NPS New Login Rules : ఆన్లైన్ మోసాలు రోజురోజుకు పెరుగుతున్న నేపథ్యంలో పెన్షన్ ఫండ్ రెగ్యులేటరీ అండ్ డెవలప్మెంట్ అథారిటీ (PFRDA) 'నేషనల్ పెన్షన్ సిస్టమ్' (NPS) ఖాతా లాగిన్ ప్రక్రియలో మార్పు చేసింది. దీని ప్రకారం, ఖాతాదారులు టూ-ఫ్యాక్టర్ ఆధార్ అథంటికేషన్ను తప్పనిసరిగా పూర్తి చేయాల్సి ఉంటుంది. ఈ కొత్త లాగిన్ ప్రక్రియ 2024 ఏప్రిల్ 1 నుంచి అమలులోకి రానుంది. దీని వల్ల ఖాతాదారులకు అదనపు భద్రత చేకూరనుంది.
NPS సెంట్రల్ రికార్డ్ కీపింగ్ ఏజెన్సీ(CRA) సిస్టమ్లోకి లాగిన్ అయ్యే పాస్వర్డ్ బేస్డ్ వినియోగదారులందరూ కచ్చితంగా ఈ టూ-ఫ్యాక్టర్ ఆధార్ అథంటికేషన్ ప్రక్రియను పూర్తి చేయాలి. దీని తరువాత వారి రిజిస్టర్ మొబైల్ నంబర్కు ఒక ఓటీపీ వస్తుంది. దానిని ఎంటర్ చేసిన తరువాత మాత్రమే యూజర్లు వారి ఖాతాను యాక్సెస్ చేయగలుగుతారు.
NPS New Login Rule Benefits : పీఎఫ్ఆర్డీఏ 2024 మార్చి 15న కొత్త ఎన్పీఎస్ లాగిన్ ప్రక్రియ గురించి నోటిఫికేషన్ రిలీజ్ చేసింది. దీని వల్ల ఎన్పీఎస్ ఖాతాదారులకు మరింత భద్రత చేకూరునుంది. దీని వల్ల చందాదారులకు, వాటాదారులకు రక్షణ లభిస్తుంది. ముఖ్యంగా ఎన్పీఎస్ లావాదేవీల్లో ఎలాంటి మోసాలు జరగకుండా నిలువరించడానికి వీలవుతుంది.
కొత్త మెకానిజం ఎలా ఉంటుంది?
పీఎఫ్ఆర్డీఏ సర్క్యూలర్ ప్రకారం, ఎన్పీఎస్ CRA సిస్టమ్ యాక్సెస్ చేయాలంటే, ముందుగా మీ యూజర్ ఐడీ, పాస్వర్డ్ నమోదు చేయాలి. తరువాత 2-ఫ్యాక్టర్ అథంటికేషన్ ప్రక్రియను పూర్తి చేయాలి. ఇందుకోసం -
- ముందుగా మీరు NPS అధికారిక వెబ్సైట్ https://enps.nsdl.com/eNPS/NationalPensionSystem.html ఓపెన్ చేయాలి.
- వెబ్సైట్లోకి PRAIN/ IPINతో లాగిన్ కావాలి. వెంటనే ఓ కొత్త విండో ఓపెన్ అవుతుంది.
- ఆ కొత్త విండోలో మీ యూజర్ ఐడీ, పాస్వర్డ్, క్యాప్చాలను ఎంటర్ చేయాలి.
- వెంటనే టూ-ఫ్యాక్టర్ అథంటికేషన్ చేసుకోమని మీకు ఒక ప్రాంప్ట్ వస్తుంది.
- మీ రిజిస్టర్డ్ మొబైల్ నంబర్కు ఒక ఓటీపీ వస్తుంది. దానిని ఎంటర్ చేయాలి.
- వెంటనే మీ ఎన్పీఎస్ అకౌంట్ ఓపెన్ అవుతుంది. అంతే సింపుల్!
ఇలా చేస్తే ఎన్పీఎస్ అకౌంట్ను యాక్సెస్ చేయలేరు!
ఎన్పీఎస్ ఖాతాదారులు వరుసగా 5 సార్లు టూ-ఫ్యాక్టర్ అథంటికేషన్ చేయడంలో విఫలమైతే, అతని/ఆమె ఖాతా లాక్ అయిపోతుంది. ఇలా జరిగినప్పుడు ఖాతాదారులు సీక్రెట్ క్వెశ్చన్కు సరైన సమాధానం ఇచ్చి పాస్వర్డ్ను రీసెట్ చేసుకోవచ్చు. ఒకవేళ ఖాతాదారులు సీక్రెట్ క్వశ్చన్-ఆన్సర్ కూడా మర్చిపోయినట్లైతే, వారికి మరో ఛాన్స్ కూడా ఉంటుంది. ఇందుకోసం యూజర్లు IPINను రీఇష్యూ చేయమని దరఖాస్తు చేసుకోవాల్సి ఉంటుంది. అప్పుడు మాత్రమే వారు మళ్లీ ఎన్పీఎస్ను యాక్సెస్ చేయగలరు. ఇదంతా యూజర్ల భద్రత కోసమే అని మీరు గుర్తించుకోవాలి.
ఏప్రిల్ 1లోపు చేయాల్సిందే!
అన్ని ప్రభుత్వ రంగ, స్వయంప్రతిపత్తి సంస్థలు ఏప్రిల్ 1లోపు సీఆర్ఏ సిస్టమ్లోకి ఎన్పీఎస్ ఖాతాదారులు లాగిన్ అయ్యేందుకు ఆధార్ ఆధారిత లాగిన్ ఫీచర్లను అందుబాటులోకి తేవాలని పీఎఫ్ఆర్డీఏ ఆదేశించింది.
ఆదాయ పన్ను రిటర్నులు దాఖలు చేయాలా? సరైన ITR ఫారాన్ని ఎంచుకోండిలా! - How To Choose Right ITR Form
