ବ୍ରହ୍ମପୁର: ପୋଲିସ ପଞ୍ଝାରେ ଦୁଇ ଦୁର୍ଦ୍ଦାନ୍ତ ଅପରାଧି । ଜଣେ ବ୍ୟକ୍ତିଙ୍କୁ ଆକ୍ରମଣ କରିବାକୁ ଯୋଜନା କରୁଥିବା ବେଳେ ମାଡି ବସିଲା ବ୍ରହ୍ମପୁର ପୋଲିସ । ସେମାନଙ୍କ ନିକଟରୁ ଦୁଇଟି ପିସ୍ତଲ ସମେତ ୬ ଗୋଟି ଜୀବନ୍ତ ଗୁଳି ପୋଲିସ ଜବତ କରିଛି । ଗିରଫ ଦୁଇ ଯୁବକ ହେଲେ କହ୍ନେଇ ସେଠୀ ଓ କାଳିଆ ରେଡି । ସୂଚନା ଅନୁଯାୟୀ ବିଭିନ୍ନ ମାମଲାରେ ସଂପୃକ୍ତ ରହିଥିବା ଏହି ଦୁଇ ଅପରାଧି ଗତକାଲି ଗୋପାଳପୁର ଥାନା ଅନ୍ତର୍ଗତ ଆମ୍ୱପୁଅ ନିକଟସ୍ଥ ଆୟକର କାର୍ଯ୍ୟାଳୟ ନିକଟରେ ଜଣେ ବ୍ୟକ୍ତିକୁ ଆକ୍ରମଣ କରିବାକୁ ଯୋଜନା କରୁଥିଲେ । ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଗିରଫ କରିଥିଲା ।
କାଳିଆ ନାମରେ ପୂର୍ବରୁ ଗୋପାଳପୁର ଥାନାରେ ୯ଟି ସଙ୍ଗୀନ ମାମଲା ରହିଥିବା ବେଳେ କହ୍ନେଇ ସେଠୀ ପଶ୍ଚିମବଙ୍ଗର ହୁଗୁଳି ଠାରେ ଏକ ହତ୍ୟା ମାମଲାରେ ଜାମିନରେ ଆସିଥିଲା । ଏହା ଜଣାପଡିବା ପରେ ପୋଲିସ ଏହି ଦୁଇଙ୍କ ନାମରେ ଆଉ କଣ ମାମଲା ରହିଛି ତାହାର ଅନୁଧ୍ୟାନ କରୁଥିବା ବ୍ରହ୍ମପୁର ଆରକ୍ଷୀ ଅଧିକ୍ଷକ ଶ୍ରବଣ ବିବେକ ଏମ୍ ଆୟୋଜିତ ସାମ୍ୱାଦିକ ସମ୍ମିଳନୀରେ ସୂଚନା ଦେଇଛନ୍ତି । ହେଲେ ଏହି ଦୁଇ ଅପରାଧିଙ୍କ ପାଖରେ ଜବତ ବେଆଇନ ବନ୍ଧୁକ କେଉଁ ଠାରୁ ଆସିଥିଲା ଓ କିଏ ଦେଇଥିଲା ତାହାକୁ ନେଇ ପୋଲିସ ଅଧିକ ଖୋଳତାଳ କରିବ ବୋଲି କହିଛନ୍ତି ଏସପି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
