ଅନୁଗୋଳ: ବେଆଇନ ଗୋରୁ ଚାଲାଣ ରାକେଟର ପର୍ଦ୍ଦାଫାସ । ଅନୁଗୋଳ ଜିଲ୍ଲା ବଅଁରପାଳ ଥାନା ତଳମୂଳ ଗାଁଦେଇ ବେଆଇନ ଗୋରୁ ଚାଲାଣ ସମୟରେ ଅନୁଗୋଳ ସ୍ପେସିଆଲ ସ୍କ୍ବାର୍ଡ ଚଢ଼ାଉ କରି ଏକ ବଡ଼ ଗୋରୁ ଚାଲାଣ ରାକେଟକୁ ଧରିବାରେ ସଫଳ ହୋଇଛି ।
ପାଖାପାଖି ୧୨ ଟି ପିକଅପ୍ ଭ୍ୟାନରେ ୧୦୦ ରୁ ଉର୍ଦ୍ଧ୍ବ ଗୋରୁ ବୋଝେଇ ହୋଇ ଯାଉଥିବା ବେଳେ ପୋଲିସ ଉଦ୍ଧାର କରିବା ସହ ଗାଡି ଓ ଟଙ୍କା ଜବତ କରିଛି । ଏହି ଚାଲାଣରେ ସମ୍ପୃକ୍ତ ୩୧ ଜଣ ଗୋ ଚାଲାଣକରୀଙ୍କୁ ମଧ୍ୟ ଗିରଫ କରାଯାଇଛି । ସମସ୍ତ ଗିରଫ ଅଭିଯୁକ୍ତମାନେ କଟକ ଜିଲ୍ଲାର ବୋଲି ଜଣାପଡିଛି । ଏନେଇ ଜିଲ୍ଲା ପୋଲିସ ପକ୍ଷରୁ ଏକ ପ୍ରେସ ଇସ୍ତହାରରେ ସୂଚନା ଦିଆଯାଇଛି।
ସେମାନଙ୍କ ନିକଟରୁ ଗୋରୁ ସମେତ, ଗୋଟିଏ ସ୍ୱିଫ୍ଟ ଡିଜାଏର କାର, ୧୨ ଟି ପିକଅପ ଭ୍ୟାନ ଓ ନଗଦ ୮୭ ହଜାର ୫୩୦ ଟଙ୍କା ଓ ୨୧ ଟି ମୋବାଇଲ ଫୋନ ଜବତ କରାଯାଇଛି ।
ସୂଚନା ମୁତାବକ, ନରସିଂହପୁର ଅଞ୍ଚଳରୁ ହିନ୍ଦୋଳ ଓ ଆଠଗଡ଼ ଦେଇ କଲିକତା ବେଆଇନ୍ ଗୋରୁ ଚାଲାଣ ହେଉଥିବା ଖବର ପାଇ ସ୍ପେସିଆଲ ସ୍କ୍ବାର୍ଡ ଚଢାଉ କରିଥିଲା । ପୋଲିସକୁ ଦେଖି ସେମାନେ ଖସି ଯିବାକୁ ଚେଷ୍ଟା କରୁଥିବା ବେଳେ ପୋଲିସ ସେମାନଙ୍କୁ କାବୁ କରିବାରେ ସଫଳ ହୋଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
