వివాహేతర సంబంధం ఉన్న కారణంతో ఓ ఆదివాసీ మహిళపై అమానవీయంగా దాడి చేశారు గ్రామస్థులు. భర్తను మహిళ భుజాలపై ఊరేగించిన జనం.. అనంతరం ఆమెకు, ప్రియుడికి చెప్పులదండ వేసి చితకబాదారు. ఈ క్రమంలో బాధితురాలిని వివస్త్రను చేశారు స్థానికులు. ఈ ఘటన మధ్యప్రదేశ్లోని దేవాస్ జిల్లా బోర్పాడవ్ గ్రామంలో ఆదివారం జరిగింది.
ఇదీ జరిగింది: బాధితురాలు అదే గ్రామానికి చెందిన హరీ సింగ్ అనే వ్యక్తితో వివాహేతర సంబంధం కొనసాగిస్తోంది. అయితే గత నెల 24న ఆమె ఇంటి నుంచి పరారై గుట్టుగా ప్రియుడి ఇంట్లో నివసిస్తోంది. భార్య కనిపించకపోవడంపై పోలీసులకు ఫిర్యాదు చేసిన భర్త మంగీలాల్.. గ్రామంలో కూడా ఆమె కోసం వెతికాడు. అనుమానం వచ్చి హరీ సింగ్ ఇంటికి వచ్చిన మంగీలాల్.. ఓ గదిలో తలదాచుకుంటున్న భార్యను చూశాడు. ఈ విషయం గ్రామస్థులకు తెలిసింది. ఆగ్రహం వ్యక్తం చేసిన స్థానికులు వారిని చితకబాదారు. బాధితురాలిని వివస్త్రను చేసిన దాడి చేశారు. హరీ సింగ్ ఫిర్యాదు మేరకు పోలీసులు.. బాధితులపై దాడి చేసిన 11 మందిపై కేసు నమోదు చేశారు. తొమ్మిది మందిని అరెస్ట్ చేశారు. ఈ కేసుపై సమగ్ర దర్యాప్తు చేపడతామని వెల్లడించారు.
చెల్లిపై అత్యాచారం: చెల్లిని కంటికి రెప్పలా కాపాడాల్సిన అన్ననే పశువులా ప్రవర్తించాడు. ఓ 13 ఏళ్ల బాలికపై సొంత అన్ననే అత్యాచారానికి పాల్పడ్డాడు. ఈ దారుణం కేరళలోని పాలక్కడ్లో జరిగింది. బాలిక గతనెల బిడ్డకు జన్మనివ్వడం వల్ల అసలు విషయం బయటపడింది. తల్లిదండ్రుల ఫిర్యాదు మేరకు పోలీసులు దర్యాప్తు చేపట్టగా.. ఈ దారుణానికి ఒడిగట్టింది సోదరుడే అని తెలిసింది. నిందితుడిని అదుపులోకి తీసుకున్నారు. భయంతోనే బాధితురాలు ఇన్నాళ్లు విషయాన్ని దాచిందని పోలీసులు తెలిపారు.
మైనర్పై అత్యాచారం: 15 ఏళ్ల బాలికపై ఓ మైనర్ అత్యాచారానికి పాల్పడ్డాడు. రాజస్థాన్లోని జోధ్పుర్లో జరిగిన ఘటన ఆలస్యంగా వెలుగులోకి వచ్చింది. బాధితురాలు గర్భం దాల్చగా తల్లిదండ్రులకు ఈ విషయం తెలిసింది. నిందితుడు బాధితురాలికి వరుసకు సోదరుడు అవుతాడని.. ప్రస్తుతం అతడు తమ అదుపులో ఉన్నట్లు పోలీసులు వెల్లడించారు.
ఆరేళ్ల బాలికపై..: ఈశాన్య దిల్లీలో మరో అమానవీయ ఘటన వెలుగుచూసింది. ఆరేళ్ల బాలికపై ఓ యువకుడు అత్యాచారానికి పాల్పడ్డాడు. మాయమాటలు చెప్పి ఆమెను అతని ఇంటికి తీసుకెళ్లి ఈ దారుణానికి పాల్పడ్డాడని పోలీసులు వెల్లడించారు. ఈ ఘటనపై కేసు నమోదు చేసిన పోలీసులు నిందితుడిని అరెస్ట్ చేశారు.
భారీ దోపిడి: రాజస్థాన్లోని భివాడీ జిల్లా అల్వార్లో పట్టపగలే బ్యాంకును లూటీ చేశారు దుండగులు. యాక్సిస్ బ్యాంకుకు గుర్తుతెలియని ఆరుగురు సాయుధులు వచ్చి రూ.70 లక్షలు దోచుకెళ్లారని అధికారులు వెల్లడించారు. సోమవారం ఉదయం సుమారు 10 గంటలకు ఈ ఘటన జరిగినట్లు తెలిపారు. సీసీటీవీ ఫుటేజ్ ఆధారంగా నిందితుల కోసం గాలిస్తున్నామని.. త్వరలోనే వారిని అరెస్ట్ చేస్తామని పోలీసులు పేర్కొన్నారు.
ఇదీ చూడండి : 'దిశ' తరహాలో మరో కిరాతకం! యువతిని చంపి, నిప్పంటించి..
