ସୁନ୍ଦରଗଡ: ଜିଲ୍ଲାରେ ପୁଣି କୋରୋନା କର ଲେଉଟାଇବା ଆରମ୍ଭ କରିଛି । ସୁନ୍ଦରଗଡ଼ ସେଣ୍ଟମେରୀ ସ୍କୁଲରେ ଗତ ୩ ଦିନ ମଧ୍ୟରେ ୫୩ ଛାତ୍ରୀ କୋଭିଡ ପଜିଟିଭ୍ ଚିହ୍ନଟ ହୋଇଛନ୍ତି । ଘଟଣା ପଦାକୁ ଆସିବା ପରେ ଜିଲ୍ଲା ଶିକ୍ଷାଅଧିକାରୀ ସ୍କୁଲ୍ରେ ପହଞ୍ଚି କୋଭିଡ କଟକଣା ପାଳିବା ପାଇଁ କଡ଼ାକଡ଼ି ଚେତାବନୀ ଦେଇଛନ୍ତି ।
Student Covid Infected: ଗୋଟିଏ ସ୍କୁଲ୍ରେ ୫୩ ଜଣ ଛାତ୍ରୀ ଆକ୍ରାନ୍ତ ଗତ ଶୁକ୍ରବାର ସ୍କୁଲ୍ର ଜଣେ ଛାତ୍ରୀ ହଠାତ ଟଳି ପଡ଼ିଥିଲେ । ଯାଞ୍ଚ ବେଳେ ସେ କୋଭିଡ ପଜିଟିଭ୍ ଥିବା ଜଣାପଡ଼ିଥିଲା । ସେହିଦିନ ଅନ୍ୟ କେତେକଙ୍କ ନମୁନା ସଂଗ୍ରହ କରାଯାଇ କୋଭିଡ ଟେଷ୍ଟ କରାଯାଇଥିଲା । ଏହି କ୍ରମରେ ଗତ ଶନିବାର ସ୍କୁଲ୍ରେ ୯ ଜଣ ଛାତ୍ରୀ କୋରୋନା ଆକ୍ରାନ୍ତ ହୋଇଥିବା ଜଣାପଡ଼ିଥିଲା । ଗତ ସୋମବାର ସନ୍ଧ୍ୟା ସୁଦ୍ଧା ଏହି ସଂଖ୍ୟା ୨୨ରେ ପହଞ୍ଚିଥିବାବେଳେ ଆଜି(ମଙ୍ଗଳବାର) ତାହା ୫୩ରେ ପହଞ୍ଚିଛି । ସ୍କୁଲରେ କୋଭିଡ୍ ଗାଇଡଲାଇନ ପାଳନ କରିବାକୁ କଡ଼ାକଡ଼ି ଭାବେ ନିର୍ଦ୍ଦେଶ ଦେଇଛନ୍ତି ଜିଲ୍ଲା ଶିକ୍ଷା ଅଧିକାରୀ । କୋରୋନା ସଂକ୍ରମିତ ଚିହ୍ନଟ ହେବାପରେ ସ୍କୁଲ୍ ସାନିଟାଇଜ କରାଯାଇଛି । ଆଜି(ମଙ୍ଗଳବାର)ଠାରୁ ସ୍କୁଲର ଷଷ୍ଠ, ସପ୍ତମ ଓ ଅଷ୍ଟମ ଶ୍ରେଣୀ ଶିକ୍ଷାଦାନକୁ ସ୍ଥଗିତ ରଖିବା ନେଇ ସ୍କୁଲର ପ୍ରଧାନ ଶିକ୍ଷୟିତ୍ରୀ ନୋଟିସ ଜାରି କରିଛନ୍ତି । ଆସନ୍ତା 26 ତାରିଖରୁ ନବମ ଓ ଦଶମ ଶ୍ରେଣୀ ପରୀକ୍ଷା ଆରମ୍ଭ ହେଉଥିବାରୁ ସେହି ଦୁଇଟି ଶ୍ରେଣୀର ଛାତ୍ରୀଙ୍କୁ ଭାଗ ଭାଗ କରି ସ୍ୱତନ୍ତ୍ର ନୀରିକ୍ଷଣରେ ଶିକ୍ଷାଦାନ କରାଯିବ । ଯେଉଁମାନେ କୋଭିଡ ପଜିଟିଭ୍ ଅଛନ୍ତି, ସେମାନଙ୍କୁ ଆଇସୋଲେସନରେ ରଖାଯାଇଛି ।
ସୁନ୍ଦରଗଡ଼ରୁ ହରିହର ଦାସମହାପାତ୍ର, ଇଟିଭି ଭାରତ
