ହାଇଦ୍ରାବାଦ: ଚଳିତ ବର୍ଷ କୋଭିଡ-19 ମହାମାରୀ କାରଣରୁ କ୍ରିକେଟ ବନ୍ଦ ରହିଥିଲା । ବହୁତ ସମୟ ପରେ କ୍ରିକେଟ ପୁନର୍ବାର ଫେରିବ ବୋଲି କ୍ରିକେଟ ଫ୍ୟାନ୍ସ ଆକଳନ କରୁଥିଲେ ।
ମାତ୍ର ଏହାମଧ୍ୟରେ ଇଂଲଣ୍ଡ ଦ୍ବିପାକ୍ଷିକ ସିରିଜର ଆୟୋଜନ କରିଥିଲା । ପ୍ରଥମେ ୱେଷ୍ଟଇଣ୍ଡିଜ, ଇଂଲଣ୍ଡ ଓ ପରେ ପାକିସ୍ତାନ ଇଂଲଣ୍ଡ ଗସ୍ତ କରିଥିଲା । ତେବେ ଏହି ସମସ୍ତ ସିରିଜ ଜୈବ ସୁରକ୍ଷା ବଳୟରେ ଖେଳାଯାଇଥିଲା ।
କୌଣସି ଖେଳାଳି ଜୈବ ସୁରକ୍ଷା ବଳୟର ନିୟମ ଭଙ୍ଗ କରିବା ପରେ, ଜୋରିମାନା ସହ ମ୍ୟାଚରୁ ବାସନ୍ଦାଦେଶର କଡା ନିୟମ ରହିଥିଲା । ଜୋଫ୍ରା ଆର୍ଚର ନିୟମ ଭଙ୍ଗ କରିବା ପରେ, ତାଙ୍କୁ ଇଣ୍ଡିଜ ବିପକ୍ଷ ଦ୍ବିତୀୟ ଟେଷ୍ଟରୁ ବାହାର ହେବାକୁ ପଡିଥିଲା । 5ଦିନ ଆଇସୋଲେସନରେ ରହିବା ସହ ପୁନର୍ବାର କୋଭିଡ ଟେଷ୍ଟ କରାଯାଇଥିଲା ।
ଏକାଧିକ କ୍ରିକେଟର ଜୈବ ସୁରକ୍ଷା ବଳୟରେ ରହିବା ମୁସ୍କିଲ ବୋଲି ମତ ରଖିଛନ୍ତି । ଏହି କ୍ରମରେ ଇଂଲଣ୍ଡ ଅଲରାଉଣ୍ଡର ବେନ ଷ୍ଟୋକ୍ସଙ୍କ ନାମ ଯୋଡି ହୋଇଯାଇଛି । ଜୈବ ସୁରକ୍ଷା ବଳୟ ମଧ୍ୟରେ ଦୀର୍ଘ ସମୟ ଧରି ରହିବା କଷ୍ଟକର ବୋଲି ଷ୍ଟୋକ୍ସ କହିଛନ୍ତି । "ପରିବାର ଠାରୁ ଦୂରରେ ରହିବା, ଗୋଟିଏ ସ୍ଥାନରେ ଲମ୍ବା ସମୟ ଧରି ରହିବା କଷ୍ଟକର ।" ତେବେ ଘରେ ରହି କିଛି ନ କରିବା ଠାରୁ କ୍ରିକେଟ ଖେଳିବା ଭଲ ବୋଲି ଷ୍ଟୋକ୍ସ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
