల 50 మీటర్ల బ్యాక్‌స్ట్రోక్‌లో శ్రీహరి నటరాజ్‌ ఫైనల్లోకి ప్రవేశించాడు. సెమీఫైనల్లో 25.38 సెకన్లలో పోటీని పూర్తి చేసిన శ్రీహరి ఎనిమిదో స్థానంతో ముందంజ వేశాడు. 200 మీటర్ల బటర్‌ఫ్లై సాజన్‌ ప్రకాశ్‌ ఓవరాల్‌గా తొమ్మిదో స్థానంలో నిలిచి రిజర్వ్‌ జాబితాలో నిలిచాడు. టాప్‌-8 స్విమ్మర్లే ఫైనల్‌కు అర్హత సాధిస్తారు. వారిలో ఎవరైనా తప్పుకుంటే సాజన్‌కు అవకాశం దక్కుతుంది. జిమ్నాస్టిక్స్‌లో యోగేశ్వర్‌ సింగ్‌ ఆల్‌రౌండ్‌ ఈవెంట్లో 15వ స్థానంతో సరిపెట్టుకున్నాడు. లాన్‌బౌల్స్‌ పురుషుల పెయిర్‌లో దినేశ్‌ కుమార్‌-సునీల్‌ బహుదూర్‌ క్వార్టర్స్‌ చేరారు. భారత జంట 18-15తో జెమీ వాకర్‌-సామ్‌ జోడీపై విజయం సాధించింది.

స్మిమ్మర్​ శ్రీహరి

టీటీలో ముందంజ..
టేబుల్‌టెన్నిస్‌లో భారత పురుషుల జట్టు జోరు కొనసాగిస్తోంది. ఈ డిఫెండింగ్‌ ఛాంపియన్‌ సెమీస్‌కు దూసుకెళ్లింది. క్వార్టర్స్‌లో భారత్‌ 3-0తో బంగ్లాదేశ్‌ను చిత్తు చేసింది. డబుల్స్‌లో హర్మీత్‌-సత్యన్‌ గెలవగా, ఆ తర్వాత రెండు సింగిల్స్‌లో శరత్‌కమల్, సత్యన్‌ విజయాలు అందుకుని జట్టును సెమీస్‌ చేర్చారు. లాన్‌బౌల్స్‌ మహిళల ఫోర్స్‌ విభాగంలో భారత్‌ తొలిసారి సెమీస్‌ చేరింది. క్వార్టర్స్‌లో భారత్‌ 17-9తో నార్‌ఫ్లోక్‌ ఐలాండ్‌పై గెలిచింది. సైక్లింగ్‌లో రొనాల్డో ప్రిక్వార్టర్స్‌లో ఓడాడు. పురుషుల వ్యక్తిగత స్ప్రింట్‌లో అతడు మాథ్యూ గ్లెట్జెర్‌ (ఆస్ట్రేలియా) చేతిలో పరాజయం చవిచూశాడు. స్క్వాష్‌ సింగిల్స్‌లో జోష్న చిన్నప్ప క్వార్టర్స్‌ చేరింది. ప్రిక్వార్టర్స్‌లో జోష్న 1-3తో కైట్లిన్‌ వాట్స్‌ (ఆస్ట్రేలియా)ను ఓడించింది.

హాకీలో శుభారంభం..
భారత్‌ 11 ఘనా 0: పురుషుల హాకీలో భారత్‌ తన తొలి మ్యాచ్‌లో భారీ విజయం సాధించింది. ఏకపక్షంగా సాగిన గ్రూప్‌ పోరులో మన్‌ప్రీత్‌ సింగ్‌ బృందం 11-0 గోల్స్‌తో ఘనాను చిత్తుగా ఓడించింది. దూకుడైన ఆటతో పసికూన ఘనాను వణికించిన భారత్‌..తొలి క్వార్టర్‌లో 3, రెండో క్వార్టర్‌లో 2, మూడో క్వార్టర్‌లో 4, చివరి క్వార్టర్‌లో 2 గోల్స్‌ చేసింది. హర్మన్‌ప్రీత్‌సింగ్‌ (10, 36, 54 ని.) హ్యాట్రిక్‌ కొట్టగా.. జుగ్‌రాజ్‌ సింగ్‌ (22, 45 ని) రెండు గోల్స్‌ చేశాడు. అభిషేక్‌ (2వ) మన్‌దీప్‌ (48వ), నీలకంఠ (39వ), షంషేర్‌ (14వ), వరుణ్‌ కుమార్‌ (40వ), ఆకాశ్‌దీప్‌ సింగ్‌ (20వ) తలో గోల్‌ చేశారు. సోమవారం ఆతిథ్య ఇంగ్లాండ్‌తో భారత్‌ తలపడనుంది.

.

కామన్వెల్త్‌లో ఈనాడు.. భారత పోటీలు

• వెయిట్‌లిఫ్టింగ్‌ (పతక ఈవెంట్‌): అజయ్‌ సింగ్, పురుషులు 81 కేజీలు (మ.2 నుంచి), హర్జిందర్‌ కౌర్‌ (రా.11 నుంచి)
• బాక్సింగ్‌: అమిత్‌ ఫంగాల్‌ × బెర్రీ (సా.4.45 నుంచి), మహ్మద్‌ హుసాముద్దీన్‌ × సలీమ్‌ (సా.6 నుంచి), ఆశిష్‌ కుమార్‌ × ట్రావిస్‌ (రా.1 నుంచి)
• హాకీ (పురుషులు): భారత్‌ × ఇంగ్లాండ్‌ (రా.8.30 నుంచి)
• బ్యాడ్మింటన్‌: మిక్స్‌డ్‌ టీమ్‌ సెమీఫైనల్‌ (మ.3.30 నుంచి)
• టేబుల్‌ టెన్నిస్‌ (పురుషులు): భారత్‌ × నైజీరియా సెమీఫైనల్స్‌ (రా.9 నుంచి)
• లాన్‌బౌల్స్‌: మహిళల ఫోర్‌ సెమీఫైనల్స్‌ (మ.1 నుంచి)
• జూడో: విజయ్, జస్లీన్‌ సైని, సుశీల దేవి (మ.2.30 నుంచి)

ఇవీ చదవండి: మహిళల జట్టు ఆల్​రౌండ్ షో.. పాకిస్థాన్​ చిత్తు.. సెమీస్​ ఆశలు సజీవం