ହାଇଦ୍ରାବାଦ: ଇଣ୍ଡିଆନ ପ୍ରିମିୟର ଲିଗ୍ର 14ତମ ସଂସ୍କରଣରେ ଆଜି ରାଜସ୍ଥାନ ରୟାଲ୍ସ ଓ ପଞ୍ଜାବ କିଙ୍ଗ୍ସ ମଧ୍ୟରେ ମୁକାବିଲା । ୱାଙ୍ଖଡେ ଷ୍ଟାଡିୟମ ମୁମ୍ବାଇରେ ଏହି ମ୍ୟାଚ ଖେଳାଯିବ । ଉଭୟ ଟିମ ପାଇଁ ଏହା ଚଳିତ ଆଇପିଏଲ ସଂସ୍କରଣର ପ୍ରଥମ ମ୍ୟାଚ ହେବ । ଫଳରେ ବିଜୟରୁ ହିଁ ଅଭିଯାନ ଆରମ୍ଭ କରିବା ଲକ୍ଷ୍ୟରେ ରାଜସ୍ଥାନ ଓ ପଞ୍ଜାବ ।
ଆଇପିଏଲର ଗତ ସଂସ୍କରଣରେ କେଏଲ ରାହୁଲଙ୍କ ନେତୃତାଧୀନ ପଞ୍ଜାବ କିଙ୍ଗ୍ସ ପଏଣ୍ଟ ଟେବୁଲର ଷଷ୍ଠ ସ୍ଥାନରେ ରହିଥିଲା । ଅନ୍ୟପଟେ ରାଜସ୍ଥାନ ତାଲିକାର ଶେଷରେ ଅଷ୍ଟମ ସ୍ଥାନରେ ରହିଥିଲା । ଫଳରେ ଚଳିତ ସଂସ୍କରଣରେ ଉଭୟ ଟିମ ଦମଦାର ପ୍ରଦର୍ଶନ ଲକ୍ଷ୍ୟରେ ରହିଛନ୍ତି ।
ଆଜି ଖେଳାଯିବାକୁ ଥିବା ମୁକାବିଲାରେ ୟୁନିଭର୍ସ ବସ୍ ନାମରେ ଜଣାଶୁଣା କାରବିୟନ ପାୱରହିଟର କ୍ରିସ ଗେଲ୍ ନଜର ଆସିବେ । ଗେଲ୍ ପଞ୍ଜାବ ଟିମର ପ୍ରମୁଖ ସଦସ୍ୟ ରହିଛନ୍ତି । ଏକ ବିରଳ କିର୍ତ୍ତିମାନର ମଧ୍ୟ ଅଧିକାରୀ ହୋଇପାରନ୍ତି ଗେଲ୍ । ଆଇପିଏଲରେ ଗେଲ୍ ଏଯାବତ ଖେଳିଥିବା 132ଟି ମ୍ୟାଚରୁ ମୋଟ 349 ଛକା ଲଗାଇଛନ୍ତି । ଫଳରେ ରାଜସ୍ତାନ ବିପକ୍ଷରେ ଗୋଟିଏ ଛକା ଲଗାଇବା ପରେ ଆଇପିଏଲ ଇତିହାସରେ 350 ଛକା ପୂରଣ କରିବେ । ଏଥିସହ ଇଣ୍ଡିଆନ ପ୍ରିମିୟର ଲିଗ୍ରେ 350 ଛକା ଲଗାଇଥିବା ପ୍ରଥମ ଖେଳାଳି ହୋଇଯିବେ । ଏହି ତାଲିକାର ଦ୍ବିତୀୟ ସ୍ଥାନରେ ରହିଛନ୍ତି ଆରସିବିର ଏବି ଡି ଭିଲିଅର୍ସ (236 ) ।
ଗେଲ୍ ଏହି କିର୍ତ୍ତୀମାନ ସ୍ଥାପନ କରନ୍ତି, ତେବେ କୌଣସି ଚମତ୍କାର ଠାରୁ କମ ହେବନାହିଁ । ଗେଲ୍ 132 ମ୍ୟାଚରୁ 150.11 ଷ୍ଟ୍ରାଇକ ରେଟ୍ ସହ 4772 ରନ ସଂଗ୍ରହ କରିଛନ୍ତି । ଗତବର୍ଷ ୟୁଏଇରେ ଖେଳାଯାଇଥିବା ଆଇପିଏଲରେ ବିସ୍ଫୋରକ ଅନ୍ଦାଜରେ ତାଙ୍କୁ ଦେଖିବାକୁ ମିଳିଥିଲା । 137.14 ଷ୍ଟ୍ରାଇକ ରେଟ୍ ଓ 41ରୁ ଅଧିକ ହାରରେ 288 ରନ ଦେଖିବାକୁ ମିଳିଥିଲା ।
ଆଇପିଏଲରେ ସର୍ବାଧିକା ଛକା ଲଗାଇଥିବା ଖେଳାଳିଙ୍କ ତାଲିକାରେ ମହେନ୍ଦ୍ର ସିଂହ ଧୋନି, ରୋହିତ ଶର୍ମା ଓ ବିରାଟ କୋହଲି ମଧ୍ୟ ରହିଛନ୍ତି ।
- କ୍ରିସ୍ ଗେଲ୍: 349*
- ଏବି ଡି ଭିଲିୟର୍ସ: 237
- ଏମଏସ ଧୋନି: 216
- ରୋହିତ ଶର୍ମା: 214
- ବିରାଟ କୋହଲି: 201
ବ୍ୟୁରୋ ରିପୋର୍ଟ, ଇଟିଭି ଭାରତ
