ଯାଜପୁର: ବୈଦ୍ୟରାଜପୁର ଗାଁରେ ବଧୁହତ୍ୟା ଅଭିଯୋଗ । ଗାଁର ମନୋରଂଜନ ସ୍ବାଇଁଙ୍କ ପତ୍ନୀ ଲକ୍ଷ୍ମୀପ୍ରିୟାଙ୍କୁ ଶାଶୂଘର ଲୋକେ ହତ୍ୟା କରିଥିବା ଅଭିଯୋଗ କରିଛନ୍ତି ବାପଘର ଲୋକେ । ଅଭିଯୋଗ ମୁତାବକ ଜେନାପୁର ଥାନା ସୋରେଇ ଗାଁର ଲକ୍ଷ୍ମୀପ୍ରିୟା ୨୦୧୩ ମସିହାରେ ମନୋରଂଜନଙ୍କୁ ବିବାହ କରିଥିଲେ । ବିବାହ ପର ଠାରୁ ଲକ୍ଷ୍ମୀପ୍ରିୟାଙ୍କୁ ଯୌତୁକ ନିର୍ଯାତନା ଦେଇ ଆସୁଥିଲେ ଶାଶୂଘର ଲୋକେ । ଲକ୍ଷ୍ମିପ୍ରିୟାଙ୍କ ବାପା ସରକାରୀ ଚାକିରୀରୁ ଅବସର ନେବା ପରେ ତାଙ୍କ ଠାରୁ ଟଙ୍କା ଆଣିବା ପାଇଁ ଶାଶୂଘର ଲୋକେ ଅନେକ ସମୟରେ ଚାପ ପ୍ରୟୋଗ କରୁଥିଲେ ।
ଗତକାଲି ହଠାତ୍ ଲକ୍ଷ୍ମୀପ୍ରିୟାଙ୍କ ଦେହ ଅସୁସ୍ଥ ଥିବା ନେଇ ଖବର ଦେଇଥିଲେ ଶାଶୂଘର । ବାପ ଘର ଲୋକେ ଯାଜପୁର ଡାକ୍ତରଖାନାରେ ପହଂଚିବା ବେଳକୁ ଲକ୍ଷ୍ମୀପ୍ରିୟାଙ୍କ ମୃତଦେହ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ । ତେବେ ଯୌତୁକ ପାଇଁ ଲକ୍ଷ୍ମୀପ୍ରିୟାକୁ ହତ୍ୟା କରାଯାଇଥିବା ବାପ ଘର ଲୋକେ ଯାଜପୁର ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
