Kerala School AI Teacher : ఆ పాఠశాలకు వెళ్లి మీ ఫేవరేట్ టీచర్ ఎవరని అడిగితే అందరూ ఐరిస్ మేడమ్ పేరే చెబుతారు. అందులో వింత ఏముంది అని అనుకుంటున్నారా? ఆవిడ టీచరే కానీ, మనిషి కాదు. ఆమె ఓ ఆర్టిఫీషియల్ ఇంటిలిజెన్స్ ద్వారా రూపొందించిన ఉపాధ్యాయురాలు. విద్యార్థులకు పాఠ్యేతర కార్యక్రమాల్లో భాగంగా అటల్ టింకరింగ్ ల్యాబ్లో ఈ ఏఐ టీచర్ను రూపొందించారు. కేరళ తిరువనంతపురంలోని కల్లంబలం కేటీసీటీ పాఠశాలలో మేకర్స్ ల్యాబ్ అనే ఓ అంకుర సంస్థ దీనిని తయారు చేసింది. పాఠశాలలో ఏఐ టీచర్ను ప్రవేశపెట్టడం కేరళలో ఇదే తొలిసారని సంస్థ ప్రతినిధులు చెబుతున్నారు.
ఏ ప్రశ్నకైనా 10సెకన్లలో జవాబు
విద్యార్థులు అడిగిన ప్రశ్నలకు కేవలం 10 సెకన్లలోనే సమాధానం చెబుతోందీ ఏఐ టీచర్. ఇంగ్లిష్తో పాటు హిందీ, మలయాళం భాషల్లోనూ సమాధానాలు ఇస్తోంది. విద్యార్థుల్లో పాఠ్యేతర కార్యక్రమాలను పెంచడం కోసం నీతి ఆయోగ్ అటల్ టింకరింగ్ ల్యాబ్ అనే ప్రాజెక్ట్ను ప్రవేశపెట్టింది. దీనిలో భాగంగానే విద్యార్థులకు సాంకేతిక సహయాన్ని అందించే మేకర్స్ ల్యాబ్ అనే స్టార్టప్ సంస్థ దీనిని రూపొందించింది. దీనిని తయారు చేయడానికి సుమారు రూ.లక్ష ఖర్చు అయినట్లు సంస్థ ప్రతినిధులు చెప్పారు. ఇందులో అనేక మంది విద్యార్థులు సైతం పాలుపంచుకున్నట్లు తెలిపారు. ప్రస్తుతం ఈ ఏఐ టీచర్ను మరింత మెరుగ్గా పని చేసే విధంగా తీర్చిదిద్దుతున్నట్లు వివరించారు. గందరగోళ పరిస్థితుల్లోనూ ప్రశ్నలను స్పష్టంగా వినగలిగేలా కొన్ని మార్పులు చేస్తున్నట్లు వెల్లడించారు.
కెమెరా ఆధారంగా ఎవరు ప్రశ్నిస్తున్నారని గమనించి వారికే సమాధానం ఇస్తుంది ఏఐ టీచర్. దీంతో పాటు ప్రశ్న అడిగిదే విద్యార్థా? లేక ఉపాధ్యాయుడా? అన్న విషయాన్ని సైతం గుర్తించి జవాబు ఇస్తుంది. ఐరిస్ పూర్తిగా చాట్ జీపీటీ ఆధారంగా పనిచేస్తుంది. మన వాయిస్ను గుర్తించిన తర్వాత, గూగుల్ కన్వర్షన్ ఆధారంగా ప్రాసెస్ చేసుకుని సమాధానం ఇస్తుంది. ఇది కేవలం మాట్లాడడమే కాకుండా ముందుకు, వెనక్కు కూడా కదులుతుంది. చక్రాల సాయంతో కదులుతూ షేక్ హ్యాండ్ సైతం ఇస్తుంది. బ్లూటూత్ ఆధారంగా ఈ చక్రాల కదులుతాయని మేకర్స్ ల్యాబ్ ప్రతినిధులు తెలిపారు. వచ్చే నెల రోజుల్లో ఇతర పాఠశాలల్లో సైతం ఈ సాంకేతికతను అందుబాటులోకి తేవాలని లక్ష్యంగా పెట్టుకున్నట్లు చెప్పారు.
