Bride Wedding Infront Deceased Father: సాధారణంగా కుటుంబ సభ్యుల్లో ఎవరైనా చనిపోతే.. వారి జ్ఞాపకాలతో కాలం గడిపేస్తాం. ఏదైనా శుభకార్యాలు జరిగిన సమయంలో మాత్రం వారిలేని లోటు స్పష్టంగా కనిపిస్తుంది. అయితే.. ఇటీవల కాలంలో చాలా మంది తమ కుటుంబసభ్యుల్లో చనిపోయిన వారి లోటు కనిపించకుండా మైనపు విగ్రహాలు తయారు చేయించుకుని శుభకార్యాలను జరుపుకుంటున్నారు. తాజాగా తమిళనాడులోనూ అదే జరిగింది.
ఈ అరుదైన సన్నివేశం కళ్లాక్కురిచి జిల్లా తిరుకోయిలూరు సమీపంలో థానకనందల్ గ్రామంలో జరిగింది. అదే జిల్లాకు చెందిన మహేశ్వరి తండ్రి సెల్వరాజ్.. అనారోగ్య కారణాలతో గతేడాది మార్చి 3న మరణించాడు. ఆ తర్వాత మహేశ్వరికి జయరాజ్ అనే వ్యక్తితో పెళ్లి కుదిరింది. నాన్నంటే ఎంతో ఇష్టం ఉన్న మహేశ్వరి.. తన తండ్రి సమక్షంలోనే పెళ్లి చేసుకోవాలనుకుంది.
కుమార్తె పెళ్లి తన తండ్రి సమక్షంలోనే చేయాలని నిర్ణయించుకున్న సెల్వరాజ్ భార్య.. రూ.5 లక్షల ఖర్చుతో భర్త మైనపు విగ్రహం తయారు చేయించింది. అర్చకుల వేదమంత్రాల నడుమ తండ్రి మైనపు విగ్రహం ముందే మహేశ్వరి కల్యాణమహోత్సవం ఘనంగా జరిగింది. అనంతరం మహేశ్వరి తన తండ్రి సెల్వరాజ్ మైనపు విగ్రహాన్ని చూసి బోరున విలపించింది. ఇది చూసి కల్యాణమండపానికి వచ్చిన బంధువులు భావోద్వేగానికి గురయ్యారు. అచ్చం జీవం ఉన్న మనిషిని పోలిన మైనపు విగ్రహాన్ని చూసిన బంధువులు, అతిథులు ఆశ్చర్యపోయారు. కుటుంబసమేతంగా వివాహ వేడుకల్లో ఫొటోలు కూడా దిగారు.
ఇవీ చదవండి: పెద్దలసభకు 41 మంది ఏకగ్రీవం.. జాబితాలో చిదంబరం, సిబల్
