ରାଉରକେଲା/ସୁନ୍ଦରଗଡ: କଲେଜ ହଷ୍ଟେଲରେ ପାଣି ସମସ୍ୟା ପାଇଁ ଧାରାଣାରେ ବସିଥିବା ଛାତ୍ରଛାତ୍ରୀଙ୍କ ସହ ସାମିଲ ହେଲେ ବିଜେପି ବିଧାୟିକା କୁସୁମ ଟେଟେ । ସୁନ୍ଦରଗଡ଼ ସରକାରୀ ମହାବିଦ୍ୟାଳୟରେ ଏପରି ସମସ୍ୟା ନେଇ ବାରମ୍ବାର ଅଭିଯୋଗ ସତ୍ତ୍ବେ ମଧ୍ୟ ସମସ୍ୟାର ସମାଧାନ ନହେବା କାରଣରୁ ଧାରଣାରେ ବସିଛନ୍ତି ଛାତ୍ରଛାତ୍ରୀ । ଅଭିଯୋଗ ଅନୁସାରେ, ବହୁଦିନରୁ ହଷ୍ଟେଲରେ ପାଣି ସମସ୍ୟା ଲାଗି ରହିଛି । ଏନେଇ ବାରମ୍ବାର ଅଭିଯୋଗ କରିବା ପରେ କିନ୍ତୁ ଅସୁବିଧା ଦୂର କରିବାରେ କଲେଜ କର୍ତ୍ତୃପକ୍ଷ ସକ୍ଷମ ହୋଇନାହାନ୍ତି । ତେଣୁ କରି ଶେଷରେ ଛାତ୍ରଛାତ୍ରୀ କଲେଜ ସମ୍ମୁଖରେ ଧାରଣାରେ ବସିଛନ୍ତି ।
ପ୍ରତିକାତ୍ମକ ଭାବେ ହାତରେ ଗରା, ବାଲ୍ଟି ଧରି କଲେଜ ସମ୍ମୁଖରେ ଛାତ୍ରଛାତ୍ରୀଙ୍କ ନିଆରା ଢଙ୍ଗରେ ଧାରଣା ଓ ପ୍ରତିବାଦ ଦେଖିବାକୁ ମିଳିଛି । ତେବେ ସୁନ୍ଦରଗଡ଼ ବିଧାୟିକା ମଧ୍ୟ ଏହି ଧାରଣାରେ ସାମିଲ ହୋଇ ଛାତ୍ରଛାତ୍ରୀଙ୍କ ସହ କଲେଜ ସମ୍ମୁଖରେ ନଜର ଆସିଛନ୍ତି । ସମସ୍ୟା ନେଇ କଲେଜ କର୍ତ୍ତୃପକ୍ଷଙ୍କ ବିରୋଧରେ ନାରାବାଜୀ ମଧ୍ୟ କରିଛନ୍ତି ।
ଏହା ମଧ୍ୟ ପଢନ୍ତୁ :- ଶ୍ରୀମନ୍ଦିର ମୁଖ୍ୟ ପ୍ରଶାସକ ଯେଉଁ କଥା କହିଛନ୍ତି ତାହା ଗ୍ରହଣୀୟ ନୁହଁ: ଭର୍ତ୍ତୃହରି
ଅଭିଯୋଗ ଅନୁସାରେ, ସୁନ୍ଦରଗଡ଼ ସରକାରୀ ମହାବିଦ୍ୟାଳୟର ଚାରୋଟି ହଷ୍ଟେଲରେ ଗତ 4 ମାସରୁ ଅଧିକ ସମୟ ଧରି ପାଣି ସମସ୍ୟା ଲାଗି ରହିଛି । ଅନ୍ୟପଟେ ଗତ ଚାରି ଦିନ ହେବ ହଷ୍ଟେଲ ମୋଟେ ବୁନ୍ଦାଏ ପାଣି ଆସିନଥିବା ଅଭିଯୋଗ କରିଛନ୍ତି ଛାତ୍ରଛାତ୍ରୀ । ବିଶେଷ କରି ଛାତ୍ରୀମାନେ ନାହିଁନଥିବା ସମସ୍ୟାର ସମ୍ମୁଖୀନ ହେଉଛନ୍ତି । ତେବେ ପୂର୍ବରୁ ବାରମ୍ବାର କଲେଜ କର୍ତ୍ତୃପକ୍ଷଙ୍କୁ ଅଭିଯୋଗ କରିଥିଲେ ମଧ୍ୟ ଅଭିଯୋଗର ଫଳ ଶୂନ ।
ଫଳରେ ଛାତ୍ରଛାତ୍ରୀ ଆଜି ଶେଷରେ କଲେଜ ଘେରାଉ କରିଛନ୍ତି । କଲେଜ ପ୍ରବେଶ ଦ୍ଵାରରେ ତାଲା ପକାଇ ବସି କଲେଜ ବନ୍ଦ କରିଛନ୍ତି । ବିଧାୟିକା କୁସୁମ ଟେଟେ କହିଛନ୍ତି, "ଯେପର୍ଯ୍ୟନ୍ତ ପାଣି ସମସ୍ୟା ଓ ଡ୍ରେନ ସମସ୍ୟା ଦୂର ନହେବ ସେ ପର୍ଯ୍ୟନ୍ତ ଧାରଣାରୁ ଓହରିବେ ନାହିଁ । ସରକାରଙ୍କ ଅନେକ ଯୋଜନା ତଥା DMF ଫଣ୍ଡ ରହିଛି ହେଲେ, ଆଜିବି ଲୋକେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ।" ଅନ୍ୟପଟେ ସମସ୍ୟାର ସମାଧାନ କରିବାକୁ ଉଦ୍ୟମ କରାଯାଉଥିବା ଓ ଏହା ଖୁବଶିଘ୍ର ସମାଧାନ ହେବା ନେଇ କହିଛନ୍ତି କଲେଜ ଭାଇସ ପ୍ରିନ୍ସିପାଲ । ତଥାପି ଛାତ୍ରଛାତ୍ରୀ ସମାଧାନ ନହେବା ଯାଏଁ ଧାରଣା ଜାରି ରଖିବାକୁ ଚେତାବନୀ ଦେଇଛନ୍ତି ।
ଇଟିଭି ଭାରତ, ରାଉରକେଲା
