Human Urine Generate Electricity : మానవ మూత్రం నుంచి విద్యుత్ ఉత్పత్తి చేశారు కేరళకు చెందిన పాలక్కాడ్ ఐఐటీ శాస్త్రవేత్తలు. ఆ విద్యుత్ను ఎల్ఈడీ లైట్లకు, మొబైల్ ఛార్జింగ్స్ కోసం ఉపయోగించుకోవచ్చని చెబుతున్నారు. విద్యుత్తో పాటు మూత్రం నుంచి ఎరువును కూడా తయారు చేశారు. తొలుత ఆవు మూత్రంతో విద్యుదుత్పత్తి చేశారు ఐఐటీ పరిశోధకులు. ఆ తర్వాత మానవ మూత్రంపై ప్రయోగాలు చేసి విజయవంతమయ్యారు.
ఐఐటీ పాలక్కాడ్లోని సివిల్ ఇంజనీరింగ్ విభాగానికి చెందిన అసిస్టెంట్ ప్రొఫెసర్ డాక్టర్ ప్రవీణ్ గంగాధరన్ నేతృత్వంలోని బృందం ఈ కొత్త ఆవిష్కరణ చేసింది. ఈ బృందంలో రీసెర్చ్ స్కాలర్ వీ సంగీత, ప్రాజెక్టు సైంటిస్ట్ డాక్టర్ శ్రీజిత్, సివిల్ ఇంజనీరింగ్ విభాగానికి చెందిన రీసెర్చ్ అసోసియేట్ రిను అన్నా కోశి ఉన్నారు. 'స్టెల్ యూరిన్ కాటలైజ్డ్ రిసోర్స్ రికవరీ' పేరుతో ఈ పరిశోధనలు చేశారు. అయితే మానవ మూత్రంపై జరిపిన పరిశోధనలకు ఇంకా పేటెంట్ రైట్స్ రాలేదని, ఇందుకోసం దరఖాస్తు చేసుకున్నామని ఐఐటీ శాస్త్రవేత్తలు వెల్లడించారు. ఆవు మూత్రంతో విద్యుదుత్పత్తికి సంబంధించిన ప్రయోగ వివరాలు 'సపరేషన్ అండ్ ప్యూరిఫికేషన్ టెక్నాలజీ' అనే సైన్స్ జర్నల్లో ప్రచురితమయ్యాయని చెప్పారు.
ఎలా తయారు చేస్తారంటే?
ఎటువంటి మిశ్రమం లేని ఆవు మూత్రాన్ని ఒక ఛాంబర్లో సేకరిస్తారు. తర్వాత ఎలక్ట్రోకెమికల్ రిసోర్స్ రికవరీ రియాక్టర్లోకి మూత్రాన్ని పంపిస్తారు. ఈ రియాక్టర్ గాజుతో తయారు చేసిన చిన్న సెల్ మాదిరిగా కనిపిస్తుంది. ఈ సెల్స్లో మెగ్నీషియం ఆనోడ్లా, గాలి క్యాథోడ్లా పని చేస్తుంది. ప్రాథమిక పరిశోధనలో 50 సెల్స్ ఉపయోగించారు. ఒక్కో సెల్ 100 మిల్లీ లీటర్ల గోమూత్రంతో పని చేస్తుంది. ఎలక్ట్రోడ్, మూత్రం మధ్య రసాయన చర్య ద్వారా విద్యుత్ ఉత్పత్తి అవుతుంది.
విద్యుత్ను ఉత్పత్తి చేసిన తర్వాత మూత్రాన్ని మరొక ఛాంబర్లోకి మార్చి అక్కడే ఎరువులను కూడా ఉత్పత్తి చేస్తున్నారు. ఒక లీటర్ మూత్రం నుంచి సగటున 1.5 ఓల్టుల విద్యుత్ ఉత్పత్తి చేయవచ్చని పరిశోధకులు చెబుతున్నారు. మొబైల్ ఫోన్ల ఛార్జింగ్, ఎమర్జెన్సీ విద్యుద్దీపాలను వెలిగించుకునేందుకు ఈ కరెంట్ సరిపోతుందని చెప్పారు.
ఈ ఎరువులు కూడా
మూత్రం నుంచి ఏకకాలంలో విద్యుత్ను, బయో ఎరువును ఉత్పత్తి చేయవచ్చని శాస్త్రవేత్తలు చెబుతున్నారు. 'ఎదిగిన మనిషిలో ప్రతి రోజూ 1.5 లీటర్ల మూత్రం ఉత్పత్తి అవుతుంది. దీని ప్రకారం సంవత్సరానికి 500 లీటర్ల మూత్రం ఉత్పత్తి అవుతుంది. 500 లీటర్ల మానవ మూత్రం నుంచి 2.5 -4.3 కిలోల నైట్రోజన్, కేజీ పాస్ఫరస్, పొటాషియంను తయారు చేయవచ్చు' అని శాస్త్రవేత్తలు వివరించారు.
