ଢେଙ୍କାନାଳ: ଶୌଚ ପାଇଁ ଯାଇଥିବା ବେଳେ ଯୁବକଙ୍କୁ ଦଳି ଦେଲା ହାତୀ(Youngman Killed In Elephant Attack) । ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ବସୁଲେଇ ଗାଁରେ ଏହି ଅଭାବନୀୟ ଘଟଣା ଘଟିଛି । ଗତକାଲି(ବୁଧବାର) ଏଠାରେ ହାତୀ ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ଘଟିଛି । ମୃତକ ହେଉଛନ୍ତି ମାଟିଆ ସାହିର ରାମଚନ୍ଦ୍ର ବେହେରା ।
ସୂଚନା ମୁତାବକ, ରାମଚନ୍ଦ୍ର ଶୌଚ ପାଇଁ ଗାଁ ପାଖ ବ୍ରାହ୍ମଣୀ ନଦୀକୁ ଯାଉଥିଲେ । ଏତିକି ବେଳେ ବାଟରେ ସେ ୩୨ ଟିକିଆ ହାତୀପଲ ସହ ମୁହାଁମୁହିଁ ହୋଇଯାଇଥିଲେ । ହାତୀପଲକୁ ଦେଖି ଯୁବକ ପଛକୁ ଦୌଡ଼ି ପଳାଇବାକୁ ଚେଷ୍ଟା କରୁଥିବା ବେଳେ ଗୋଟିଏ ହାତୀ ତାଙ୍କ ପଛରେ ଗୋଡାଇବା ସହ ପାଦରେ ଦଳି ଦେଇଥିଲା । ଫଳରେ ଘଟଣାସ୍ଥଳରେ ରାମଚନ୍ଦ୍ରଙ୍କ ମୃତ୍ୟୁ ହୋଇଛି । ଏନେଇ ସ୍ଥାନୀୟ ଲୋକ ଜାଣିବା ପରେ ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗ ମୃତଦେହ ଉଦ୍ଧାର କରିବା ସହ ହାତୀପଲର ଗତିପଥ ଉପରେ ନଜର ରଖିଥିବା ସୂଚନା ମିଳିଛି ।
ଏହାମଧ୍ୟ ପଢନ୍ତୁ: ଢେଙ୍କାନାଳ ସ୍ୱୟଂ ଶାସିତ ମହାବିଦ୍ୟାଳୟରେ ୮ ବିଭାଗରେ ନୂତନ ପିଜି ପାଠ୍ୟକ୍ରମ
ଢେଙ୍କାନାଳରେ ହାତୀଙ୍କ ଉପଦ୍ରବ ବଢିବାରେ ଲାଗିଛି । ହାତୀପଲ ଗାଁ ଭିତରକୁ ପଶି ଆସି ବ୍ୟାପକ କ୍ଷୟକ୍ଷତି ଘଟାଉଛନ୍ତି । ବର୍ତ୍ତମାନ କ୍ଷେତରେ ଫସଲ ଲହଡି ଭାଙ୍ଗୁଥିବା ବେଳେ ୩୨ ଟିକିଆ ହାତୀପଲଙ୍କ ଦୌରାତ୍ମ୍ୟରୁ କିପରି ନିଜର ଫସଲ ରକ୍ଷା କିପରି କରିବେ ସେନେଇ ସ୍ଥାନୀୟ ଲୋକେ ଚିନ୍ତାରେ ଅଛନ୍ତି ।
ଇଟିଭି ଭାରତ, ଢେଙ୍କାନାଳ
