ଢେଙ୍କାନାଳ: ଜିଲ୍ଲା ସରାଙ୍ଗ ଇଞ୍ଜିନିୟରିଂ କଲେଜରେ ଅଘଟଣ । ସରାଙ୍ଗ ସ୍ଥିତ ଆଇ.ଜି.ଆଇଟି ହଷ୍ଟେଲ ଛାତରୁ ପଡି ଜଣେ ଛାତ୍ର ଗୁରୁତର । ଗୁରୁତର ଛାତ୍ରକୁ ପ୍ରଥମେ ଅନୁଗୋଳ ଓ ପରେ ଭୁବନେଶ୍ବର ସ୍ଥାନାନ୍ତର କରାଯାଇଥିବା ସୂଚନା । ଗୁରୁତର ଛାତ୍ର ଜଣକ ମେଟାଲୋଜି ବିଭାଗର ଶେଷ ବର୍ଷର ଛାତ୍ର ସତ୍ୟମ ଖାଲକୋ । ସେ ସୂର୍ଯ୍ୟ ଭବନ ହଷ୍ଟେଲରେ ରହୁଥିବା ବେଳେ, ଗତକାଲି ବିଳମ୍ବିତ ରାତିରେ କୌଣସି କାରଣରୁ ଛାତରୁ ପଡି ଗୁରୁତର ଆହତ ହୋଇଛନ୍ତି ।
ଏପରି ଅଭାବନୀୟ ଘଟଣାକୁ ନେଇ ସରଙ୍ଗ ଇନ୍ଦିରା ଗାନ୍ଧୀ ବୈଷୟିକ ପ୍ରତିଷ୍ଠାନରେ ଚାପା ଉତ୍ତେଜନା ପ୍ରକାଶ ପାଇଛି । ସ୍ଥାନୀୟ ପରଜଙ୍ଗ ଥାନା ଓ ସରାଙ୍ଗ ଫାଣ୍ଡି ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଏହି ଘଟଣାରେ କିଛି ଛାତ୍ରଙ୍କୁ ଅଟକ ରଖି ପଚରାଉଚରା ଜାରି ରଖିଛି ପୋଲିସ । ସୂଚନା ମୁତାବକ ଗତକାଲି କଲେଜର ଉତ୍କଳ ଦିବସ ଉପଲକ୍ଷେ ଫେୟାର ଫନ୍ କାର୍ଯ୍ୟକ୍ରମ ଚାଲିଥିଲା । ଏହି ପୋଗ୍ରାମରେ ଛାତ୍ରଛାତ୍ରୀମାନେ ନିଜେ ଷ୍ଟଲ ମାଧ୍ୟମରେ ଦୋକାନ ଖୋଲିବେ ଏବଂ ଏହି ଦୋକାନରୁ ସେହି କଲେଜ ଛାତ୍ରଛାତ୍ରୀ ମାନେ କିଣାବିକା କରିଥାଆନ୍ତି । ଏହା ପ୍ରତ୍ୟେକ ବର୍ଷ ଉତ୍କଳ ଦିବସ ତଥା ଏପ୍ରିଲ ୧ ତାରିଖ ଦିନ ପାଳିତ ହୋଇଥାଏ । ଏହି କାର୍ଯ୍ୟକ୍ରମ ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ରାତି ପ୍ରାୟ ୧୨.୪୦ ପର୍ଯ୍ୟନ୍ତ ଚାଲିଥିଲା ।
କଲେଜ ନିର୍ଦ୍ଦେଶକଙ୍କ ସୂଚନା ଅନୁଯାୟୀ, ‘‘ଗୁରୁତର ଛାତ୍ରକୁ ତୁରନ୍ତ ତାଳଚେର ସ୍ଥିତ ମଣ୍ଡାପାଳ ମେଡିକାଲ ତାପରେ ଅନୁଗୁଳ ଜିଲ୍ଲା ମୁଖ୍ୟଚିକିତ୍ସାଳୟକୁ ନେଇଥିଲେ । ସେଠାରେ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ତୁରନ୍ତ ଭୁବନେଶ୍ୱରର ଏକ ଘରୋଇ ମେଡିକାଲକୁ ସ୍ଥାନାନ୍ତର କରିଥିଲେ । ଏବେ ତାଙ୍କ ଚିକିତ୍ସା ଜାରି ରହିଛି । ’’ଖବର ପାଇ ସରାଙ୍ଗ ଫାଣ୍ଡି ଅଧକାକାରୀ ସୂର୍ଯ୍ୟ ହଷ୍ଟେଲରେ ପହଞ୍ଚି ଦୁଇ ଜଣ ଛାତ୍ର ଓ ଦୁଇଜଣ ଅଣଛାତ୍ରକୁ ପଚରାଉଚରା ଚଳାଇଛି । ତେବେ କଲେଜରେ ଛାତ୍ର ଓ ଅଣଛାତ୍ର ଉଭୟଙ୍କ ମଧ୍ୟରେ ଗଣ୍ଡଗୋଳ ହୋଇଥିବା ନେଇ ଅସମର୍ଥିତ ସୂତ୍ରରୁ ସୂଚନା ମିଳିଛି । ଗଣ୍ଡଗୋଳରୁ ଛାତ୍ର ଜଣକ ଛାତରୁ ଡେଇଁ ପଡିଛନ୍ତି ନା କେହି ପେଲି ଦେଇଛନ୍ତି ତାହାକୁ ନେଇ ସନ୍ଦେହ କରାଯାଉଛି । ତେବେ ଏହି ଘଟଣାରେ ଦୁଇଜଣ ଛାତ୍ରଙ୍କୁ ପୋଲିସ ଫାଣ୍ଡିରେ ଅଟକ ରଖି ଅଧିକ ତଦନ୍ତ ଜାରି ରଖିଛି । ତେବେ କଡା ସୁରକ୍ଷା ଭିତରେ ହଷ୍ଟେଲଟି ରହୁଥିବା ବେଳେ, କିଭଳି ଅଣ ଛାତ୍ରଙ୍କୁ ହଷ୍ଟେଲକୁ ପ୍ରବେଶ କରାଗଲା ତାହାକୁ ନେଇ ହଷ୍ଟେଲର ସୁରକ୍ଷା ଉପରେ ପ୍ରଶ୍ନ ଉଠିଛି ।
ଇଟିଭି ଭାରତ, ଢେଙ୍କାନାଳ
