IPL 2024 Rohith Sharma : ముంబయి ఇండియన్స్ మాజీ కెప్టెన్ రోహిత్ శర్మ మరోసారి తన ఐపీఎల్ మాజీ టీమ్ డెక్కన్ ఛార్జర్స్‌పై ప్రేమను చాటుకున్నాడు. ఐపీఎల్లో తాను ఇప్పటివరకు విన్న థీమ్ సాంగ్‌లలో డెక్కన్ ఛార్జర్స్‌దే బెస్ట్ థీమ్ సాంగ్ అని తెలిపాడు. క్లబ్ ప్రైరీ ఫైర్ పోడ్‌కాస్ట్‌లో ఈ విషయాన్ని తెలిపాడు.
ఈ పోడ్‌కాస్ట్‌లో రోహిత్ శర్మతో పాటు మాజీ క్రికెటర్లు ఆడమ్ గిల్క్రిస్ట్, మైఖేల్ వాన్ సహా మరికొంతమంది పాల్గొన్నారు. దీనిని క్లబ్ ప్రైరీ ఫైర్ అనే యూట్యూబ్ ఛానెల్ హోస్ట్ చేసింది. వీడియో ఇంటర్వ్యూలో భాగంగా డెక్కన్ ఛార్జర్స్ థీమ్ సాంగ్‌ను ఆడమ్ గిల్క్రిస్ట్ ప్లే చేశాడు. దీనిని హిట్ మ్యాన్ బాగా ఎంజాయ్ చేశాడు.
ఈ క్రమంలోనే హిట్ మ్యాన్ మాట్లాడుతూ - "అప్పటి ఐపీఎల్ థీమ్ సాంగ్స్ చాలా బాగుండేవి. ప్రస్తుతం అలాంటి సాంగ్ రాలేదు. నాకు తెలిసి డెక్కన్ ఛార్జర్స్ థీమ్కు మరే ఇతర ఐపీఎల్ థీమ్ సాంగ్ సాటి రాదు. ఇదే బెస్ట్. ఈ సాంగ్ నాకు ఇప్పటికీ గుర్తుంది. అని తన అభిప్రాయాన్ని" తెలిపాడు. కాగా, ఐపీఎల్ ప్రారంభంలో డెక్కన్ ఛార్జర్స్ తరఫున గిల్క్రిస్ట్, రోహిత్ ఆడిన సంగతి తెలిసిందే.
2009లో డెక్కన్ ఛార్జర్స్ టీమ్ ఐపీఎల్ ట్రోఫీని ముద్దాడింది. అప్పుడా జట్టుకు ఆడమ్ గిల్క్రిస్ట్ సారథ్యం వహించాడు. రోహిత్ శర్మ వైస్ కెప్టెన్గా వ్యవహరించాడు. 2008లో పాయింట్ల పట్టికలో అట్టడుగున నిలిచిన ఆ జట్టు తర్వాతి సీజన్లోనే ట్రోఫీని అందుకోవడంతో క్రికెట్ ప్రియులంతా షాక్ అయ్యారు. అప్పుడు ఆ టీమ్లో గిల్క్రిస్ట్, రోహిత్తో పాటు ప్రజ్ఞాన్ ఓజా, ఆండ్రూ సైమండ్స్, ఆర్పీ సింగ్ వంటి దిగ్గజాలు ఉన్నారు. అయితే ఆ తర్వాత ఐపీఎల్ నిబంధనలు ఉల్లంఘించిన కారణంగా 2012లో డెక్కన్ ఛార్జర్స్ ఫ్రాంఛైజీని ఐపీఎల్ నిర్మాహకులు రద్దు చేశారు. అనంతరం ఈ హైదరాబాద్‌ జట్టు హక్కులను సన్‌ టీవీ నెట్‌వర్క్‌ దక్కించుకున్న సంగతి తెలిసిందే. సన్‌రైజర్స్‌ హైదరాబాద్‌గా పేరు మార్చి 2013లో లీగ్‌లోకి ఎంట్రీ ఇచ్చింది.
'మెక్కల్లమ్' విధ్వంసానికి 16ఏళ్లు- IPL ప్రారంభమైంది ఈరోజే - IPL First Match
ధావన్ జెర్సీలో మార్పు- ఇకపై కొడుకు పేరుతోనే బరిలోకి? - IPL 2024
