WPL 2024 RCB Trophy Prize Money : ఐపీఎల్‌లో ప్రతీ ఏటా నిరాశ ఎదురవుతున్నప్పటికీ, ఆత్మవిశ్వాసంతోనే బరిలోకి దిగే జట్టు ఆర్సీబీ. ఆ జట్టుకు ఇన్నేళ్లపాటు ట్రోఫీ అందని ద్రాక్షగా మిగిలిపోయింది. అయితే ఎట్టకేలకు వారి నిరీక్షణ ఫలించింది. ఐపీఎల్‌లో కాకపోయినా మహిళల జట్టు డబ్ల్యూపీఎల్ 2024 సీజన్లో ఆర్సీబీ విజేతగా నిలిచింది. స్మృతి మంధాన నేతృత్వంలోని బెంగళూరు జట్టు ఫైనల్లో దిల్లీ క్యాపిటల్స్‌ను ఓడించి కప్పును దక్కించుకుంది. ఆల్‌రౌండ్‌ ఆధిపత్యాన్ని ప్రదర్శిస్తూ టైటిల్‌ను సొంతం చేసుకుంది.
ఆదివారం జరిగిన ఫైనల్లో బెంగళూరు 8 వికెట్ల తేడాతో గెలిచింది. సోఫీ మోలనూ (3/20), శ్రేయాంక పాటిల్‌ (4/12), ఆశా శోభన (2/14) అదిరే బౌలింగ్కు దిల్లీ క్యాపిటల్స్ 18.3 ఓవర్లలోనే 113 పరుగులకు ఆలౌట్ అయిపోయింది. షెఫాలి వర్మ (27 బంతుల్లో 44; 2×4, 3×6) టాప్ స్కోరర్గా నిలిచింది. ఎలీస్‌ పెర్రీ (37 బంతుల్లో 35 నాటౌట్‌; 4×4), సోఫీ డివైన్‌ ( 27 బంతుల్లో 32; 5×4, 1×6), స్మృతి మంధాన (39 బంతుల్లో 31; 3×4) మంచిగా రాణించడం వల్ల బెంగళూరు లక్ష్యాన్ని 19.3 ఓవర్లలో 2 వికెట్లు కోల్పోయి ఛేదించింది. అలా ఆర్సీబీ విజయం సాధించింది.
అయితే ఈ ఫైనల్లో గెలిచిన ఆర్సీబీ జట్టుకు రూ.6 కోట్ల ప్రైజ్ మనీ దక్కింది. ఇక రన్నరప్గా నిలిచిన దిల్లీ క్యాపిటల్స్ జట్టుకు రూ.3 కోట్లు అందుకుంది. వాస్తవానికి ఈ ఏడాది ఈ రెండు జట్లు కూడా మంచి పోటినిచ్చాయి. దిల్లీ మొదటి నుంచి ఫామ్లో ఉన్నప్పటికీ ఆర్సీబీ మాత్రం కాస్త ఒడుదొడుకులను ఎదుర్కొంటూ ఫైనల్ చేరి గెలుపొందింది.
IPL Prize Money : ఇకపోతే ఐపీఎల్ 2008 సీజన్ నుంచి కొనసాగుతోంది. ఇప్పటి వరకు 16 సీజన్లను కంప్లీట్ చేసుకుంది. ప్రపంచంలోనే రిచెస్ట్ క్రికెట్ లీగ్ అవ్వడంతో ఈ మెగా లీగ్ ప్రైజ్ మనీ కూడా ఎక్కువే. 2020 వరకు రూ.10 కోట్లు ఉండేది. 2021 నుంచి రెట్టింపు చేసి రూ.20 కోట్లకు పెంచారు. రన్నరప్ జట్టుకు రూ.13 కోట్లు ఇస్తున్నారు.
