କଟକ: ଆଜି ଭାରତ ଅଷ୍ଟ୍ରେଲିଆ ଦିନିକିଆ ସିରିଜର ନିର୍ଣ୍ଣାୟକ ଲଢେଇ । କ୍ୟାପଟେନ କୋହଲିଙ୍କ ହୋମ ଗ୍ରାଉଣ୍ଡ ବେଙ୍ଗାଲୁରୁର ଚିନାସ୍ବାମୀ ଷ୍ଟାଡିୟମରେ ଖେଳାଯିବ ଏହି ହାଇଭୋଲଟେଜ ଲଢେଇ । ମ୍ୟାଚ ବିଜୟ ସହ ସିରିଜ ହାତେଇବା ଲକ୍ଷ୍ୟରେ ଉଭୟ ଟିମ। ତେବେ ଏହି ମ୍ୟାଚକୁ ନେଇ ସିଲଭରସିଟି କଟକର କ୍ରିକେଟ ପ୍ରେମୀମାନଙ୍କ ମଧ୍ୟରେ ଦେଖିବାକୁ ମିଳିଛି ପ୍ରବଳ ଉତ୍ସାହ ।
ଆଜିର ମ୍ୟାଚ ବେଶ ସଙ୍ଘର୍ଷପୂର୍ଣ ହେବ । ପୂର୍ବ ମ୍ୟାଚ ପରି ଟସ ମ୍ୟାଚ ବିଜୟରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିବ । ପ୍ରଥମେ ଟସ ଜିତିବା ଦଳ ବୋଲିଂ ନିଷ୍ପତି ନେବା ନେଇ ଅନୁମାନ କରାଯାଉଛି । ବେଙ୍ଗାଲୁରୁର ଚିନାସ୍ବାମୀ ଷ୍ଡାଡିୟମରେ ସଫଳ ରନ ଚେଜର ଏକାଧିକ ରେକର୍ଡ ରହିଛି । ଏହି ଦୃଷ୍ଟିରୁ ଆଜିର ମ୍ୟାଚ ବେଶ ରୋମାଞ୍ଚକର ହେବାସହ, ଭାରତର ଜିତାପଟ ହେବ ବୋଲି କ୍ରିକେଟପ୍ରେମୀ ଆଶାବାଦୀ ଅଛନ୍ତି।
ଭାରତର ଶକ୍ତିଶାଳୀ ବ୍ୟାଟିଂ କ୍ରମ ଫର୍ମରେ ରହିଛନ୍ତି । ଓପନର ରୋହିତ ଶର୍ମା ଓ ଶିଖର ଧାୱନ, ବିରାଟ କୋହଲି ଓ ଲୋକେଶ ରାହୁଲ ବେଶ ଫର୍ମ ରହିଛନ୍ତି । ଯେ କୌଣସି ବଡ ବିଜୟ ଲକ୍ଷ୍ୟକୁ ଚେଜ କରିବାର ଭାରତ ଦଳର ଦକ୍ଷତା ରହିଛି । ଅନ୍ୟପଟେ ବୋଲିଂ ଲାଇନଅପରେ ନବଦୀପ ସାଇନି ବେଶ ପ୍ରଭାବୀ ପ୍ରଦର୍ଶନ କରୁଛନ୍ତି । ଏହା ସହିତ ବୁମରା ଓ ସାମି ମଧ୍ୟ ବିପକ୍ଷ ଅଷ୍ଟ୍ରେଲିଆକୁ ପାଣି ପିଆଇ ପାରନ୍ତି ।
2 ଶ୍ରେଷ୍ଠ ଟିମ ମଧ୍ୟରେ ଏହି କଡା ମୁକାବିଲା ନେଇ ବଢିଛି ହାର୍ଟବିଟ । ଭାରତ ନିଶ୍ଚୟ ବାଜିମାତ କରିବ ଓ କଙ୍ଗାରୁ ଦଳକୁ ପରାଜୟର ସ୍ବାଦ ଚଖାଇବ ବୋଲି କହିଛନ୍ତି ଫ୍ୟାନ୍ସ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ