ఉత్తర్ప్రదేశ్లో గత నెలలో జరిగిన ఇంటర్ పరీక్షలు ఫలితాలను రాష్ట్ర ప్రభుత్వం.. మంగళవారం విడుదల చేసింది. రాష్ట్రవ్యాప్తంగా పరీక్షలు రాసిన లక్షలాది మంది విద్యార్థులు ఉత్తీర్ణులయ్యారు. తమ కుటుంబసభ్యులతో కలిసి వారెంతో ఆనందంగా గడుపుతున్నారు. అయితే, 59 ఏళ్ల వయసులో పరీక్షలు రాసిన మాజీ మంత్రి ప్రభుదయాల్ వాల్మీకి సైతం ఉత్తీర్ణులయ్యారు. బరేలీ బీజేపీ మాజీ ఎమ్మెల్యే రాజేశ్ మిశ్ర సైతం అన్ని సబ్జెక్ట్ల్లో పాసయ్యారు. మరోవైపు, ఓ విద్యార్థిని మాత్రం అన్ని సబ్జెక్టుల్లో కలిపి 402 మార్కులు సాధించినా.. ఫెయిల్ అయినట్లు రిజల్ట్ వచ్చింది.
టైమ్ ఉంటే ఉన్నత చదువులు చదువుతా..
మీరఠ్ జిల్లాలోని హస్తినపుర్ ఎమ్మెల్యేగా రెండు సార్లు గెలిచి, మంత్రిగా సేవలందించిన ప్రభుదయాల్ వాల్మీకి.. 59 ఏళ్ల వయసులో ఎంతో ఉత్సాహంగా ఈ ఏడాది పరీక్షలు రాశారు. సెకెండ్ క్లాస్లో ఉత్తీర్ణులయ్యారు. అనంతరం ఆయన ఈటీవీ భారత్తో మాట్లాడారు. అంబేడ్కర్ మాటలను స్ఫూర్తిగా తీసుకుని పరీక్షలు రాసినట్లు ఆయన తెలిపారు. విద్యార్థి దశలో తనకు అనేక సమస్యలు ఎదురయ్యాయని, అందుకే అప్పుడు చదువుకోలేదని అన్నారు. మనసులో బలమైన కోరిక ఉంటే.. ఏ లక్ష్యాన్నైనా సాధించవచ్చని తెలిపారు. సమయం ఉంటే మరిన్ని ఉన్నత కోర్సులు చదువుతానని స్పష్టం చేశారు. కానీ ఇంటర్లో ఎన్ని మార్కులు వచ్చాయనేది చెప్పేందుకు ఆయన నిరాకరించారు.
మీరఠ్ జిల్లాలో రాజకీయాల్లో ప్రభుదయాల్ కీలక పాత్ర పోషించారు. వెస్ట్ యూపీలోని వాల్మీకి సమాజ్‌కు చెందిన ప్రముఖ నాయకుడిగా ఆయనకు ప్రత్యేక గుర్తింపు ఉంది. ప్రభుదయాళ్ చాలా కాలంగా సమాజ్వాదీ పార్టీ(ఎస్పీ) తరఫున యాక్టివ్‌గా ఉన్నారు. 2017లో ఎస్పీ టికెట్పై పోటీ చేసి బీజేపీ అభ్యర్థి దినేశ్‌ ఖటిక్‌ చేతిలో ఓడిపోయారు. ఆ తర్వాత 2022లో మళ్లీ ఆయనకు టికెట్ దక్కలేదు.
సెకెండ్ క్లాస్లో మాజీ ఎమ్మెల్యే పాస్.. లాయర్ అవ్వడమే టార్గెట్
బరేలీ బీజేపీ మాజీ ఎమ్మెల్యే రాజేశ్ మిశ్ర అలియాస్ పప్పు భరతోల్ సైతం ఇంటర్ పరీక్షల్లో ఉత్తీర్ణులయ్యారు. సెకండ్ క్లాస్లో పాసైన రాజేశ్ మిశ్ర.. తన కార్యకర్తలకు స్వీట్లు పంచారు. అయితే తనకు మూడు సబ్జెక్టుల్లో తక్కువ మార్కులు వచ్చాయని.. రీకౌంటింగ్ కోసం దరఖాస్తు చేస్తానని ఆయన తెలిపారు.
బరేలీలోని బిత్రీ చైన్‌పుర్ నుంచి గెలుపొందిన రాజేశ్ మిశ్ర.. తన చదువు కొనసాగిస్తానని చెప్పారు. ఎల్ఎల్బీ చేసి పేదలకు సహాయం చేయడమే తన లక్ష్యమని తెలిపారు. ప్రజల సమస్యలు వింటూ.. చదువుకు సమయం కేటాయించి.. కష్టపడి ఉత్తీర్ణత సాధించినట్లు తెలిపారు. ఇంటర్మీడియట్లో ఉత్తీర్ణత సాధించిన రాజేశ్.. పరీక్షలను విజయవంతంగా నిర్వహించినందుకు ఆ రాష్ట్ర ముఖ్యమంత్రి యోగి ఆదిత్యనాథ్‌ను ప్రశంసించారు.
402 మార్కులు.. అయినా ఫెయిల్!
అయితే అమేఠీకి చెందిన విద్యార్థినికి మాత్రం ఇంటర్ బోర్డ్ షాక్ ఇచ్చింది. బోర్డు నిర్లక్ష్యం వల్ల ఆమె భవిష్యత్తు.. ప్రమాదంలో పడింది! అన్ని సబ్జెక్టులు కలిపి 402 మార్కులు తెచ్చుకున్న ఆ విద్యార్థిని ఫెయిలైనట్లు రిజల్ట్ వచ్చింది. దీంతో తనకు న్యాయం చేయాలంటూ ఆ బాధిత విద్యార్థిని.. ముఖ్యమంత్రికి విన్నవించింది.
అమేఠీలోని శ్రీ శివ ప్రతాప్ ఇంటర్ కాలేజ్‌లో చదువుకున్న బాధిత విద్యార్థిని అన్ని పరీక్షలు చక్కగా రాసింది. 402 మార్కులు తెచ్చుకుంది. కానీ ఫలితాల్లో మాత్రం ఫెయిల్ అయినట్లు వచ్చింది. అయితే ప్రాక్టికల్స్లో ఆమె సాధించిన 180 మార్కులకు బదులుగా 18 మార్కులు మాత్రమే యాడ్ అయ్యియి. 402 మార్కులకు ప్రాక్టికల్స్లో వచ్చిన 180 (18కి బదులు) మార్కులను కలిపితే మొత్తం 564 అవుతాయి. దీంతో ఆమెకు 94 శాతం మార్కులు వచ్చినట్లు అవుతుంది.
ఈ విషయంపై ఆ కాలేజ్ ప్రిన్సిపల్ నవల్ కిషోర్ స్పందించారు. "ఆమెకు ప్రాక్టికల్స్లో ఒక్కో సబ్జెక్టులో 30 మార్కులు వచ్చాయి. సాంకేతిక తప్పిదాల వల్ల 30 మార్కులకు బదులుగా మూడు మార్కులు అని రిజల్ట్లో వచ్చింది. ప్రాక్టికల్ మార్కులు 180కు బదులు 18 యాడ్ అవ్వడం వల్ల ఆమె ఫెయిల్ అయినట్లు వచ్చింది. ఇలా చాలా మంది విద్యార్థులకు జరిగింది" అని చెప్పారు.
