ଅନୁଗୋଳ: ଦୀର୍ଘଦିନ ହେଲାଣି ଅନୁଗୋଳ ରେଲୱେ ଷ୍ଟେସନରୁ ଅନୁଗୋଳ-ପୁରୀ ମେମୋ ଟ୍ରେନ ଚଳାଚଳ କରୁନାହିଁ । ଅନ୍ୟ ଟ୍ରେନ ଚାଲୁଥିଲେ ମଧ୍ୟ ରେଳ ବିଭାଗ କୋଭିଡ ନାଁରେ ମେମୋ ଟ୍ରେନ ଚଳାଚଳକୁ ଜାଣିଶୁଣି ବନ୍ଦ କରିଦେଇଥିବା ଅଭିଯୋଗ ହୋଇଛି । ଟ୍ରେନଟି ଅନୁଗୋଳ ଷ୍ଟେସନକୁ ନ ଅଣାଯାଇ ତାଳଚେର ପର୍ଯ୍ୟନ୍ତ ଚଳାଯାଉଛି । ଯାହାକୁ ପ୍ରତିବାଦ କରି ଶୁକ୍ରବାର ରାସ୍ତାକୁ ଓହ୍ଲାଇଛି SUCI କମ୍ୟୁନିଷ୍ଟ ।
ଗତ ମାସରେ ମଧ୍ୟ ମେମୋ ଟ୍ରେନ ଚଳାଚଳ ଦାବିରେ SUCI କମ୍ୟୁନିଷ୍ଟ ପକ୍ଷରୁ ଧାରଣା ଦିଆଯାଇଥିଲା । ମାସକ ମଧ୍ୟରେ ଟ୍ରେନ ଚଳାଚଳ ନ କଲେ ଅର୍ଥନୈତିକ ଅବରୋଧ କରିବାକୁ ଲିଖିତ ଭାବେ ରେଳ ବିଭାଗ କର୍ତ୍ତୃପକ୍ଷଙ୍କୁ ଦଳ ଅବଗତ କରିଥିଲା । ଆଜକୁ ଠିକ ଏକ ମାସ ପୂରଣ ହୋଇଥିଲେ ମଧ୍ୟ କର୍ତ୍ତୃପକ୍ଷ କୌଣସି ପଦକ୍ଷେପ ନ ନେବାରୁ ବାଧ୍ୟ ହୋଇ ଅର୍ଥନୈତିକ ଅବରୋଧ କରିବାକୁ ଆସିଥିଲେ SUCI କମ୍ୟୁନିଷ୍ଟ କର୍ମୀ । କିନ୍ତୁ ପୋଲିସ ସେମାନଙ୍କୁ ଅଟକାଇବାରୁ ରେଳ ଫାଟକ ନିକଟରେ ସେମାନେ ବିକ୍ଷୋଭ ପ୍ରଦର୍ଶନ କରିଛନ୍ତି ।
ସ୍ଥାନୀୟ ରେଳ କର୍ତ୍ତୃପକ୍ଷ ବିକ୍ଷୋଭ ସ୍ଥଳକୁ ଆସି ବିକ୍ଷୋଭକାରୀଙ୍କ ସହ ଆଲୋଚନା କରିଛନ୍ତି । ଆସନ୍ତା ଜାନୁଆରୀ ପହିଲାରୁ ଅନୁଗୋଳରୁ ମେମୋ ଚଳାଚଳ ସ୍ବାଭାବିକ କରିବାକୁ ଲିଖିତ ପ୍ରତିଶ୍ରୁତି ଦେଇଥିବା ସୂଚନା ମିଳିଛି ।
କହିରଖୁଛୁ କି, ପୂର୍ବରୁ ଏହି ମେମୋ ଟ୍ରେନ ଅନୁଗୋଳରୁ ପୁରୀ ଚଳାଚଳ କରୁଥିଲା । କୋରୋନା କଟକଣା ପରଠୁ ତାହା ତାଳଚେରରୁ ପୁରୀ ଯାତାୟତ କରୁଛି । ଏହାଦ୍ବାରା ଅନୁଗୋଳ ଯାତ୍ରୀମାନେ ନାହିଁ ନଥିବା ଅସୁବିଧା ଭୋଗୁଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
