CSK vs PBKS IPL 2024: IPL 2024 ఐపీఎల్లో చెన్నై సూపర్ కింగ్స్ ఆరో విజయం నమోదు చేసింది. ఆదివారం పంజాబ్ కింగ్స్తో జరిగిన మ్యాచ్లో 28 పరుగుల తేడాతో నెగ్గింది. చెన్నై నిర్దేశించిన 168 లక్ష్య ఛేదనలో పంజాబ్ 139-9 పరగులకే పరిమితమైంది. ప్రభ్సిమ్రన్ సింగ్ (30 పరుగులు), శశాంక్ సింగ్ (27 పరుగులు) మినహా ఎవరూ పెద్దగా రాణించలేదు. చెన్నై బౌలర్లలో రవీంద్ర జడేజా 3, సిమ్రన్జీత్ సింగ్, తుషార్ దేశ్పాండే చెరో 2, మిచెల్ శాంట్నర్, శార్దూల్ ఠాకూర్ తలో 1 వికెట్ దక్కించుకున్నారు.
168 పరుగుల లక్ష్య ఛేదనలో పంజాబ్ తొలి నుంచే తడబడింది. రెండో ఓవర్లోనే జాని బెయిర్ స్టో (7) దేశ్పాండే బౌలింగ్లో క్లీన్బౌల్డయ్యాడు. వన్డౌన్లో వచ్చిన రొసో (0) డకౌట్గా పెవిలియన్ చేరాడు. అలా ఒకే ఓవర్లో దేశ్పాండే రెండు వికెట్లు పడగొట్టి పంజాబ్ను దెబ్బతీశాడు. ఇక మరో ఓపెనర్ ప్రభ్సిమ్రన్ సింగ్ (30 పరుగులు) కాసేపు శశాంక్ సింగ్ (27 పరుగులు)తో కలిసి పోరాడాడు. కానీ, 7.6 వద్ద శాంట్నర్ శశాంక్ను వెనక్కిపంపాడు. దీంతో 53 పరుగుల భాగస్వామ్యానికి తెరపడింది.
జడ్డూ మ్యాజిక్: ఈ సమయంలో బంతి పట్టిన జడ్డూ మ్యాజిక్ చేశాడు. ప్రభ్సిమ్రన్ సింగ్ను ఔట్ చేశాడు. ఆ తర్వాత 12వ ఓవర్లో శామ్ కరన్ (7), అశుతోష్ శర్మ (3)ను పెవిలియన్ చేర్చి పంజాబ్ను తీవ్రంగా దెబ్బకొట్టాడు. ఆ తర్వాత హర్షల్ పటేల్ (12), రాహుల్ చాహర్ (16) కూడా ఔటయ్యారు. దీంతో పంజాబ్ 7వ ఓటమి మూటగట్టుకుంది.
అంతకుముందు తొలుత బ్యాటింగ్ చేసిన చెన్నై సూపర్ కింగ్స్ నిర్ణీత 20 ఓవర్లలో 9 వికెట్ల నష్టానికి 167 పరుగులు చేసింది. ఓపెనర్ అజింక్యా రహానే (9) స్వల్ప స్కోరుకే వెనుదిరిగినా, కెప్టెన్ రుతురాజ్ గైక్వాడ్ (32 పరుగులు), డారిల్ మిచెల్ (30 పరుగులు) పవర్ప్లేలో స్కోర్ బోర్డను పరుగులు పెట్టించారు. వీరిద్దరూ రెండో వికెట్కు 57 పరుగులు జోడించారు.
ఇన్నింగ్స్ సాఫీగా సాగుతుందనుకున్న సమయంలో రాహుల్ చాహర్ బ్రేక్ ఇచ్చాడు. వరుస బంతుల్లో రుతురాజ్, దూబేను పెవిలియన్ చేర్చాడు. తర్వాతి ఓవర్లోనే హర్షల్ పటేల్ మిచెల్ను వెనక్కి పంపాడు. దీంతో ఒక్కసారిగా చెన్నై ఇన్నింగ్స్ గాడి తప్పింది. 101కే 5 వికెట్లు కోల్పోయింది. ఈ దశలో రవీంద్ర జడేజా (43 పరుగులు) కీలక ఇన్నింగ్స్తో జట్టుకు పోరాడగలిగే స్కోర్ అందించాడు. ఇక పంజాబ్ బౌలర్లలో రాహుల్ చాహర్, హర్షల్ పటేల్ చెరో 3, అర్షదీప్ సింగ్ 2, శామ్ కరన్ 1 వికెట్ దక్కించుకున్నారు.
దుబేకు ఏమైంది? వరల్డ్కప్కు ఎంపికైన తర్వాత వరుస డకౌట్లు- ఇలాగైతే కష్టమే! - IPL 2024
మ్యాక్సీ 'ఓవర్రేటడ్' - మాజీ క్రికెటర్కు తప్పని ట్రోల్ సెగ - Glenn Maxwell RCB
