ପୁରୀ: ସମୁଦ୍ରରେ ପର୍ଯ୍ୟଟକ ମାନେ ବୁଡ଼ିଗଲେ କିଭଳି ଉଦ୍ଧାର କରାଯାଇ ପାରିବ । ସେ ନେଇ ଏକ ମକ ଡ୍ରିଲ ପୁରୀ ବେଳାଭୂମିରେ ଅନୁଷ୍ଠିତ ହୋଇଛି । ଜଣେ ଲାଇଫ ଗାର୍ଡ ଗଭୀର ଜଳକୁ ଚାଲିଯିବା ପରେ କୂଳରେ ଥିବା ଲାଇଫ ଗାର୍ଡମାନେ ଉଦ୍ଧାର ପାଇଁ ଥିବା ବିଭିନ୍ନ ସାମଗ୍ରୀ ଧରି ସମୁଦ୍ର ଜଳ ଭିତରକୁ ପ୍ରବେଶ କରି ବୁଡି ଯାଉଥିବା ଵ୍ୟକ୍ତିକୁ ଉଦ୍ଧାର କରିଥିଲେ ।
ତେବେ ପୁରୀ ବେଳାଭୂମିର ପରିସୀମା ବଢି ଚାଲିଥିବା ବେଳେ ଲାଇଫ ଗାର୍ଡଙ୍କ ସଂଖା କିନ୍ତୁ ବଢା ଯାଉ ନାହିଁ । ଫଳରେ ବିଭିନ୍ନ ସ୍ଥାନରେ ସମୁଦ୍ର ସ୍ନାନ ବେଳେ ପର୍ଯ୍ୟଟକ ମାନେ ବୁଡି ଯାଉଥିବା ବେଳେ ସେମାନଙ୍କୁ ଠିକ ସମୟରେ ଉଦ୍ଧାର କରାଯାଇ ପାରୁନାହିଁ । ଯାହାଫଳରେ ଅନେକ ଲୋକଙ୍କ ଜୀବନ ଚାଲି ଯାଉଛି ।
ସେହିପରି ସମୁଦ୍ରରେ ସ୍ନାନ ବେଳେ କଣ ସବୁ ନିୟମ ମାନିବା ଉଚିତ ଓ କଣ ନ କରିବା ଉଚିତ ଏ ନେଇ ସମୁଦ୍ର କୂଳରେ କୌଣସି ସାଇନ ବୋର୍ଡ ନାହିଁ । ଅନେକ ପର୍ଯ୍ୟଟକ ସଚେତନତା ଅଭାବରୁ ଜୀବନ ହରାଉଛନ୍ତି । ପୁରୀ ବେଳାଭୂମିରେ 98 ଜଣ ଲାଇଫ ଗାର୍ଡ ରହିଥିବା ବେଳେ ସିଫ୍ଟ ଅନୁଯାୟୀ ସକାଳ 6 ରୁ ରାତି 10 ଟା ଯାଏ ଡ୍ୟୁଟିରେ ରହୁଛନ୍ତି ।
ତେବେ ପୁରୀର ପ୍ରମୁଖ ବେଳାଭୂମି କୁହାଯାଉ ଥିବା ଦିଗବାରେଣି ଛକରୁ ସ୍ବର୍ଗଦ୍ବାର ଯାଏ ଥିବା ବେଳେ ଏବେ ବଳିଆ ପଣ୍ଡା ଲାଇଟ ହାଉସରୁ ମଙ୍ଗଳା ମୁହାଣ ବେଳାଭୂମି, ବ୍ଲୁ ଫ୍ଲାଗ ବିଚ ଓ ନିଳାଦ୍ରୀ ବିଚ ଆଦି ଏକାଧିକ ବିଚ ରହିଛି । ହେଲେ ବିଚ ସଂଖ୍ୟା ବଢୁଥିବା ବେଳେ ଲାଇଫ ଗାର୍ଡ ସଂଖ୍ୟା କିନ୍ତୁ ବଢ଼ାଉନାହିଁ ପ୍ରଶାସନ । ଯାହାକୁ ନେଇ ବିଭିନ୍ନ ମହଲରେ ଉଦବେଗ ପ୍ରକାଶ ପାଇଛି।
ସେପଟେ ପୁରୀ ଜିଲାପାଳ କହିଛନ୍ତି ପୁରୀ ବେଳାଭୂମିକୁ ସୁରକ୍ଷିତ ରଖିବା ପାଇଁ ନିୟମିତ ପଦକ୍ଷେପ ନିଆଯାଉଛି । ସେହିପରି ଲାଇଫ ଗାର୍ଡ ସଂଖ୍ୟା ବଢାଇବା ନେଇ ମଧ୍ୟ ଯୋଜନା କରାଯାଇଛି । ଏହା ଖୁବ ଶୀଘ୍ର କାର୍ଯ୍ୟକାରୀ ହେବ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
