RBI On Interest Charges : లోన్లపై వడ్డీ వసూలు చేసే విషయంలో అన్యాయమైన పద్ధతులను అనుసరిస్తున్న బ్యాంకులపై రిజర్వ్ బ్యాంక్ ఆఫ్ ఇండియా ఆందోళన వ్యక్తం చేసింది. రుణగ్రహీతల నుంచి వసూలు చేసిన అదనపు వడ్డీలను తిరిగి చెల్లించాలని బ్యాంకులకు సోమవారం ఆదేశాలు జారీ చేసింది. 2003 నుంచి తన నియంత్రణ పరిధిలోని (ఆర్‌ఈ) సంస్థలకు పలు సందర్భాల్లో ఆర్బీఐ మార్గదర్శకాలను జారీ చేసింది.
'అన్యాయమైన పద్ధతులను పాటిస్తున్నారు!'
రుణ దాతలు వడ్డీ వసూలు చేయడంలో న్యాయబద్ధత, పారదర్శకతను పాటించాల్సిన అవసరాన్ని ఆ మార్దదర్శకాలు సూచిస్తాయి. అదే సమయంలో రుణాల వడ్డీ విధానానికి సంబంధించిన స్వేచ్ఛను కూడా అందిస్తాయి. 2023 మార్చి 31తో ముగిసిన కాలానికి ఆర్‌ఈలను పరిశీలిస్తున్న క్రమంలో, రుణదాతలు కొన్ని అన్యాయమైన పద్ధతులను పాటిస్తున్నట్లు ఆర్బీఐ ఇటీవల గుర్తించింది.
'వడ్డీని ముందే వసూలు చేస్తున్నారు!'
అన్ని ఆర్‌ఈలు రుణాల పంపిణీ విధానం, వడ్డీ విధింపు, ఇతర ఛార్జీలను సమీక్షించాలని ఆర్బీఐ తెలిపింది. ఇందుకు అనుగుణంగా వ్యవస్థలో మార్పులు చేసి దిద్దుబాటు చర్యలు కూడా తీసుకోవాలని సూచించింది. ఆర్‌ఈల క్షేత్రస్థాయి పరిశీలన సమయంలో, రుణం మంజూరు చేసిన తేదీ లేదా రుణ ఒప్పందాన్ని అమలు చేసిన తేదీ నుంచి వడ్డీ వసూలు చేయడాన్ని గమనించినట్లు తెలిపింది. వాస్తవానికి ఇది రుణం పంపిణీ చేసిన తేదీ నుంచి లెక్కించాలి. రుణం మంజూరైన చాలా రోజులకు ఆ మొత్తం అందించినా, వడ్డీని ముందే వసూలు చేస్తున్నారని ఆక్షేపించింది.
'న్యాయపరమైన పద్ధతులు కావు!'
కొన్ని ఆర్‌ఈలు రుణం బాకీ ఉన్న కాలానికి మాత్రమే కాకుండా, మొత్తం నెలకు వడ్డీ వసూలు చేస్తున్నట్లు ఆర్బీఐ గుర్తించింది. కొన్ని సందర్భాల్లో బ్యాంకులు, ఆర్థిక సంస్థలు ఒకటి లేదా అంతకంటే ఎక్కువ వాయిదాలను ముందే వసూలు చేస్తున్నాయన్న సంగతి కూడా గుర్తించింది. ఇవన్నీ న్యాయమైన, పారదర్శకత స్ఫూర్తికి అనుగుణంగా లేవని ఆర్బీఐ పేర్కొంది.
'వెంటనే తిరిగి చెల్లించాలి'
ఇలాంటి పద్ధతులను అవలంబించిన రుణ సంస్థలు వెంటనే అదనపు వడ్డీలు, ఇతర ఛార్జీలను రుణగ్రహీతలకు తిరిగి చెల్లించాలని తన సర్క్యులర్‌లో ఆదేశించింది. రుణ పంపిణీ కోసం చెక్కులకు బదులు ఆన్‌లైన్‌లోనే బదిలీ చేయాలని కూడా సూచించింది. సర్క్యులర్‌లో పేర్నొన్న ఆదేశాలు వెంటనే అమల్లోకి వస్తాయని కూడా ఆర్బీఐ స్పష్టం చేసింది.
వడ్డీ రేట్లపై ఆర్బీఐ కీలక నిర్ణయం - EMI భారం యథాతథం! - RBI Monetary Policy April 2024
