ଜଗତସିଂହପୁର: ପାରାଦ୍ଵୀପ ବନ୍ଦରର ଏକ ଜାହାଜରୁ ୧୪ ଜଣ କୋରୋନା ପଜିଟିଭ ଚିହ୍ନଟ ହୋଇଛନ୍ତି। ତୁତିକୋରିନ୍ ବନ୍ଦରରୁ କୋଇଲା ଆଣି ପାରାଦ୍ଵୀପ ବନ୍ଦରକୁ ଆସିଥିବା ଏମଭି-ଏପି କାଏସ୍ ନାମକ ଏକ ଜାହାଜର ୧୪ ଜଣ ସଦସ୍ୟ କୋରୋନା ପଜିଟିଭ ଚିହ୍ନଟ କରାଯାଇଛି । ଉକ୍ତ ଜାହାଜରେ ୨୪ ଜଣ ସଦସ୍ୟ ଆସିଥିବା ବେଳେ ୧୪ ଜଣଙ୍କ ଠାରେ କୋରୋନା ଲକ୍ଷଣ ଦେଖା ଦେଇଥିଲା ।
ତୁତିକୋରିନ୍ ବନ୍ଦର ପକ୍ଷରୁ ଉକ୍ତ ୧୪ ଜଣଙ୍କ ସ୍ବାବ ପରୀକ୍ଷା କରାଯାଇଥିଲା ଏବଂ ସେମାନଙ୍କ ରିପୋର୍ଟ ପଜିଟିଭ ଆସିବା ପରେ ତୁତିକୋରିନ୍ ବନ୍ଦର ପକ୍ଷରୁ ପାରାଦ୍ଵୀପ ବନ୍ଦରକୁ ସୂଚନା ଦିଆଯାଇଥିଲା । ଫଳରେ ପାରାଦ୍ଵୀପ ବନ୍ଦର ପକ୍ଷରୁ ଏକ ସ୍ବତନ୍ତ୍ର ଡାକ୍ତରୀ ଟିମ୍ ଦ୍ଵାରା ସେମାନଙ୍କୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି। ସେମାନଙ୍କ ସ୍ବାସ୍ଥ୍ୟାବସ୍ଥା ଭଲ ଥିବା ପାରାଦ୍ଵୀପ ବନ୍ଦର ଚିକିତ୍ସାଳୟ ପକ୍ଷରୁ ସୂଚନା ଦିଆଯାଇଛି। ଜାହାଜକୁ ପାରାଦୀପ ବନ୍ଦର ପକ୍ଷରୁ ସମ୍ପୂର୍ଣ୍ଣ ସାନିଟାଇଜ କରାଯିବା ପରେ ଆଙ୍କରେଜ ଏରିଆକୁ ପଠାଇ ଦିଆଯାଇଛି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
