Summer Skincare Tips : సమ్మర్లో ఓవైపు ఎండవేడి, చెమట, ఉక్కపోత మనల్ని ఉక్కిరిబిక్కిరి చేస్తుంటే.. మరోవైపు చెమట కాయలు, ట్యాన్, సన్‌బర్న్‌ వంటి స్కిన్‌ ప్రాబ్లమ్స్ వెంటాడుతుంటాయి. వీటి కారణంగా చర్మం ఎర్రగా మారడం, దురద వంటి సమస్యలు ఎంతో చికాకు పెట్టిస్తుంటాయి. అయితే, ఈ ప్రాబ్లమ్స్‌తో బాధపడేవారు కొన్ని టిప్స్‌ పాటించడం వల్ల ప్రయోజనం ఉంటుందని నిపుణులు చెబుతున్నారు. ఆ టిప్స్‌ ఏంటో ఇప్పుడు తెలుసుకుందాం.
టీ ట్రీ ఆయిల్‌తో : కొంతమందిలో చెమట కాయలు ఎర్రగా మారి, మంట, దురద వంటి లక్షణాలు కనిపిస్తాయి. అయితే, ఇలాంటి వారు టీ ట్రీ ఆయిల్‌ను ఉపయోగించడం వల్ల ఈ లక్షణాలు తగ్గుతాయని నిపుణులు చెబుతున్నారు. మంట, దురద ఎక్కువగా ఉన్నప్పుడు టీ ట్రీ ఆయిల్‌లో ముంచిన దూదితో వాటిపై మృదువుగా అద్దుకోవడం వల్ల కాస్త ఉపశమనం లభిస్తుందని అంటున్నారు.
కలబందతో: సమ్మర్లో కొంత మందికి వీపు, మెడ వంటి ఇతర భాగాల్లో ఎక్కువగా చెమట కాయలు వస్తుంటాయి. అయితే, ఈ సమస్యతో బాధపడేవారు కలబంద గుజ్జు లేదా కలబంద జెల్‌ తీసుకుని చెమట కాయలు ఉన్న చోట కాసేపు రుద్దుకోవాలి. తర్వాత చల్లటి నీళ్లతో క్లీన్‌ చేసుకోవాలి. ఇలా రోజుకి రెండుసార్లు వారం రోజుల పాటు చేయడం వల్ల చెమట కాయలు తగ్గుతాయని నిపుణులు చెబుతున్నారు. అలాగే సన్‌బర్న్‌, ట్యానింగ్‌ వంటి సమస్యల నుంచి కూడా విముక్తి పొందవచ్చని అంటున్నారు.
2017లో 'ఫిట్టోథెరపీ రీసెర్చ్ జర్నల్‌'లో ప్రచురించిన అధ్యయనం ప్రకారం.. చెమట కాయలు ఉన్న చోట కలబంద జెల్‌తో మర్దన చేయడం వల్ల ఎరుపు, వాపు తగ్గిందని పరిశోధకులు గుర్తించారు. ఈ పరిశోధనలో ఇరాన్‌లోని టెహ్రాన్ యూనివర్సిటీ ఆఫ్ మెడికల్ సైన్సెస్‌లో పని చేసే డాక్టర్. షాహిన్ ఘరాఘి పాల్గొన్నారు. చెమట కాయల సమస్యతో బాధపడేవారు కలబంద జెల్‌ అప్లై చేసుకోవడం వల్ల ప్రయోజనం ఉంటుందని ఆయన పేర్కొన్నారు.
ఇలా చేయడం వల్ల కూడా చర్మ సమస్యలు తగ్గుతాయి :
- చర్మ సమస్యలు ఉన్నచోట తేనె రాసి.. ఆరిపోయిన తర్వాత క్లీన్‌ చేసుకోవాలి.
- కొన్ని వేపాకులు తీసుకుని వాటర్‌ యాడ్‌ చేస్తూ మెత్తగా పేస్ట్‌ చేసుకుని.. చెమట కాయలు, సన్‌బర్న్‌, ట్యాన్ ఉన్న దగ్గర అప్లై చేసుకోవాలి. తర్వాత చల్లటి నీళ్లతో క్లీన్‌ చేసుకుంటే సరిపోతుంది.
- రోజుకి 2 లేదా 3 సార్లు రోజ్‌వాటర్‌లో ముంచిన దూదితో చెమట కాయలు ఉన్న ప్రాంతంలో మృదువుగా అప్లై చేసుకోవాలి.
- వాటర్‌మెలన్‌ గుజ్జు లేదా జ్యూస్‌ను స్కిన్‌ ప్రాబ్లమ్స్ ఉన్న చోట అప్లై చేసుకుని.. తర్వాత శుభ్రం చేసుకుంటే సరిపోతుంది.
- కర్పూరాన్ని పౌడర్‌గా చేసి అందులో కొద్దిగా వేపనూనె యాడ్‌ చేసి మిక్స్ చేయాలి. ఈ పేస్ట్‌ను స్కిన్‌ ప్రాబ్లమ్స్ ఉన్న ప్రాంతంలో అప్త్లె చేసుకోవాలి. తర్వాత 5 నిమిషాల పాటు ఆరనిచ్చి నీళ్లతో కడిగేసుకోవాలి.
- ఈ టిప్స్‌ అన్ని పాటించడం వల్ల దాదాపు వేసవిలో ఎదురయ్యే చర్మ సంబంధిత సమస్యలు తగ్గుతాయి!
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
