ରାୟଗଡା: ନକଲି ଡାକ୍ତରରେ ଚାଲିଥିଲା କ୍ଲିନିକ, ଡିଗ୍ରୀ ନଥାଇ ବେଆଇନ ଭାବେ କ୍ଲିନିକ ଖୋଲି ଲୋକଙ୍କୁ ପ୍ରଦାନ କରୁଥିଲେ ଚିକିତ୍ସା,ଚଢାଉ କରି କ୍ଲିନିକ ସିଲ(Illegal Clinic Sealed) ସହ ନକଲି ଡାକ୍ତରକୁ ଅଟକ ରଖିଲା ପୋଲିସ । ଏଭଳି ଘଟଣା ଘଟିଛି ରାୟଗଡା ମୁନିଗୁଡା ଅଞ୍ଚଳରେ । ଗିରଫ ନକଲି ଡାକ୍ତର ଜଣଙ୍କ ହେଉଛନ୍ତି ସୁବ୍ରତ ବିଶ୍ବାସ ।
ମିଳିଥିବା ସୂଚନା ଅନୁଯାୟୀ, ଲୋକଙ୍କ ସ୍ୱାସ୍ଥ୍ୟ ଓ ଚିକିତ୍ସାକୁ ନେଇ ଏବେ ଆକ୍ସନ ମୋଡ଼ରେ ରହିଛି ଜିଲ୍ଲା ପ୍ରଶାସନ । ତେଣୁ ବିଭିନ୍ନ ସ୍ଥାନରେ ଚଢାଉ କରି ବେଆଇନ କ୍ଲିନିକ ସିଲ କରୁଛି ଜିଲ୍ଲା ପ୍ରଶାସନ । ରାୟଗଡା ଜିଲ୍ଲା ମୁନିଗୁଡା ପୁରୁଣା ବସ ଷ୍ଟାଣ୍ଡ ନିକଟରେ ବେଆଇନ ଭାବେ ଏକ ଘରୋଇ କ୍ଲିନିକରେ ଚିକିତ୍ସା ଚାଲିଥିବା ବେଳେ ଚଢାଉ କରି ସିଲ କରିଛି ପ୍ରଶାସନ । ଶୁକ୍ରବାର ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ମୁନିଗୁଡା ତହସିଲଦାର, ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ର ଅଧିକାରୀ ଓ ଥାନାଧିକାରୀ ମିଳିତ ଭାବେ କ୍ଲିନିକ ଉପରେ ଚଢ଼ାଉ କରିଥିଲେ । ଚଢ଼ାଉ ବେଳେ ଡିଗ୍ରୀ ନଥାଇ ଡାକ୍ତର ବାବେ ଚିକିତ୍ସା କରୁଥିବା ସୁବ୍ରତ ବିଶ୍ବାସକୁ ପୋଲିସ ଥାନାରେ ଅଟକ ରଖିବା ସହ କ୍ଲିନିକକୁ ସିଲ କରାଯାଇଥିଲା ।
ଏହା ମଧ୍ୟ ପଢନ୍ତୁ-ଆଜି ବିରାଜିବେ ବିଶ୍ବ ବିନ୍ଧାଣୀ, ଦେବଶିଳ୍ପୀଙ୍କ ଆଗମନରେ ଉତ୍ସବ ମୁଖର ପୁରପଲ୍ଲୀ
ଏହା ପୂର୍ବରୁ ଗତ ଜୁଲାଇ ମାସରେ କାଶୀପୁର ଅଞ୍ଚଳରେ ଏକ କ୍ଲିନିକକୁ ସିଲ କରିଥିଲା ପ୍ରଶାସନ । ସେହି ସମୟରେ ହଇଜା ବ୍ୟାପୁଥିବାରୁ ଲୋକେ ସରକାରୀ ଡାକ୍ତରଖାନାକୁ ନଯାଇ କ୍ଵାକ କିମ୍ବା ବେଆଇନ କ୍ଲିନିକ ଗୁଡିକରେ ଚିକିତ୍ସିତ ହେଉଥିଲେ, ଫଳରେ ଏନେକ ସମୟରେ ହଇଜା ଆକ୍ରାନ୍ତଙ୍କ ଜୀବନ ମଧ୍ୟ ଯାଉଥିଲା । ଏହି ଖବର ଜଣାପଡିବା ପରେ ସ୍ବାସ୍ଥ୍ୟ ବିଭାଗ ଟିକିରି ସ୍ଥିତ ଶିବଶକ୍ତି ନାମକ ଔଷଧ ଦୋକାନ ସହ ବେଆଇନ ଭାବେ ଚାଲୁଥିବା ଏକ ଘରୋଇ କ୍ଲିନିକକୁ ସିଲ୍ କରିଥିଲା । ଝାଡାବାନ୍ତିରେ ଆକ୍ରାନ୍ତ ହୋଇ ପାନବନ୍ଧ ଗ୍ରାମର ବିଟା ମାଝୀ ଏହି କ୍ଲିନିକରେ ଚିକିତ୍ସିତ ହୋଇଥିଲେ । ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବାର ପରିବାର ଲୋକ ଅଭିଯୋଗ କରିଥିଲେ ।
ଏ ସମ୍ପର୍କରେ ଖବର ପାଇବା ପରେ ସ୍ବାସ୍ଥ୍ୟ ବିଭାଗ ମାମଲାର ତଦନ୍ତ କରି କ୍ଲିନିକ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ତହସିଲଦାର, ଅତିରିକ୍ତ ଜିଲ୍ଲା ମୁଖ୍ୟ ଚିକିତ୍ସାଧିକାରୀ, ଡ୍ରଗ ଇନ୍ସପେକ୍ଟରଙ୍କ ଉପସ୍ଥିତିରେ କ୍ଲିନିକ ଏବଂ ଔଷଧ ଦୋକାନକୁ ସିଲ୍ କରାଯାଇଛିଲା । ଏହାସହ ବେଆଇନ କ୍ଲିନିକ କିମ୍ବା କ୍ବାକ୍କୁ ନ ଯାଇ ସିଧାସଳଖ ସରକାରୀ ଡାକ୍ତରଖାନା ଯିବାକୁ ସମସ୍ତଙ୍କୁ ନିବେଦନ କରିଥିଲେ ରାୟଗଡା ସିଡିଏମଓ ଡାକ୍ତର ଲାଲମୋହନ ରାଉତରାୟ ।