కరడు గట్టిన ఉగ్రసంస్థ ఇస్లామిక్ స్టేట్ అధిపతి అబు బాకర్ అల్ బాగ్దాదీని చివరి వరకు వెంటాడి.. వేటాడిన వీర శునకం గుర్తుందా? ఆ జాగిలం త్వరలో శ్వేతసౌధాన్ని సందర్శించనున్నట్లు అమెరికా అధ్యక్షుడు డొనాల్డ్ ట్రంప్ తెలిపారు. బుధవారం లూసియానాలో జరిగిన ర్యాలీ సందర్భంగా ఈ విషయాన్ని వెల్లడించారు ట్రంప్.
"గొప్ప హీరో అయిన 'కోనన్' త్వరలో వైట్హౌస్ను సందర్శిస్తుంది" అని తెలిపారు అధ్యక్షుడు. శునకాన్ని త్వరగా తీసుకురమ్మని అధికారులను అడిగినప్పుడు.. 'కోనన్' మరో ఆపరేషన్లో పాల్గొననున్నట్లు తెలిపారని ట్రంప్ పేర్కొన్నారు. జాగిలాన్ని రెండు రోజులు విశ్రాంతి తీసుకున్న తర్వాతే శ్వేతసౌధానికి తీసుకురమ్మని ఆదేశించినట్లు స్పష్టం చేశారు.
స్పెషల్ ఆపరేషన్స్ కమాండ్ (ఎస్ఓసీఓఎమ్) కెనైన్ ప్రోగ్రాంలో 'కోనన్' నాలుగేళ్ల పాటు శిక్షణ పొందినట్లు అమెరికా సెంట్రల్ కమాండర్ జనరల్ కెన్నెత్ మెకెంజీ తెలిపారు. శిక్షణ తర్వాత ఇప్పటి వరకు దాదాపు 50 ప్రత్యేక ఆపరేషన్లలో 'కోనన్' పాల్గొన్నట్లు వెల్లడించారు. ఉగ్రవాది ఆల్ బాగ్దాదీ సొరంగంలో ఆత్మాహుతి దాడి చేసుకున్నప్పుడు ఆ పేలుడులో జాగిలానికి గాయాలయ్యాయని మెకెంజీ గుర్తుచేశారు.
ఇదీ చూడండి:మీకు ఎక్కువకాలం బతకాలని ఉందా?
