କୋରାପୁଟ/ମାଲକାନଗିରି: 4 ଦିନ ଧରି ଲଗାଣ ବର୍ଷାରେ ମାଲକାନଗିରି ଜିଲ୍ଲାରେ ବନ୍ୟା ପରିସ୍ଥିତି ସୃଷ୍ଟି ହୋଇ ଥିବାରୁ ବୁଧବାର ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି ଓ ସ୍ବତନ୍ତ୍ର ରିଲିଫ କମିଶନର ବିଷ୍ଣୁ ପଦ ସେଠୀ ପହଞ୍ଚିଛନ୍ତି ସ୍ଥିତି ସମୀକ୍ଷା କରିବା ପାଇଁ । ବିଏସଏଫ ହେଲିପ୍ୟାଡରେ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି କୋରାପୁଟ, ନବରଙ୍ଗପୁର ଓ ରାୟଗଡା ଜିଲ୍ଲାପାଳଙ୍କୁ ନେଇ ଜିଲ୍ଲା ଗୁଡିକର ସ୍ବାସ୍ଥ୍ୟ ଓ ବନ୍ୟା ପରିସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି । ସମୀକ୍ଷା ବୈଠକ ପରେ ମନ୍ତ୍ରୀ ମାରାଣ୍ଡି ମାଲକାନଗିରି ଜିଲ୍ଲା ଅଭିମୁଖେ ଯାତ୍ରା କରିଥିଲେ ।
ପ୍ରଥମେ ଏମଭି 3ସ୍ଥିତ ବିଏସଏଫ କ୍ୟାମ୍ପରେ ହେଲିକପ୍ଟର ଯୋଗେ ପହଞ୍ଚିବା ପରେ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ସମ୍ମିଳନୀ କକ୍ଷରେ ସମୀକ୍ଷା ବୈଠକ କରିଛନ୍ତି । ପ୍ରତି ବର୍ଷ ଭଳି ଚଳିତ ବର୍ଷ ମଧ୍ୟ ମାଲକାନଗିରି ଜିଲ୍ଲାରେ ଲଗାଣ ବର୍ଷା ହୋଇଥିବା କାରଣରୁ ବିଭିନ୍ନ ନଦୀର ଜଳ ସ୍ତର ବୃଦ୍ଧି ପାଇ ବନ୍ୟା ହୋଇଥିଲା ।
ଏହାସହ ଲୋକଙ୍କ ଘର ଦ୍ଵାର ଭାଙ୍ଗି ଯାଇଥିବାବେଳେ ଜିଲ୍ଲାର ଅନେକ ଜମି ବାଲିଚର ହୋଇଥିବା ମନ୍ତ୍ରୀ ସ୍ଵୀକାର କରିଛନ୍ତି । ଆଗାମୀ ଦିନରେ ଜିଲ୍ଲାପାଳଙ୍କ ରିପୋର୍ଟ ପରେ ଜିଲ୍ଲାର ବିଭିନ୍ନ ନଦୀର ପୋଲକୁ ଉଚ୍ଚ କରାଯିବ ବୋଲି କହିଛନ୍ତି ସ୍ବତନ୍ତ୍ର ରିଲିଫ କମିଶନର । ଏହା ପରେ ଆକାଶ ମାର୍ଗରୁ ଏରିଏଲ ସର୍ଭେ କରି ରାଜସ୍ବ ମନ୍ତ୍ରୀ ଓ ସ୍ବତନ୍ତ୍ର ରିଲିଫ କମିଶନର ଭୁବନେଶ୍ବର ଫେରି ଯାଇଛନ୍ତି ।
ମାଲକାନଗିରିରୁ ଜୟନ୍ତ ତିଆଡ଼ି, କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
