అంతరిక్షంలోకి 2015లో ప్రయోగించిన ఓ రాకెట్ కంట్రోల్ తప్పింది. అస్తవ్యస్తంగా పరిభ్రమిస్తూ మరికొద్ది వారాల్లో చంద్రుడిని ఢీకొట్టనుంది. నియంత్రణ కోల్పోయిన ఆ రాకెట్ జాబిల్లివైపు వేగంగా దూసుకెళ్తున్నట్లు తెలిపారు ఖగోళ శాస్త్రవేత్త, ఆస్ట్రేలియాలోని ఫ్లిండర్స్ వర్సిటీలోని ఆర్కియాలజీ, స్పేస్ స్టడీస్ అసోసియేట్ ప్రొఫెసర్ అలిస్ గోర్మాన్. ప్రస్తుతం పర్యావరణ పరిస్థితులను పర్యవేక్షిస్తున్న స్పేస్ఎక్స్ ఫాల్కన్-9 రాకెట్కు పైభాగాన ఈ రాకెట్ ఉందని.. భూమి, చంద్రుడి చుట్టూ ఇష్టమొచ్చినట్లు తిరగుతున్నట్లు తెలిపారు.
ఈ 4 టన్నుల బూస్టర్ రాకెట్ను ప్రయోగించిన నాటి నుంచి గ్రహశకలాలను పర్యవేక్షించే 'బిల్ గ్రే' దానిని నిశితంగా పరిశీలిస్తోంది.
అదుపు తప్పిన బూస్టర్ రాకెట్ మార్చి 4న చంద్రుడిని ఢీకొట్టనుందని ఆర్బిట్ ట్రాకింగ్ సాఫ్ట్వేర్ బిల్ గ్రే అంచనా వేసినట్లు పేర్కొన్నారు గోర్మాన్. ప్రస్తుతం గంటకు 9 వేల కిలోమీటర్ల వేగంతో దూసుకెళ్తున్నట్లు చెప్పారు. ఈ రాకెట్ చంద్రుడి వైపునకు వెళ్తున్న క్రమంలో ఇష్టమొచ్చినట్లు కదులుతున్నందున.. అది ఏ సమయానికి, ఏ ప్రాంతంలో కూలిపోతుందనేది కచ్చితంగా అంచనా వేయలేకపోతున్నట్లు పేర్కొన్నారు. అయితే.. చంద్రుడి చీకటి భాగంలో ఢీకొట్టే అవకాశం ఉందని, భూమిపై నుంచి కనిపించదని తెలిపారు.
మరోవైపు.. ఈ రాకెట్ చంద్రుడిని ఢీకొట్టటం పెద్ద విషయమేమీ కాదని పేర్కొన్నారు పలువురు ఖగోళ శాస్త్రవేత్తలు. అయితే, ఒక అంతరిక్ష పురావస్తు శాస్త్రవేత్తగా.. తనకు ఎంతో ఉత్సాహాన్ని ఇస్తోందన్నారు అలిస్ గోర్మాన్. ఈ రాకెట్ చంద్రుడి చీకటి భాగంలో ఢీకొట్టటం వల్ల ఓ బిలం ఏర్పడుతుందన్నారు.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: ఇలలో చైనా చందమామ- ఎన్ని ఉపయోగాలో..!
