ମା’ ଦଶଭୂଜାଙ୍କ ଚାଲିଛି ମହାଷ୍ଟମୀ ପୂଜା, ବିଭିନ୍ନ ମଣ୍ଡପରେ ଲାଗୁଛି ଭକ୍ତଙ୍କ ଭିଡ

ସୁବର୍ଣ୍ଣପୁର: ତନ୍ତ୍ର ପୀଠ ସୋନପୁରର ଗଡଜାତ ସହରରେ ଆରମ୍ଭ ହୋଇଛି ଦେବୀ ମା’ ଦୁର୍ଗାଙ୍କ ଆରାଧନା । ଶାରଦୀୟ ଦୁର୍ଗାପୂଜା ପାଇଁ ଏହି ଐତିହାସିକ ସହର ଉତ୍ସବ ମୁଖର ହୋଇ ଉଠିଛି । ଆଶ୍ବୀନ ମହାଳୟା ତିଥିରେ ଅଧିବାସ ପର୍ବ ଆୟୋଜିତ ହୋଇଥିବା ବେଳେ ପଞ୍ଚ ଦିନାତ୍ମକ ସହରର ଥନାପତି ପଡାଠାରେ ନବରାତ୍ର ଦୁର୍ଗାପୂଜା ଚାଲିଥିବା ବେଳେ ବ୍ଳକ ଛକ,ଟିକିରିପଡା,ବଡବଜାର ଆଦିରେ ଆକର୍ଷଣୀୟ ପଞ୍ଚ ଦିନାତ୍ମକ ଦୁର୍ଗା ପୂଜା ଆରାଧନା ଚାଲିଛି । ଆଜି ପଞ୍ଚ ଦିନାତ୍ମକ ଦୁର୍ଗାପୂଜା ପାଇଁ ଆଶ୍ବୀନ ଶୁକ୍ଳ ଅଷ୍ଟମୀ ପୂଜା କରାଯାଉଛି । ଗତକାଲି ସପ୍ତମୀ ତିଥିରେ ପ୍ରାତଃରେ ଦେବୀଙ୍କ ଆବାହନ ସହ ସପ୍ତମୀ ପୂଜା ଓ ରାତ୍ରୀର ପ୍ରଥମ ପ୍ରହରରୁ ଅଷ୍ଟମୀ ତିଥିର ପୂଜା ଆରାଧନା କରାଯାଇଥିଲା । ଲଗ୍ନ ଅନୁଯାୟୀ ଭଉଣୀ ମାନେ ବିଭିନ୍ନ ପୂଜା ମଣ୍ଡପରେ ଭାଇମାନଙ୍କ ମଙ୍ଗଳ ମନାସୀ ଦେବୀ ମା’ ଦୁର୍ଗାଙ୍କ ପୂଜା ଆରାଧନା କରିବା ସହିତ ଦୂବ ବିଡା ଚଢାଇଥିଲେ ।

ସେହିପରି ଆଜି ପ୍ରାତଃରେ ବି ଭଉଣୀମାନେ ଦେବୀଙ୍କ ପାଖରେ ଦୁବ ବିଡା ଚଢାଇଥିଲେ। ପୂଜା ମଣ୍ଡପ ଗୁଡିକରେ ମହାସପ୍ତମୀ ତିଥିରୁ ଚଣ୍ଡୀ ପାଠ,ଚଣ୍ଡୀ ଯଜ୍ଞାଦି କାର୍ଯ୍ୟ ଚାଲିଛି । ଆସନ୍ତାକାଲି ମଣ୍ଡପ ଗୁଡିକରେ ଦଶହରା ପର୍ବ ପାଳନ କରାଯିବ। ଲଗ୍ନ ଅନୁଯାୟୀ ଦଶହରା ପରେ ଚଣ୍ଡୀ ଯଜ୍ଞର ପୂର୍ଣ୍ଣ ହୁତି ଓ ପରେ ଦେବୀ ମାଙ୍କ ମନ୍ତ୍ର ବିସର୍ଜନ ପର୍ବ ପାଳନ କରାଯିବ । ତେବେ ଆକର୍ଷଣୀୟ ତୋରଣ ,ଆଲୁଅ ସଜ୍ଜା ତଥା ଦେବୀ ମା’ଙ୍କ ମୃଣ୍ମୟୀ ପ୍ରତିମାଙ୍କ ଦର୍ଶନ ପାଇବା ସହିତ ଦେବୀ କୃପା ଲାଭ କରିବା ପାଇଁ ପୂଜା ମଣ୍ଡପ ଗୁଡିକରେ ଶ୍ରଦ୍ଧାଳୁଙ୍କ ବେଶ ସମାଗମ ହେଉଛି । ପୂଜା କମିଟି ଗୁଡିକ ପକ୍ଷରୁ ବ୍ୟାପକ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଉଛି । ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ପାଇଁ ପୂଜା କମିଟି ଗୁଡିକ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି ।

ଦେବୀଙ୍କ ପୂଜାକୁ ଆକର୍ଷଣୀୟ କରିବା ପାଇଁ ପୂଜା କମିଟି ଗୁଡିକ ପକ୍ଷରୁ ସ୍ବେଚ୍ଛାସେବୀମାନଙ୍କୁ ବିଭାଗ ବଣ୍ଟନ, ସାଂସ୍କୃତିକ କାର୍ଯ୍ୟକ୍ରମ ଆୟୋଜନ, ପୂଜା ଆରାଧନା ପାଇଁ ମଣ୍ଡପରେ ପ୍ରସ୍ତୁତି, ନୈବେଦ୍ୟ ତଥା ପ୍ରସାଦ ପ୍ରସ୍ତୁତି ଆଦି କାର୍ଯ୍ୟ ଆଗେଇ ଚାଲିଛି । ଏହା ସହିତ ଶ୍ରଦ୍ଧାଳୁଙ୍କ ମନୋରଞ୍ଜନ ଓ ପୂଜାର ଆକର୍ଷଣ ବଢାଇବା ପାଇଁ ପୂଜା ମଣ୍ଡପ ନିକଟସ୍ଥ ଖୋଲା ଯାଗାରେ ମୀନା ବଜାର, ସାଂସ୍କୃତିକ ମଣ୍ଡପ, ରାବଣ ଦରବାର ଆଦିର ଆୟୋଜନ କରାଯାଉଛି ।

ଇଟିଭି ଭାରତ, ସୁବର୍ଣ୍ଣପୁର