କଟକ: ପୁଣି କାୟା ମେଲାଉଛି କୋରନା । ଦିନକୁ ଦିନ ବୃଦ୍ଧି ପାଇବାରେ ଲାଗିଛି କୋରନା ଆକ୍ରାନ୍ତଙ୍କ ସଂଖ୍ୟା । ସେହିପରି ଆଗକୁ ଏହାର ସଂଖ୍ୟା ଆହୁରି ବୃଦ୍ଧି ପାଇ ଦୈନିକ 1 ଲକ୍ଷରେ ପହଞ୍ଚିବା ନେଇ ବିଶେଷଜ୍ଞ ସୂଚନା ଦେଇଛନ୍ତି । ସେହିପରି ଏହି ମାସ ଶେଷ ବେଳକୁ କୋରନାରେ ଦୈନିକ 1 ଲକ୍ଷ୍ୟ ଲୋକ ଆକ୍ରାନ୍ତ ହେବେ ବୋଲି ଆଶଙ୍କା କରିଛନ୍ତି ଡାକ୍ତର ଜୟନ୍ତ ପଣ୍ଡା ।
ସେ କହିଛନ୍ତି ଯେ, "ମାସ ଶେଷ ସୁଧା ଚତୁର୍ଥ ଲହରୀ ଆସିବାର ଯଥେଷ୍ଟ ସମ୍ଭାବନା ରହିଛି । ଏହି ସଂଖ୍ୟା ବୃଦ୍ଧି ପାଇଲେ ବି ଚିନ୍ତାଜନକ ନଥିବା ସେ ଆକଳନ କରିଛନ୍ତି । କୌଣସି ଲୋକ ପୂର୍ବଭଳି ଗୁରୁତ୍ୱର ହେବେ ନାହିଁ। ଦେଶରେ ଦୈନିକ ସଂଖ୍ୟାରେ ହୁ ହୁ ହୋଇ ବଢ଼ିବାରେ ଲାଗିଛି । ଓଡ଼ିଶାରେ ମଧ୍ୟ ଏହାର ସଂଖ୍ୟା ଦୈନିକ ଦୁଇ ଶହ ରହିଛି । କଟକ ବଡ ମେଡ଼ିକାଲରେ ଆଜି ପର୍ଯ୍ୟନ୍ତ ୨ ଜଣ ରୋଗୀ କୋରନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି । ଏହି ଦୁଇ ଜଣ ରୋଗୀଙ୍କ ଦେହରେ ବିଭିନ୍ନ ପ୍ରକାର ରୋଗ ରହିଛି । ମାତ୍ର ସେମାନେ ଏତେ ଗୁରୁତର ନାହାନ୍ତି । ସେହିପରି ଓଡ଼ିଶାରେ ମଧ୍ୟ ଆଗକୁ ଏହି ସଂଖ୍ୟା ବୃଦ୍ଧି ପାଇବାର ଯଥେଷ୍ଟ ସମ୍ଭାବନା ରହିଛି ।" ତେବେ କୋରୋନାର ଏହା ଶେଷ ସମୟ ବୋଲି ଡାକ୍ତର ପଣ୍ଡା କହିଛନ୍ତି ।
ଏହି ମହାମାରୀର ଶେଷ ସମୟ ହୋଇଥିବାରୁ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବ ମାତ୍ର ଲୋକଙ୍କର କ୍ଷୟକ୍ଷତି ସେତିକି ହେବ ନାହିଁ ବୋଲି ସେ ଆଶଙ୍କା କରିଛନ୍ତି । ସେହିପରି ଏହା ଲୋକଙ୍କ ରୋଗ ପ୍ରତିରୋଧକ ଶକ୍ତିକୁ ବୃଦ୍ଧି କରିବ। ପରୀକ୍ଷାରୁ ଜଣା ପଡ଼ିଛି ଯେ ଏହା ଲୋକଙ୍କୁ ସଂକ୍ରମଣ କରୁନାହିଁ ଯାହାକି ଏକ ଖୁସିର ବିଷୟ । କିନ୍ତୁ ଏଥିପାଇଁ ଲୋକେ ବି ସଚେତନ ରହିବା ଆବଶ୍ୟକ । ବିଶେଷକରି ଭିଡ ସ୍ଥାନକୁ ଗଲେ ମାସ୍କ ବ୍ୟବହାର କରିବା ବା ସାମାଜିକ ଦୂରତା ଅବଲମ୍ବନ କରିବା ଉଚିତ ବୋଲି ସେ ପରାମର୍ଶ ଦେଇଛନ୍ତି ।
ପ୍ରକାଶ ଥାଉକି, ଆମ ରାଜ୍ୟର ସବୁଠାରୁ ବଡ ମେଡ଼ିକାଲରେ ମଧ୍ୟ କୋଭିଡ ମଗ ଡ୍ରିଲ ହୋଇଯାଇଛି । ଏହି ମକ ଡ୍ରିଲ ସମୟରେ ଏସସିବି କୋଭିଡ ହସ୍ପିଟାଲର ସ୍ଥିତି ଓ ଭିତ୍ତିଭୂମି ସମ୍ପର୍କିତ ସମସ୍ତ ତଥ୍ୟ ରାଜ୍ୟ ସରକାରଙ୍କୁ ପ୍ରଦାନ କରାଯାଇଥିବା ମେଡ଼ିକାଲ କର୍ତ୍ତୃପକ୍ଷ ସୂଚନା ଦେଇଛନ୍ତି। ସେହି ତଥ୍ୟ ମୁତାବକ ବର୍ତ୍ତମାନ ଏସସିବିରେ 20ଟି ଶଯ୍ୟା ବିଶିଷ୍ଟ ଗୋଟିଏ କୋଭିଡ ହସ୍ପିଟାଲ କାର୍ଯ୍ୟକ୍ଷମ ରହିଛି । ଏହି ହସ୍ପିଟାଲରେ 2ଟି ICU ବେଡ଼ର ମଧ୍ୟ ବ୍ୟବସ୍ଥା କରାଯାଇଛି । ଏହା ଛଡା 24 ଘଣ୍ଟିଆ ଖୋଲା ରହୁଥିବା ଫିବର କ୍ଲିନିକ ବି କାର୍ଯ୍ୟକ୍ଷମ ରହିଛି । ସେହିପରି ପୂର୍ବରୁ ପ୍ରତିଦିନ ହାରାହାରି ଦେଢ଼ ହଜାର କୋଭିଡ ଟେଷ୍ଟ କରାଯାଉଥିବା ବେଳେ ଏବେ ଅଧିକରୁ ଅଧିକ ସଂଖ୍ୟାକ ଟେଷ୍ଟ କରାଯିବା ଉପରେ ଗୁରୁତ୍ବ ଦିଆଯାଇଥିବା ବେଳେ 24 ଘଣ୍ଟିଆ ଟେଷ୍ଟ ସୁବିଧା ଉପଲବ୍ଧ କରାଯାଇଛି ।
ଇଟିଭି ଭାରତ, କଟକ
